ACARA
PARTANGIANGAN PASSION PARJOLO (I)
Minggu: Reminiscere. Di HKBP Ajibata, Ressort Ajibata.
(Dipasahat Di Partangiangan Lingkungan)
1.
Marende No. 76: 1 – 2 SADA NAMA SANGKAP
1. Sada nama sangkap ni
rohangku di sandok portibi on.
Ndang tagamon na so las rohangku, molo jumpang au inon.
Naeng ma sai ingoton ni rohangku, na binaen ni Jesus tu tondingku. Uju pinorsanNa i,
saluhutna dosangki.
2. Ingkon sai Ibana
ingotonku, uju na tarpajal i.
Tu hau pinarsilang ginantungkon, sai mabaor mudarNa i.
Ai humophop au ditaon
uasNa, asa dohot au muse upaNa.
Ai ditatap do au on,
di pandokNa: “Nunga sun !”
Agenda:
Marhitehite
Goar ni Debata Ama, dohot Goar ni AnakNa Tuhan Jesus Kristus dohot Goar ni
Tondi Porbadia na
manompa langit dohot tano on. Amen.
Manjaha:
Tabereng
ma induk ni haporseaon i jala na paujunghonsa, i ma Jesus
na manaonhon parsilangon i, singkat ni las ni roha tohapNa i hian, so dietong i hailaon, gabe hundul di siamun ni habangsa ni
Debata: Paingotingot hamu ma Ibana, na pataontaon paraloan si songon i dompak
Ibana sian angka si pardosa, asa unang marnaloja hamu jala
unang mandate tondimuna.
Martangiang ma
hita:
Ale Tuhan Debata, Amanami na di banua ginjang! Asi ma rohaM di hami halak
na gale on. Diida Ho, na gogo do musunami, sai talu do hami dibahen, ala ni
hagaleonnami. Dibahen i hupangido hami tu Ho: Sai pargogoi jala pamonang ma
hami maralohon musu i marhitehite panaonon ni Anak haholongan ni rohaM, Tuhan
Jesus Kristus. Amen.
2.
Marende Sian BE. No. 152: 1 Jesus Na Mamorsan
1. Jesus na mamorsan dosa ni
portibi on, pangolu hami.
Jesus
na marmosan dosa ni portibi on, pangolu hami.
Jesus
na mamorsan dosa ni portibi on, sai pasonang hami, Amen,Amen,Amen.
Jadi diarahan
Jesus ma na sampulu dua i, jala didok ma tu nasida: Na nangkok ma hita tu
Jerusalem, jala tulus ma tu Anak ni jolma i sasudena, na tarsurat di angka
panurirang.
Ai pasahaton ma Ibana tu angka parbegu, gabe insahanna,
leaanna jala tijuranna ma Ibana; dung i mulak mangolu ma Ibana di ari
patoluhon. Alai ndang diantusi nasida agia otik sian i; na buni do Hata i sian
roha nasida, ndang diboto nasida na hinahataonNa i. Dung i dipinsang angka Sintua ni malim dohot angka parise ma rapot godang, didok nasida: Aha ma bahenonta?
Ai lan do tanda dibahen halak i! Molo itapasombu Ibana, porsea ma halak
saluhutna tu Ibana, gabe ro ma halak Rom mangarampas tanonta dohot bangsonta.
Alai hehe ma sada sian nasida, i ma si Kayapas, Sintua ni
malim di na sataon i, didok ma tu
nasida: Na hurang roha do hamu! Ndang dipingkiri rohamuna, denggan
do mate sahalak humophop natorop i, unang laho mago sandok bangso i.
Alai ndang sian rohana sandiri dihatahon i; ala Sintua ni
malim ibana di nasataon i umbahen
na disuriranghon, na naeng mate ma Jesus humophop bangso i. Alai tahe, ndada
holan laho manghophop bangso i,
alai naeng papunguonNa angka anak ni Debata, angka na marserak dope, laho pasadahon. Asa olat ni sadari i martuptup ma nasida
laho mamusa Ibana. Alai didok nasida ma: Unang ma di pesta i, so tung guntur natorop i!
3.
Marende Sian BE. No. 74: 4 SAI MARLASNIROHA
HITA
4. Nunga ro na mangapuli Roha ni parbegu i
Sahat do nuaeng na uli Tu na olo unduk di
Tuhan Jesus Raja i Naung ro sian surgo i
Sai tapuji ma Ibana Jala taoloi hataNa.
