PAMILLITON NI DEBATA TU NAPOSONA

Sermon HKBP Ressort Ajibata Jamita tu tanggal, 03 Pebruari 2013.

PAMILLITON NI DEBATA TU NAPOSONA

(Jeremia 1: 4–10)

Patujolo

            Molo taarahon sian tongatonga ni ruas gabe parhalado laho manghobasi na ringkot di Tuhan i marhitehite HuriaNa, gumodang do i na so olo. Alasanna, ndang tarjou jala ndang tarpillit. Memang, gabe naposo ni Tuhan i ingkon adong do panjouon dohot pamiiliton tu ganup halak na olo jala rade gabe parhalado. Molo so adong do panjouon dohot pamilliton sian Tuhan i, sude angka tugas haparhaladoon gabe boban do i. Marragam sasintongna angka alasan molo ro panjouon gabe naposo ni Tuhan, songon si Jeremia di turpuk on “bajar dope au jala ndang huboto manghatai”.  Malo manghatai ingkon gabe sada keharusan do i di sahalak panurirang manang naposo ni Tuhan i, ala memang ulaonna pasahathon Hata ni Tuhan, ndada hata ni jolma. Hata ni Tuhan i tongtong do i gabe sipaingot, poda, pangajarion, sudena i ingkon berangkat sian pengalaman.  Sahalak na bajar manang na poso dianggap hurang berpengalaman. Ala ni i, sasintongna alasan ni si Jeremia manulak panjouon ni Debata sangat logis (masuk akal).

Alai mansai ringkot do botoonta, olo jala rade gabe naposo ni Debata ndada ala ni haboion ni sasahalak, ndada ala ni gogo manang pingkiranta. Huaso ni Debata do manjou jala mamillit naposoNa. Gabe naposo ni Debata ndada persoalan pemilihan (songon pilkada), alai persoalan panjouon manang panggilan.

                Jahowa sandiri do na padirihon panurirang sian ragam dohot latar belakang  ni parngoluanna. Adong do dipillit Jahowa sian sahalak partani, malim, anak ni malim, dohot na asing. Marlapatan ma i, pamillit dohot padirihon sahalak panurirang, Jahowa sandiri do na padirihon laos Ibana do na manjadihon sasahalak gabe panurirang, jala saguru tu Ibana do panurirang na dipillitNa i.

Hatorangan ni turpuk

Ayat 4 – 5       

Manaringoti panjouon dohot pabangkithon si Jeremia gabe sahalak panurirang marhitehite panghataion ni si Jeremia tu Debata Jahowa (ay. 4-5). Nunga ditanda jala nunga ditodo gabe panurirang tagan so dijadihon dope ibana di bortian; jala diparbadiai laho mangulahon sada ulaon na mansai ringkot tagan so tubu ibana. Diparbadia i marlapatan do i adong ulaon khusus, ulaon naung ditontuhon Jahowa sandiri tu ibana. Jala dipabangkit ibana gabe panurirang tu angka bangso. Sian ayat 5 on tangkas do hapanurirangon ni si Jeremia ndada holan tu bangso Juda, alai dohot do tu sude bangso. Sian turpuk on tangkas do dipabotohon ndang tubu sian sangkap ni Jeremia na gabe panurirang, alai sian sangkap ni Jahowa sambing do, so pola diboto si Jeremia hian andorang so dijou ibana. Proses panjouon si Jeremia gabe panurirang ima: Panandaion/Pamillithon; Pabadiahon; Pabangkithon. Jala sude proses i, Debata Jahowa sandiri do na mangulahon.          

Ayat 6 – 8

Di ayat 6 tangkas do adong panjuaon  ni si Jeremia taringot tu panjouon ni Debata. Dibahen si Jeremia alasanna, habajaronna jala na so malo ibana mandok hata na naeng sipasahatonna jala gabe  sada alsan do i manulak panjouon ni Debata Jahowa. Alus na pinasahat si Jeremia ndang na gabe pangambati tu angka ulaon dohot sangkap ni Debata Jahowa.

