Epistel tu Minggu XVII Dung Trinitatis, 26 September 2021.
Panguhum/Hakim-hakim
14: 1 – 4
Dongan
sahaporseaon na hinaholongan di bagasan Jesus Kristus….
Si Simson ima sahalak panguhum (hakim) di tongatonga ni
bangso Israel sian marga Dan. Simson lapatanna “istimewa, kuat, matahari kecil”. Natorasna doli margoar si Manoakh (13: 2), jala dainang pangintubuna sahalak na hol.
Si Simson, ima anak na dibagabagahon (dijanjikan) ni Debata marhite
surusuruanNa tu si Manoakh laho paluahon bangso Israel (Bnd.13: 5) naung 40 taon lelengna
diparhatoban (dijajah) halak Palistim, ima taon 1.090 sebelum Masehi (Bnd. 13: 1).
20 taon ma lelengna si Simson gabe Panguhum di Israel (patudos Panguhum 15:11,
1 Sam. 7: 2). Godang do halongangan na
pinapatar ni Debata marhite hagogoon na
pinatupa ni si Simson uju gabe panguhum ibana di Israel, gabe sahalak na dihabiari bangso
Palistim do ibana, alani hagogoonna (Panguhum 14: 6)
Marhite
turpuk on antusanta ma sejarah taringot tu pardalanan ni ngolu si Simson, sada
anak na dipadanhon Debata (Nazar Allah), na dipangke Debata
ngoluna laho pasauthon sangkapNa di ngolu ni bangso Israel. Di turpuk on (14: 1-4) dipangido si Simson do tu
natorasna asa borhat nasida mandapothon sada boruboru halak Palistim di huta
Timna, ala lomo roha ni si Simson borboru i gabe pardihutana. Pangidoan ni si
Simson on mambahen lungun roha ni natorasna, ala dihilala nasida nunga
melanggar aturan dohot hatontuon ni Patik naung ditotophon si Musa taringot tu
parripe (keluarga) ni halak Israel, i ma aturan na mangorai mambuat boru sian
duru ni marga Israel. Alai manggogo do si Simson, asa boruboru ni halak
Palistim i na gabe jolmana (istrina). Di sada sisi, sebagai sahalak Nazir ni
Debata, nunga manimbil si Simson sian patik dohot sian aturan hasomalan, alai
sisi na asing, ima dalan dipangke Debata patulushon sangkapNa laho paluahon
bangsoNa sian gomgoman ni bangso Palistim (14:4). Naeng pangkeon ni Debata do
parsaripeon ni si Simson i laho patuduhon na dibagasan linggoman ni huaso ni
Debata ni Israel do nang bangso Palistin na gumomgom bangso i. Marhite na masa
i ma boi antusanta, bahwa halak naung ditotophon Debata laho mangulahon
parsuruan ni Debata, ingkon saut do tulus, nang pe idaon hira naung manimbil
dalanna. Dalan naung manimbil di pingkiran ni hajolmaon, i do dipangke Debata
marhite parripe (keluarga) ni si Simson.
Jotjot ndang terjangkau ni pingkiranta dalan dohot sangkap ni Debata. Didok
di ayat 4 i, Alai ndang diboto natorasna,
tung sian Jahowa do i, ai mangalului parbonsiran do ibana dompak halak
Palistim, ai tongon digomgom halak Palistim do halak Israel tingki i. I do unok (inti) ni turpukta on. Marhite hata
on ditogihon do hita tu pangantusion “Na tuk do Debata mamangke” sangkap-sangkap ni si Simson na
mangalului parbonsiran dompak halak Palistim,
tung pe hira ndang uli di ruhutruhut di hajolmaon, alai laos marhite i
do Debata laho pasauthon sangkapNa, asa tung patar huasoNa di tongatonga ni
bangso Israel. Dipangke Debata do si Simson marhite dalan na maralo tu
hasomalan ni parmargaonnasida, gabe sada cara na homi jala misteri laho
pasauthon haluaon di bangsoNa. Diparade Debata di si Simson: tagas - nafsu,
hasrat, keinginan, gabe dasor manang alasan ni parbadaanna tu bangso Palistim. Boi do tapatudos na masa on tu barita taringot parripe
(keluarga) ni si Jakob. Berencana do angka anak ni si Jakkob, haha ni si Josep,
laho mamunu si Josep ala sogo rohanasida marnida angginasida i. Alai gabe i do
dalanna dipangke Debata laho patulushon sangkapNa, marhite na targadis si Josep
tu Misir. Ujungna gabe jolma na tarpasupasu do si Josep di Misir, jala laos
ibana do muse mangurupi natorasna dohot angka hahana, pinompar ni si Jakkob.
Di epistel partangiangan on pe (Pilemon 1: 8-17) tangkas do idaonta songon dia angka parripe
na so uli hian, gabe dipangke Debata marhite apostel Paulus laho pasauthon
hararat ni Barita Nauli i. Dielek apostel Paulus do si Pilemon asa rade si
Pilemon manjangkon si Onesimus, atik pe uju i na so marguna hian si Onesimus diadopan
ni si Pilemon do hot diadoan ni si Paulus. Alai di partingkian na mardalan i,
boi masa do perubahan tu na dumenggan, ala sangkap ni Debata na ingkon tulus.
Gabe masijangkonan do angka na porsea i songon sada parripe, parhitean ni
Debata papatarhon sangkap haluaon di hita jolma. Gabe angka parripe ni Tuhanta
do hita marhite huhut dibagasan huriaNa laho patulushon harajaon ni Debata di
portibi on.
Sada na mansai longang roha, tangkas do didok: "
tung Sian Jahowa do i." Gabe hira
na pasintonghon perkawinan beda agama idaon sambolus, hape tatulak do
parsaripeon na songon i sahat ro di ombas on. Alani ingkon manat do halak
Kristen mangalapati ayat i. Alai na naeng gomos tioponta, i ma sangkap ni
Debata do na ingkon saut di parsaripeon ni halak Kristen. I do umbahen na
mangolu jala mangula hata ni Debata di ganup angka jolma na tinompaNa. Nang pe
idaon songon naung sange angka na masa di portibion binahen ni dosa, dohot pangulaon
ni jolma na so saurdot be tu Hata ni Debata, alai sasintongna nunga mangula Debata
marhite angka na masa i. Denggan pe na masa i, manang na so denggan pe i,
mangula do Debata dibagasan i. Songon halak na porsea, parsidohot do
keluarganta laho patulushon ulaon haluaon naung pinatupa ni Debata marhite
Jesus Kristus. Gabe parripe ni Tuhanta ma hita, na sai tongtong satia jala
marsihohot tu Ibana. Tongtong ma tabahen Debata pangusandeanta, jala tapelehon
ma dirinta pasauthon lomo ni rohaNa. Amen.
Komentar
Posting Komentar