Jamita Minggu XVIII
Dung Trinitatis
Tanggal, 03 Oktober
Heber 2: 1 - 4.
Topik: Haluaon Sian Debata.
- Turiturian na masa.
Di taon 54 sahat
tu taon 60-an, masa do pangaleleon tu halak Kristen di luat Rom, lumobi di masa
harajaon kesar Nero. Mansai posi jala porsuk do ditaon halak Kristen di tingki
i. Torop halak na disiksa jala deba sahat tu na marujung ngolu. Ndang mardia
imbar baoa manang parompuan dibunu Kesar Nero marhite ragam ni angka alasan so
pola tangka manang aha alana.
Tarbortik ma pangaleleon
i tu sada huta na antar holang sian huta Rom. Otik do halak Kristen sian pangisi
ni huta i, hirahira lima kk do nasida. Di sada tingki topet di bornginborngin
marsangkap ma nasida maninggalhon huta i lao martabuni tu inganan na asing.
Diparade nasida ma bohalnasida sae tu pigapiga bulan.
Borhat ma nasida
di bagasan dos ni roha. Di tongan dalan uju maradian ala ni lojana, huhut ma
nasida martungkar pingkiran pasada tahi manang dompak dia do nasida martabuni.
Sian dos ni roha, borhat ma nasida manuju tu balik ni sada dolok, di bariba ni
dolok na adong di huta i. Nunga manang na piga ari nasida na mardalan i ndang
marnajumpang dope inganan situjuon nasida i. Deba sian nasida nunga sampe
hansit simanjojakna na mardalan i. Hira dung naeng botari, jala naeng mandok ro
nama udan na gogo sahat ma nasida tu sada liang manang gua di bona ni dolok i.
Marlas ni roha do nasida mandok mauliate tu Tuhan Debata, ala ndang sanga
nasida di tinggang udan na gogo i. Dipungka nasida ma paulihon inganan di liang
i asa boi mangalompa dohot modom di liang i manang na piga bulan lelengna.
Di mulana i
sonang do nasida tading di liang i. Alai dung manang piga ari adong ma sian
tongatonga nasida gale pamatangna, hira na pingsan idaon. Somalna do i, molo
sapartinaonan mintor disarihon donganna na hipas i do donganna na gale i. Angka
na hipas dope pamatangna i, marsangkap do nasida naeng maninggalhon inganan i
laho mangalului inganan partabunian na asing muse. Alai ndang denggan
tadingkonon dongan di bagasan na hurang sehat. Muse mabiar do nasida, so tung pajumpang
annon dohot tentara Kesar Nero na kejam i. Ujungna, nunga dos rohanasida laho
tongtong mian di liang i, manang aha pe na masa. Molo tung i pe ujung ni
ngolunasida jala ingkon mate di liang i nasida nunga dipabulus nasida
rohanasida laho mangadopi i rap dohot angka donganna naung galegale i.
Na so panagaman
nasida, ro ma 2 halak parmahan birubiru parhuta na di topi ni dolok i manopot
nasida laho mangalului birubiruna na mago. Boasa ditodo parmahan si 2 halak i
tu liang i, ala diida nasida malondas (mapopo) ramba manuju tu baba ni liang i.
Dipingkiri parmahan i, ra tu liang i do diboan angka na mambuat birubirunasida
i. Dipaihutihut nasida sahat tu baba ni liang i, jala masuk nasida tu bagasan,
tarsonggot ma nasida mangida angka jolma na sai mangalgipi paima tos hosana.
Longang ma roha ni parmahan na dua i, boasa boi masa songoni di liang i. Diida
nasida adong do angka sipanganon na gabe bohal nasida. Jala bingung do parmahan
si 2 halak i, jala nasida na dua ma marsisungkunan. Sian dia pe haroroan ni
angka jolma na mangalgipi na di liang ndang diboto nasida.
Ndang sadia
leleng, dihilala sahalak sian parmahan i ma, asing panghilalaanna, ponjot
marhosa, gabe didok ma tu donganna: “Songon na asing. Ponjot huhilala
marhosa, na hurang denggan do ra alogo di bagas liang on. Boi tagamon ala ni
alogo na mian di bagas liang on do ra umbahen na gabe mangalgipi halak on di
bagasan liang on, ala hurang denggan tu hosa, ujungna gabe hosahosa nasida (Terganggu
pernafasan)”. Satongkinnari, gabe duansa do nasida songoni. Sungkot jala
ponjot marhosa.