            Alus na pinasahat ni si Jeremia patuduhon hahurangan jala hagaleonna gabe panurirang. Alai sude na pinasahat si Jeremia dang dijalo Jahowa. Tarida do sian Hata ni Debata  Jahowa di ayat 7 – 8. Ima na patuduhon ndang marhitehite gogo ni si Jeremia laho mangulahon hapanurirangonna, jala angka hata na dihatahon si Jeremia ndang na tubu sian dirina sandiri, alai sian Jahowa do. Dihabajaron, somal do adong biar ni roha, boha do panjanghonon ni jolma tu ibana dohot hata Jahowa na pinasahatna, jala olo gabe ditangkup, diburai angka halak na sogo ala dipaingot si Jeremia marhite hata Jahowa, jala olo gabe agoan hosa. Alai ro do alus ni Debata Jahowa tu si Jeremia, na gabe sada jaminan jala na paposhon rohana, “...unang ho mabiar maradophon nasida, ai sai Ahu do donganmu” (ay. 8). Adong na gabe sada jaminan sian na manjou tu na jinou i. Hata manang padan ni Jahowa on ima mual ni panghirimon tu naung tarpillit gabe panurirang ni Debata Jahowa, na mangadopi ragam ni angka parungkilon dohot parsorion na borat jala maol ala ulaon panurirangon na hombar tu na diaturhon ni DebataJahowa.

            Ayat 9 – 10

Debata Jahowa mambohali si Jeremia gabe sahalak panurirangNa. Dipabotohon do Jahowa patoltolhon tanganNa (mamasumasu), jala manjama pamanganna. Ayat on pabotohon andorang so borhat si Jeremia laho manurirangi parjolo sahali do diparbadiai jala dibohali pamanganna laho manghatahon hata ni Jahowa. Sahalak panurirang/naposo ni Debata ima dalan/parhitean  ni Debata Jahowa pasahathon hataNa tu angka bangsoNa. Dilehon Debata Jahowa do angka hataNa na naeng sipasahaton si Jeremia jala on ma na pamagohon alus ni si Jeremia taringot tu hagaleon manang hahuranganna, na so mamboto hata na patut sihatahonna. Debata Jahowa sandiri do na mambohali si Jeremia marhite hata dohot pangajarion nanaeng siulahononna. Dung dilehon Debata Jahowa hataNa tu pamangan si Jeremia pintor dipasahat Jahowa do angka dia do na naeng jala ingkon siulahonon si Jeremia “mangaranapi angka bangso dohot angka harajaon, lahomangurati dohot maniaphon, mangago dohot mangaloha, paulihon dohot manuan.  Tugas pokok ni si Jeremia ima “mangarumpakhon” dohot “paulihon”. Hasisingkop angka ulaon hapanurirangon ni si Jeremia ima, paboahon uhum dohot panghirimon. Disuriranghon si Jeremia do uhuman nanaeng masa tu bangso i, alai ndada holan i, diulahon do ulaon paulihon na gabe sada tanda ni holongna.

            Tontu ulaon na mansai maol jala borat do ulaon i molo diida sian hajolmaon. Boha do sahalak na bajar tuk gogona laho paingothon panggomgomi, angka raja, jala paboahon paruhuman tu bangso i? Olo do ra didok halak na hurang roha. Apalagi di hatiha i adong muse ma angka panurirang pargapgap na mandok dirina panurirang ni Jahowa hape sasintongna panurirang na mambahen dame jala las roha ni raja i asa dapot untung ibana (mangait tu ngadol).

Aplikasi

Dipatuduhon do marhite turpuk jamita on tangkas adong panghataion na mansai jonok, songon sahalak ama tu iankkonna. Manang songon na maraleale. Panghataion ni si Jeremia tu Debata Jahowa, dipabotohon si Jeremia do hagaleon dohot hahurangan ni si Jeremia gabe sahalak panurirang. Alai sude na i ndang gabe sipangambati tu sangkap dohot ulaon haluaon na pinatupa ni Debata Jahowa. Hombar ma i antong tu lapatan ni goar ni si Jeremia: Timbul do Jahowa. Dipatuduhon hatimbulon ni Jahowa na so boi diambati manang aha pe termasuk hagaleon dohot hahurangan ni jolma. Manang aha pe ragam angka hagaleon dohot hahuranganta, tapaloas ma Jahowa mangula dibagasan ngolunta, asa marhite i, saluhut na margoar hagelon dohot hahuranganta i diumpat Debata Jahowa. Marhite turpuk on, Debata Jahowa digombarhon sahalak na tangkas mananda, mamparbadiai, jala na pabangkithon si Jeremia gabe panurirang. Ndada sangkap ni si Jeremia jala ndada sian rohana (keinginan) gabe panurirang, alai sian sangkap Jahowa sambing do. Ala sangkap ni Debata Jahowa sandiri do, laosDebata Jahowa do na manuturi, jala mandongani si Jeremia mangulahon ulaon na pinasahat Debata Jahowa tu ibana.  Pdt. Ahab Tambun, STh.