Jamita Minggu, XVI Dung Trinitatis.
Minggu, 19 September 2021.
Parjamita 10: 10 – 15
Dongan
sahaporseaon na hinaholongan di bagasan Jesus Kristus Tuhanta i...
Unang Didadang Ari, Jala
Unang Ditinggang Udan.
Ima
poda ni sahalak natuatua tu ianakkonna.
Na so pamotoan ni inantana,
hea do dipodai sahalak ama naung matua ianakkonasida. Holan dua do anaknasida,
baoa duansa jala nunga tammat sian sikolana Lanjutan Tingkat Atas.
Didok amanta i ma mamodai
inakkonna. “Di hamu anakku na dua, holan hamu na dua do poang pomparanku. Ala
ni i, unang ma adong tubu di hamu parbolatbolatan na manghorhon hancit ni roha.
Tongtong ma hamu mardenggandenggan, marsianjuanjuan ma hamu jala marsiurupan
sahat tu na marruma tangga haduan sahat ro di tu angka pinomparmuna. Molo ahu do
dohot omakmu nunga dipasupasu Tuhan Debata, marhite ulaonku siganup ari suang
songoni nang marhite keluarga ala nunga dipalumehon Tuhan Debata anak tu ahu,
ima hamu na dua. Asa gabe jolma na hasea hamu boi denggan ngolumuna dohot ngolu
ni pinomparmuna sogot, ingkon tangihononmuna jala radotanmuna do podangkon”.
Ala ni i, on ma poda na
mansai ringkot sidohonku tu hamu anakku jala ingkon ulahononmuna:
Na parjolo: “Unang hamu
martunggu tu manang ise pe”.
Paduahon: “Unang hamu olo
didadang ari jala ditinggang udan”. I ma poda ni sahalak ama na pinodahonna tu
anakna. Dungi dilehon amanta i ma hepeng dohot sada be kareta/sepeda motor gabe
modalnasida.
Marsitutu do nasida na
dua laho mameop, mangalapati dohot mangulahon poda na pinasahat ni natorasnasida
i. Anak siangkangan gabe parkoperasi, jala anak siampudan marjualan di pajak. Di
laonlaon ni ari, tolu (3) taon dung dijalo angka ianakkon ni amanta i poda i,
aha ma na masa?
Tangkas ma tapaihutihut
adegan selanjutna.
Kondisi ni anakna
siangkangan gabe puhe alias tumpur. Tarbortik ma tu omakna, naung songoni
keadaan ni anakna siangkangan i. Marsak situtu do roha ni inanta i, alai ndang
tardokna be manang aha. Dungi disungkun omakna i ma: “E... anaha... buha
bajuku... anak panggoaranku... boasa songoni parngoluanmu, boasa hancur
bisnismu naung sanga denggan hian. Aha do ulaning na masa tu ho?”.
Dialusi anakna
siangkangan i ma: “Na huihuthon do poda ni bapa, oma. Diorai do ahu
martunggu tu halak. Molo ro halak maminjam hepeng tu ahu... ba.. hulean,
hape ndang pola olo ahu martunggu marningot poda ni bapa i.
Alani i, lam leleng lam
habis ma modalhu. Gabe hancur jala tumpur ma ahu nuaeng”.
“Dungi, diorai bapa do ahu ditinggang udan
jala didadang las ni ari. Hape holan karetaku (Sepeda motor) do na adong,
ala ni i naik Taxi ma ahu tu kantor dohot mulak sian kantor tu jabu ganup ari,
asa unang ditinggang udan didadang las ni ari ahu”. Ninna anakna siangkangan i
mangalusi omakna i.
Dungi didapothon inanta i
ma anakna sianggian i, na mansai marasing keadaanna. Dipangkulingi inanta i ma
anakna Siampudan i di bagasan las ni roha:
“E.... ho anakku
Siampudan. Godang hian do huroa nasibmu dohot labam na mangolu on ate. Songon
dia do poang dibahen ho carana jala aha do rahasiana?”.
Dungi dialusi anakna
siampudan i ma, omakna i: “Omakkon nian...”, ninna huhut dihaol omakna i.
