SERMON HKBP RESSORT AJIBATA
SABTU 20 Pebruari 2016, JAMITA TU MINGGU, 21 Pebruari 2016.
MARSIHOHOT
DI BAGASAN TUHAN I
(Pilipi 3: 17 – 4: 1).
I.
Patujolo
Sada tujuan manurathon angka jujur ngolu ni angka parbarita na uli na adong di Bibel i, ima asa gabe sitiruon parngoluon nasida lumobi di sundut na umpudi. Na gabe sungkunsungkun nuaeng; Hea do taihuthon manang tatitiru pambahenan nasida? Manang dohononta do; Ai asing do zaman nasida tu zamanta si nuaeng on. "In us without Christ there is nothing good to imitate”. Di bagasan hadirionta molo so ala ni Kristus ndang adong na denggan (Ptds. Rom 7; 18). Di bagasan turpuk on diarahon Ap. Paulus do hita asa mangulahon angka na denggan maniru angka pambahenanna. Ap. Paulus barani mangarahon hita laho maniru na denggan sian angka parulaonna ala naung jumolo ibana patupahon angka na denggan maniru pambahenan ni Tuhan Jesus di bagasan ngoluna.
Sada tujuan manurathon angka jujur ngolu ni angka parbarita na uli na adong di Bibel i, ima asa gabe sitiruon parngoluon nasida lumobi di sundut na umpudi. Na gabe sungkunsungkun nuaeng; Hea do taihuthon manang tatitiru pambahenan nasida? Manang dohononta do; Ai asing do zaman nasida tu zamanta si nuaeng on. "In us without Christ there is nothing good to imitate”. Di bagasan hadirionta molo so ala ni Kristus ndang adong na denggan (Ptds. Rom 7; 18). Di bagasan turpuk on diarahon Ap. Paulus do hita asa mangulahon angka na denggan maniru angka pambahenanna. Ap. Paulus barani mangarahon hita laho maniru na denggan sian angka parulaonna ala naung jumolo ibana patupahon angka na denggan maniru pambahenan ni Tuhan Jesus di bagasan ngoluna.
II.
Hatorangan.
1.
Hajongjongan
ni halak Kristen di portibi on ingkon gabe sira dohot panondang (Mat. 5; 13 – 14). Gabe Sira dohot Panondang,
marlapatan do i ingkon gabe sitiruon di angka na denggan, di panghataion lumobi
pambahenan pe, i do umbahen marhite turpuk diarahon jala dipaingot Ap. Paulus
huria Pilipi asa marpangalaho na denggan maniru pambahenanna mangihuthon
paniruonna di Tuhan Jesus. Autsugari ndang diulahon Ap. Paulus na denggan, ra
ndang barani ibana mangarahon ruas ni huria Pilipi laho mangulahon na denggan.
Didok Ap. Paulus; “Rap sitiru ahu ma
hamu...” (ay. 17), jala di 1 Korint 11; 1 didok; “Tiru hamu ma ahu, songon ahu maniru Kristus”. Mansai hirim do roha
ni Ap. Paulus marhite surat na tingoshonna on asa anggiat nian ruas ni huria Pilipi;
Parjolo, Mangomo ala ni Kristus/Kristus menjadi keuntungannya (ay. 8),
Paduahon, Gabe tangkas ditanda nasida Kristus (ay. 10), 3. Anggiat sahat tu
haheheon sian na mate marhite na marsihohot mangihuthon Kristus (ay. 11).
2.
Ay.
18 – 19. Sipaingot asa unang manrparange
songon portibi on. Adong jala masa hatiha i halak angka pangajari (Bidat) na
mangasahon goar ni Tuhan i, hape anggo sasintongna musuh ni Tuhan i do nasida. Pangajarion
na sian Ap. Paulus polin do diajarhon taringot tu haKristenon, alai dung
ditinggalhon ibana huria i manguduti angka ulaonna tu angka huria dohot luat na
asing ro ma muse pangajarion sian parpoda haliluon laho manegai haporseoan ni ruas ni
huria Pilipi (Kehidupan rohani orang
Filipi ditandai oleh sinkritisme termasuk pemujaan kaisar (Julius, Augustus,
dan Claudius), juga banyak ilah lainnya).
