SERMON HKBP RESSORT AJIBATA
SABTU 13 Pebruari 2016, JAMITA TU
MINGGU, 14 Pebruari 2016.
MANDOK MAULIATE JALA MAMELEHON PARBUE NI
ULAON
(5
Musa
26: 1 – 11).
I.
Patujolo
Buku 5 Musa on, ima buku na marisihon
barita pangaratarataion taringot pangaramotion dohot pambahenan ni Debata Jahowa
dohot sejarah ni angka ompu ni halak Israel sian na malua sian parhatobanon
Misir sahat tu hamamate ni si Musa. Marhite hatorangan na adong di buku on,
dapot hita na paboahon na sahat dope halak Israel tu Kanaan, ima tano naung
dibagabagahon Debata Jahowa tu ompunasida si Abraham nang sude pinompar ni si Abraham
(1 Musa 17: 7 – 8). 5 Musa, ima bagian na parpudi buku ni si Musa
(Taurat). Laos buku on do na marisihon pangalaho na
ingkon siparadeon ni bangso Israel di na lao mamongoti tano bagabaga i, ima tano
Kanaan. Didok angka pande ni Padan Na Robi, buku pangaratarataion di Patik na
gabe ojahan ni bangso Israel di adopan ni Debata. “Ia dung masuk ho tu tano, silehonon ni
Jahowa, Debatam tu ho bahen partalianmu, dung disoluk ho tano i laos maringan
di si”, ninna di ay. 1 i.
II.
Hatorangan.
Saluhut na
porsea do manghatindanghon; Molo so ala pambahenan ni Debata di ngolu ni halak na
porsea ndang tarbahen hita mandalani ariari ni ngoluna, tarlumobi laho mangula
angka siulaon. Ala ni i do asa disosohon marhite ay. 2 i laho pasahathon hamualiateon sian patumonaan na
ni ula tu Debata Jahowa. Aha do patumonaan? Parbue patumonaan ima parbue na
mansai denggan sian parbue na asing sian angka suansuanan. Ayat 2 on paboahon
tu bangso Israel, nang tu hita pe dipartingkian si nuaeng on, asa tapelehon ma
pelean na mansai denggan tu Debata Jahowa. Ndada na hurang denggan manang na so
hasea na so boi be pangkeon, alai angka na dumenggan do sipasahaton jala
sipelehononhon tu Debata Jahowa. Mangihuthon tradisi ni halak Jahudi, ingkon
patupahon pesta do laho pasahathon patumonaan na niula i, jala diulahon nasida
do i ganup taon secara serentak. Molo dihurianta digoari ma on “Pesta Gotilon”. Adong do pigapiga hal na
mansai ringkot siputihonta sian turpuk on:
Parjolo, Debata do mual ni nasa na denggan
jala hangoluan ni saluhut angka na mangolu, lumobi jolma. Molo nunga
tajalo na denggan i sian Ibana marhite na
mangalehon tano i gabe ingananta. Ndada holan na modom hita di si, mangula do
angka jolma dohot mangulon jala Debata do namanubuhon na tasuan i dohot na
mamasumasu na taula i tontu tapuonta do parbuena. Patumonaan manang hasil
pertama ingkon sipasahaton do i tu Debata Jahowa. Unang neang jala langgus rohanta di si, alai
taingot jala taulahon ma ro tu Jahowa huhut mangalehon patumonaan i, jala tapatupa
ma i ala ni Tuhan i.
Paduahon, Debata do na mangalehon sian na
tinompaNa
i. Marlapatan do i paboa Debata do nampusa
tano i jala nunga dibagabagahon tu ompunasida ingkon lehononNa i tu halak
Israel. Dipabotohon tu nasida; nampuna ni Debata sandiri do dipasahat tu nasida
(Milik Allah diberikan kepada bangsa
Israel). Di bagasan tona marisi adong "Partalian" manang
"Hubungan yang sakral" antara Debata dohot bangso i. Dipartalian i
marisihon tona siulahonon nasida marhite na mambuat patumonaan ni parbue ni
tano i na gabe songon pelean na hushus tu Debata Jahowa.
Patoluhon, Ingkon sai jumolo do hita
pasahathon angka na dumenggan tu Debata Jahowa silehon pasupasu i. Ima
patuduhon jala mangajari hita laho manghaporseai Debata huhut pasangaphon Ibana
marhite angka na denggan naung tapasahat tu Ibana sian pasupasu na nilehonNa i
tu hita. Nian, ndang ala na hurangan Debata gabe talehon tu Ibana, alai dalanta
do i mandok mauliate dohot manghamualiatehon saluhut pasupasu dohot basabasa ni
Tuhan Debata na tajalo di bagasan ngolunta.
III.
Panimpuli.
Tano Kanaan, ima tano silehonlehon
ni Debata Jahowa tu bangso Israel marhite naung binabagabagahon ni Debata tu ompunasida, jala i do na gabe hataridaan haluaon na binahen ni Debata
Jahowa tu bangsoNa, bangso Israel. Marhite i, naeng ma angka sipelebegu marnida saluhutna balga
ni pambahenan ni Debata jala ingkon dapotan haluaon ma nian bangso sipelebegu i
sian Debata Jahowa. Halak na mian di bagasan tano Kanaan, marlapatan do i mian
di asi ni roha ni Jahowa. Jala halak na mian di asi ni roha ni Jahowa, ingkon
diboto mandok mauliate tu Debata Jahowa marhite na pasahat angka parbue na ni
ulana gabe pelean na hinalomohon ni roha ni Debata Jahowa. Pasahathon pelean tu
Debata Jahowa naeng ma sian ias ni roha, unang ala na pinaksa. Unang di bagasan
neang dohot langgus ni roha hita laho pasahathon angka peleanta i, alai ingkon di
bagasan parsombaon na polin tu Debata Jahowa na Songkal i, asa gabe pujipujian
hamuliaon di Ibana jala manghorhon pasupasu las ni roha di hita na porsea.
Pdt. Ahab
Tambun, STh – HKBP Rest. Ajibata.
Komentar
Posting Komentar