“Ai na huihuthon do poda
ni bapa. Parjolo, diorai bapa do ahu martunggu manang tu ise pe. Ala ni
i, ndang hea ahu papinjamhon hepeng manang tu ise pe, alai molo adong halak ro maminjam
hepeng tu ahu ndang hulehon i sebagai pinjaman, alai hulehon ma pangurupionku saotik
tu ibana songon tanda ni asi rohaku tu ibana. Ala ni i do ra umbahen na gabe
tarpasupasu ahu marhite angka ulaonku siganup ari.
Paduahon, diorai bapa
do ahu, asa unang ditinggang udan jala unang didadang las ni ari. Hape
holan kareta do na adong di ahu. Ala ni i, tibu do ahu dungo manogotna,
martangiang ahu pasahathon ngoluku nang ulaonku tu Tuhan i, dungi pe asa borhat
ahu sian jabu tu pasar/pajak ingananku marjualan. Jala dung pe botari, asa
hututup ingananku marjualan i. Jadi, saluhut do angka langgananku di pasar
umbotosa, ahu do parjolo marbuka jala ahu do parpudi martutup, gabe totop ma
halak ro manuhor situhoronna tu ahu”, ninna anakna siampudan mangalusi omanakna
i.
Ha.... Taparrohahon... Ise do sian nasida na
dua na mangolu di bagasan panogunoguon ni Debata? Ise do sian nasida na dua na
mangolu di bagasan hapistaran? Alusna, anak siampudan.
Anak siangkangan dohot anak siampudan rap tumangihon jala rap manjalo poda sian
natuatuana, alai ndang sarupa pangantusionnasida taringot tu poda na nilehon ni
natuatuanasida i.
Ndang sarupa cara
marpikir manang mindset nasida na dua na tumangihon jala manjalo poda i. Ala ni
i ingkon manat jala marbisuk do hita laho manjalo dohot mangalapati angka poda
na tajalo sian angka natuatuanta tarlumobi sian hata ni Tuhanta i. Asa unang
sala mangantusi hita.
Halak na marpikir positif
parohon las ni roha songon anak siampudan i. Jala halak na marpikir negatif
parohon hamaolon songon anak siangkangan i.
Dongan sahaporsean na hinaholongan
di bagasan Jesus Kristus Tuhanta i...
Di bagasan turpuk on, jumpang hita do dua rumang ni
ngolu ni jolma. Halak na mangolu di bagasan hapistaran dohot halak na
mangolu di bagasan haotoon. Jala toboto songon dia pardalanan dohot
ujung ni pardalanan ni ngolunasida. Hata ni Tuhanta na
tarsurat di Poda 23: 23 mandok: “Tuhori ma hasintongan, jala unang gadishon
nang hapistaran, pangajaran dohot roha hapantason”. Hata Tuhori..., marlapatan do i, mangalului, manjalahi
marhite ragam ni pambahenan bahkan marhite hepeng. Timbalah ilmu setinggi
langit dengan takut akan Tuhan. Belajar itu, tidak ada batas umur. Mangalului
parbinotoan dohot hapistaran na sian Tuhan Debata sahat ro di ujung ni ngolunta
dalan laho padengganhon ngolunta siganup ari do i termasuk dalam hal
kesejahteraan. Halak na mangolu di bagasan panogunoguon ni Debata ingkon
mangalului jala mangharingkothon hapistaran di ngoluna. Hapistaran manang
hikmat bahasa Indonesia. Di hata Heber: khokhma. Di hata Junani: sofia, lapatanna kebijaksanaan. Ngolu na marhapistaran ndada
holan patuduhon pola tatanan ngolu ni halak na porsea sambing, alai
dohot do menyangkut tu skills of living manang habisuhon mandalani dohot
mangadopi pardalanan ni ngolu na pinasahat ni Debata tu hita. Ingkon marhapistaran
mangadopi parsorion ni ngolu lumobi mambuat sada haputusan na dumenggan hombar
tu lomo ni roha ni Tuhan Debata. Hapistaran ndang ro songoni tu hadirion ni
jolma, alai na marharoroan sian Debata Jahowa mual ni hapistaran i do i, maringan
jala mangula di roha ni halak na olo mangalului hapistaran di bagasan roha
hapantason sian Debata.