Ujungna, ala
songoni panghilalaan nasida na dua, gabe dihanditi nasida ma angka halak na
mangalgipi na di bagasan liang i tu duru ni liang i. Hira sajom tu dua jom dung
di duru ni liang i nasida, tarida ma adong hamubaon. Adong ma nasida naung
sadar, jala ndang piga lelengnai hipas ma nasida sude. Gabe dipabotohon nasida
ma tu parmahan si 2 halak i, boha parsahat nasida tu baba ni liang i jala sadia
leleng nasida naung maringan di liang i.
- Marojahan
sian ay. 3. “Tagamon ma adong dapot
haporusanta, molo tatoishon haluaon na sai godang i? (Bhs Ind.) Bagaimanakah kita akan luput, jikalau
kita menyia-nyiakan keselamatan yang sebesar itu? Dumenggan do molo
diterjemahkan gabe “Haluaon na balga” dari pada “haluaon
na sai godang”.
1. Boasa
digoari “Haluaon na balga”? Ala haluaon i, dipatupa Debata marhite panobusion
na mansai balga. Debata gabe jolma. Di Johannes 1: 1 Konsep logos, Dungi gabe
daging ma Hata i... Ditobus Debata do jolma sian dosa dohot hamatean marhite na
tuat (Berkenosis) Ibana tu portibi on. Ro Tuhan Debata tu portibi on marhite
AnakNa Tuhan Jesus Kristus pola mate tarsilang holan ala ni pangalaosionta.
Hinorhon ni asi dohot holong ni rohaNa rade Ibana manaon na porsuk, asa marhite
hamamateNa i manghohon hangoluan di saluhut halak na porsea. Halak na
manjangkon hororoNa i gabe haluaon ni saluhut halak na porsea.
2. Boasa
digoari “Haluaon na balga”? Ala haluaon i, patupahon hasesaan ni
dosa na mansai balga. Molo balga dosa na so mungkin do boi bahenon panesa na
metmet tu si. Ingkon panesa na balga do. Hata ni Tuhanta di Jesaya 1:
18 “Dung i sai ro ma hamu, asa mardabudabu hita, ninna Jahowa. Tung sura rara
dosamuna songon abit bunga dapdap, bontar do bahenonku songon itak; nang pe
rara songon abit hasumba, gabe songon hapas do muse”.
3. Boasa
digoari “Haluaon na balga”? Ala haluaon jolma sian dosa dohot
hamatean. Ala ni hadosaon ni jolma, hamatean na ma na gabe jambarna. Alai ala
ni asi dohot holong ni roha ni Debata dilehon Ibana ma AnakNa Tuhan Jesus
Kristus singkat ni jolma tu hamatean, asa gabe malua jolma i
- Sikap ni jolma taringot tu
haluaon na balga i.
Ndang
dijalo/dijangkon haluaon i. 2. Dijalo haluaon i alai ndang dianturehon. Halak
na so manjalo haluaon i dohot halak na manjalo haluaon i alai ndang dianturehon
hona uhum. Didok di turpuk on: “Mangalap pamaloson na hombar”.
Na pasti, halak
na manulak dohot na manoisi Haluaon i, ndang dapotan haluaon na pinatupa ni
Tuhan Debata, ndang malua sian dosa dohot hamatean, gariada ingkon hona uhum
nasida.
- Holan di bagasan Tuhan Jesus do dapot hita haluaon na
balga i. Ro ma hita tu Tuhan Jesus. Tahangoluhon ma Tuhan Jesus. Didok
hata ni Tuhanta di Johannes 14: 6 “Gabe didok Jesus ma tu ibana:
Ahu do dalan i dohot hasintongan dohot hangoluan. Ndang adong na sahat tu
Ama i, ia so marhite sian Ahu”.
- Lam gomos ma tatiop haporseaonta tu Tuhan Jesus
Kristus, ai holan di bagasan Ibana do adong haluaon na taharingkothon i.
Ima halauon ni daging nang tondinta. Lam marsitu jala lam taharingkothon
ma maniop gomos haporseaonta, unang diela jala dibaorhon angka ragam ni
angka haulion ni portibi on hita.
Komentar
Posting Komentar