Dung i onom ari nari
asa dapot pesta Paska i, sahat ma
Jesus tu huta Betania, na ni inganan ni si Lazarus, na sinunggul ni Jesus sian na mate. Jadi dipauli
nasida ma di si panganon ujuan di Ibana;
si Marta do manghobasi, si Lasarus ma sada donganna mangan di si. Gabe dibuat si Maria ma
sahati miak Nardus na arga na so marsaor, dimiahi ma pat
ni Jesus, obukna ma dibahen
mangalapu. Jadi digohi uap ni miak i ma
bagas i. Jadi sada sian angka siseanNa, si Judas Iskariot na naeng manjehehon Ibana
mandok: Boasa so digadis miak i
arga tolu ratus hupang, bahen silehonlehon
nian tu angka napogos? Alai ndada na pogos sinarihonna, umbahen na didok ibana songoni, panangko do ibana tahe, diusung do asiasi ni halak, tu ibana do dipasahat puro i.
Dung i ninna Jesus ma: pasombu ma ibana, ai diparade do i hira tu ari hatatanomHi. Ai tongtong do adong napogos di tongatongamuna, jala
asal ma olo hamu, tarpatongon hamu do na denggan tu nasida; Alai anggo Ahu
ndang manongtong di hamuna. Intap na tarbahensa do na niulana i; na manjoloani
do Ibana mamiahi pamatangHu songon di na mananom.
Situtu do hatangkon tu hamu: Manang di dia di liat portibi
on dijamitahon muse Barita Nauli on, hatahononna do nang na
binahenna i gabe baritana.
4.
Marende Sian BE. No. 79: 7
7. Sai naeng ma tiruonku, pambaenanMi di au, tu sasude donganku,
Jesus, urupi au manghaholongi donganki, unang tung
Marpambuat nang marpangansi pe.
Dung i torang ni arina i, dibege halak na torop na ro tu pesta i, na naeng ro
ma Jesus tu Jerusalem, jadi dibuat nasida ma angka maremare laho manomunomu Ibana
huhut manjoujouhon: Hosianna! Pinasupasu ma na ro marhite goar ni Tuhan i, Raja ni Israel. Dung i
dapot Jesus ma halode sada, i ma dihunduli hombar tu na tarsurat: Unang ho
mabiar ale boru Sion, ida ma: Rajam do na ro, marsihundul di anak ni halode. Jala halak parise deba na sian na torop i mandok tu Ibana: Orai antong angka siseanMi, Guru!
Alai ninna ma mangalusi: Hudok ma di hamu, aut mauhom nasida, manjoujou ma
angka batu!
5.
Marende Sian BE. 83: 5 Na Lao Do Birubiru i
5. O Tuhan hinauliMi, sai naeng endehononku
Diringku ma peleanMi, na naeng seahononku
O Jesus jalo ma au on,
pasiat ma pamujingkon
Baen sangap di goarMu, pasahat au tu surgo i
Marhitehite mudarMi, baen intan di tumpalMu.
Alai dibongoti sibolis do si Judas na margoar Iskariot,
sahalak sian na sampulu dua i.
Gabe laho ibana martuptup dohot angka Sintua ni malim raphon angka
panungganei, manang dia dalanna pasahathon Ibana tu nasida. Jadi sian las ni
roha nasida marpadan ma nasida mangalehon hepeng tu ibana. Di oloi si Judas ma i, jadi dilului ma tingki na
une pasahathon Ibana so sian pamotoan ni natorop i.
6.
Tangiang Pangondianon: (Sian
Parhalado)
7.
Marende Sian BE. No. 86: 1 – 2 Silang
Na Badia i
1. Silang na badia i, Ho do lombulombungki
Maralohon dosa i, dohot pandelean i
Di sude sitaonon i, Ho ma lombulombungki
2.
Nasa na huula i Ndang tau hasonanganki
Nang ringkot pe rohangki Pola ro nang ilungki
Holan asi ni rohaM Pangurupi o, Tuhan
8.
Jamita :
9.
Marende Sian BE. No. 82: 2 – 3 O Jesusku Tu BugangMu
2. Tung di patMu, o Jesusku, solsolanku
rohangki.
Tangisanku na
tinaonMu, ala jat ni rohangki.
3. Tu tanganMu ma tondingku,
jumpa hamamatengki.
Tu lambungMu, o
Tuhanku, alap na tinobusMi.
10. Tangiang Pelean
11. Tangiang Ale Amanami
12. Pasupasu.
* Selamat Mengikuti Acara Passion *
Pdt. Ahab Tambun, STh – HKBP Ressort Ajibata.
Komentar
Posting Komentar