Halak na so manghangoluhon jala ndang mardalan di
bagasan hapistaran na sian Tuhan Debata gabe hangaluton manang hamaolon dohot
halojaon sandiri do na masa di bagasan ngoluna. Harugian do i tu dirina sandiri
nang tu angka halak na asing na adong di humaliangna. Ala ni i, mansai denggan situtu
do saluhut jolma ingkon mangalului hapistaran jala mambahen hapistaran na sian
Tuhan Debata gabe ojahan ni ngoluna. Marhite hata ni Debata na tajahai ganup
ari sian Buku Na Badia i, lumobi sain turpuk jamita sadari on, diajari do hita
mangalului hasintongan i, disuru do manuhori hasintongan, hapistaran,
pangajaran dohot roha hapantason. Ai i do mangarahon dohot mangajari hita gabe
marparange na denggan hombar tu lomo ni roha ni Debata. Gabe antusanta ma, botoonta
ma, dia angka parange na ture na ingkon
sihangoluhononta, jala dia ma angka sipasidingonta di ngolunta on. Asa marhite
i taharingkothon parsaoran na hombar tu lomoNa, jala asa unang masa patubu
parsalisian na mambahen marsiancitan roha.
Dongan sahaporsean na hinaholongan
di bagasan Jesus Kristus Tuhanta i...
Somalna, haotoon masa di hadirion ni sasahalak, ala ndang olo
marsiajar jala ndang olo manjalahi hapistaran sian Tuhan Debata. Gabe monongtong
do maringan haotoon i di sasahalak, molo mangarajumi dirina na jumago, na humebat
sian angka donganna na asing. Ndang olo mangakui halobian ni angka donganna
jala ndang olo mangakui hahuranganna. Biasana halak na songoni madabu tu sifat negative
thinking, ndang olo berpikir positif. Halak na oto, wawasanna ndang bidang.
Di bagasan panghataion pe, cenderung madabu tu roha na pangarimason. Karakter
ni halak na oto do molo manghatai muramura muruk, ala ndang mian di ibana hapistaran
na sian Tuhan Debata. Halak na oto, somalna neangneang mandok hatana so jolo
dipikiri. Panghataion ni halak na oto, gabe patubuhon hansit ni roha jala olo
patubu parbadaan. Gariada hubungan pardonganon naung denggan hian pe di mulana
i olo do sega binahan ni angka halak na oto. Alai hata ni angka na pistar i
dihalomohon amana, inana nang torop halak na umbegesa, ala hata hangoluan na
hinatahonna jala mangolu ibana di bagasan hapistaran na sian Tuhan Debata.
Di bagasan turpuk on, dijou jala diarahon do hita asa mangolu jala
marparange di bagasan hapistaran na sian Debata, hombar tu topik ni minggunta
sadari on: Ngolu Di Bagasan Panogunoguon ni Debata. Holan halak
na mangolu di bagasan panogunoguon ni Debata do halak na olo mangalului jala
manuhori hapistaran sian Ibana mual ni nasa parbinotoan dohot hapistaran i. Holan
halak na mangolu di bagasan panogunoguon ni Debata do halak na olo mangolu jala
marparange di bagasan hapistaran na sian Debata. Persoalanna, songon dia do
carana mangolu di bagasan panogunoguon ni Debata?. Pasomalsomal dirim mangulahon
hadaulaton (1 Timoteus 4: 7b). Mambahen hasomalan mangulahon ulaon
hadaulaton manang angka na denggan ndada mamungka nuaeng. Alai mamungka sian sihadakdanakon,
maniru Tuhan pambahenan ni Tuhan Jesus. Uju marumur sampulu dua taon dope Tuhan
Jesus nunga diarahon natorasna Ibana angka ulaon dohot parange na denggan. Nuaeng
pe, dipasunggulhon turpuk jamita on do tu hita saluhutna, tarlumobi tu angka
natoras, ingkon tangkas do togutoguonta saluhut angka dakdanak na pinalumehon
ni Debata tu tongatonga ni keluarga ganup asa magodang nasida di bagasaon hapistaran
na sian Tuha Debata, asa gabe pangoloi tu natoras jala gabe halomoan ni Debata
dohot jolma nasida (Luk. 2: 51 - 52). Amen.
Kunjungi juga di Channesl Youtube saya: https://youtu.be/ySsZvfSO2qQ
Komentar
Posting Komentar