Tumatangis do ibana manolsoli pangalaho ni ruas ni huria na manjalo pangulaon
ni angka pangajari na masuk tu huria i. Ala hinorhon ni i, gabe torop halak
berorientasi tu materialisme, jabatan dohot angka na asing. I do asa didok Ap.
Paulus: ”Hamagoan do ujungnasida,
butuhanasida do dipardebata, sihailahononna dihasangaphon, angka na di tano on
do diparrohahon (ay. 19). Ditulak nasida sintuhu ni Barita na Uli i, i ma
Jesus Kristus naung tarsilang i. Ala ni i ma asa digoari Ap. Paulus nasida musu
ni silang ni Kristus i. Di partingkian sinuaeng on pe, torop angka ruas ni
huria jala mungkin nunga termasuk angka parhalado holan na mangharingkothon
ngolu ni pardagingonnna marhite na mementingkan/mengutamakan angka materi dohot
jabatan daripada ngolu ni partondionna.
3.
Ay.
20 – 21. Parlojongan ni halak na porsea. Di
banua ginjang do sambulo ni tondinta, marlapatan do i, nang pe di portibi on dope hita, alai ndang
marharoroan sian portibi on hita jala ndang manongtong hita di portibi on. Aut na sian
portibi on hamu, haholongan ni portibi on do donganna. Alai ndang sian portibi
on hamu... (Joh. 15; 19).
Nunga diain Debata marhite Jesus Kristus angka na porsea gabe anak ni Debata. Alai molo anak hita, dohot ma panean; panean
di Debata, dongan panean ni Kristus; molo tung donganna hita di sitaonon, gabe
donganna hita sogot nang di hasangapon (Rom 8: 17). Diparade
Tuhan Jesus do di hita arta siteanon, i ma na hasangapon na gabe siteanon ni
angka na porsea di banua ginjang rap dohot Ibana. Nunga dipalumbahon i tu hita
ganup angka na porsea, naeng ma nian taharingkothon jala tahalaputi mangarade
diri manjalo arta siteanon i, i ma hangoluan saleleng ni lelengna di banua
ginjang. Ai di banua ginjang do sambulo ni tondinta jala paubaon ni Tuhan i do
daging ni halak na porsea (na lea) gabe doshon Ibana (na sangap i). Hamumuba ni
pamatang ni na porsea marhite hamatean, songoni do nang hamubaon ni pamatang ni
saluhut na porsea, mulak mangolu angka naung mate i diharoro ni Tuhan na padua
halihon laho paimbaruhon daging ni halak na porsea. Paubaonna ma daging ni
halak na porsea gabe pamatang partohap di harajaon ni Debata, ima hangoluan na
so ra suda.
III.
Panimpuli.
Torop
do angka pemimpin di portibi on, alai ndang piga i na boi gabe teladan
(sitiruon). Jesus Kristus do tiruan di hita, di hata dohot di pambahenanNa pe,
lumobi holong ni roha, serep ni roha dohot halambokonNa. Sian asi ni rohaNa
dihalomohon do patandahon ngolu dohot pangalahoNa tu angka na parjolo porsea
jala maniru Ibana. Molo didok Ap. Paulus pe: “Rap sitiru ahu ma hamu...”
ninna, mangihuthon pambahenanna do i maniru naung dipatupa Tuhan Jesus di
bagasan ngoluna. Maniru manghatai dohot
marpambahenan na denggan nang pe di bagasan hamaolon. Di angka ragam ni
parsorion di ngolu ni halak na porsea, tarjou do saluhut halak Kristen laho
papatarhon holong marhite ulaon na denggan, ima parbue ni haporseaonta ala
Kristus. Molo pe ragam hamaolon dohot angka sitaonon masa di ngolunta, alai tongtong
ma taingot: Ndang sadia dope sitaononta martimbanghon na tinaon ni Tuhan Jesus
Kristus humokkop hita. Antong marsihohot ma hita di bagasan Tuhan i, asa gabe
parjambar hita di haluaon i dohot di hasangapon na pinatupaNa i. Amen.
pdt. ahab tambun,
sth – hkbp rest. ajibata.
Komentar
Posting Komentar