Markus 8: 31 – 38

(MARHABISUHON DI BAGASAN JESUS).

 

Dongan sahaporseaon na hinaholongan di bagasan Jessus Kristus Tuhanta i...
            Dung tabege turpuk jamita on, boi do tubu sungkunsungkun di bagasan rohanta: ”Molo mangihuthon Tuhan Jesus, situtu do ingkon marsitaonon,  ndang holan angka las ni roha hape?”. Molo ingkon marsitaonon do mangihuthon Tuhan Jesus, pasti do dohononta ”Borat do hape ate, tolap niba do i?”.  Gabe halak siihuthon Tuhan Jesus ndang tarsirang ngoluna sian ngolu marsitaonon ala na taihuthon i pe, ima Tuhan Jesus marsitaonon do uju di portibi on. Gabe halak siihuthon Tuhan Jesus ndang tarsirang ngoluna sian ngolu parungkilon ala Tuhan Jesus pe marungkil do ro tu portibi on laho paluahon hita sian dosa dohot hamatean. Torop do angka halak Kristen di partingkian si nuaeng on, ndang be rade mangadpi sitaonon manang parungkilon, alai sai holan mangigil pasupasu sian Tuhan i. Ngolu na sisongoni di goari ma i, holan sitau. Lapatanna, holan na ringkot di ibana do disarihon alai ndang rade mangadopi sitaonon parungkilon songon na ni adopan ni Tuhan Jesus na taihuthon i. Marhite turpuk jamita on dipatuduhon do hadirion ni halak na olo jala rade mangihuthon Tuhan Jesus:  1. Mansoadahon Diri. 2. Manuhuk Silang. 3. Agoan Hosa.

Manang ise na mangihuthon Tuhan Jesus, ingkon olo jala rade “Mansoadahon Dirina”

            Mansoadahon diri. Hata on, mandok alai maol di pambahenan, ala maralo tu roha pardangingon. Ala ingkon mangulahon sumeahon diri manang “pengorbanan”.  Contoh: Oloanku ma diringku aturon ni i, hape halak na marpangkat do ahu, ala pejabat ibana.  Nda ingkon hormat ma nian ibana tu ahu jala ingkon pasangaponna ahu, ala pejabat negara ahu? Laos ibana ma manuru ahu, hape namora do ahu? Molo so ala ni ahu dohot angka gagasanku ndatung na tulus pembangunan i. Nda ingkon au ma na raja sisungkunon, jala paniroi nian? Gabe parhobasna ma ahu marhite kepanitiaan on, nda ingkon ibana do na manghobasi ahu? Angka roha sisongoni i do na mambahen maol jolma i laho masoadohon dirina. Ido na didok di ayat 36, Ai aha ma antong gunana di jolma, nang liat portibi on diomo, anggo mago do hosana? Tolap pe sasahalak laho manuhor ubat na arga, alai anggo hahipason sian Debata do. Tolap pe sasahalak manuhor podoman na empuk, springbad, alai mambahen sonang modom sian Debata do. Tolap pe sasahalak manuhor bagas na marmengomengo, ala las ni roha sian Debata do. Marhite i, nangetnanget akuanta ma: Ndang adong hape naggo saotik huasonku, ndang adong hape na boi sipangasahononku. Saluhutna na hudai di ngolunku, holan asi ni roha ni Debata Jahowa do hape. Ndang adong alasan ni jolmai laho marginjang ni roha.  Alai ala haulion dohot pangela ni portibi on, torop do jolma na mangulahon na maralo tu Hakristenon, ala pangkat, jabatan, hamoraon, na so boi manahan mangadopi hamaolon manang parungkilon. Ala ni pangkat, jabatan dohot hamoraon olo manggadis haporseonna, on do na nidokna paluohon hosana, hape gabe agoan hosa (ayat 35). Nunga dipalua Debata marhite Tuhan Jesus saluhut jolma i sian dosa, hape ditinggalhon do Haluon i. Angka amang, inang songoni nang naposobulung pe, mansoadahon diri, ingkon pamatehon roha daging jala rade mangolu jala mangula hombar tu lomo ni Tuhan Jesus. Jesus Kristus do na gabe tiruan di hita. Ai disoadahon do diriNa. Dirumari do dirina jala disolukkon rupa ni hatoban, gabe suman tu jolma do Ibana jala rumang jolma dapot di Ibana. Dipatutoru do dirina; na gabe pangoloi do Ibana paima mate, pola tung mate tarsilang! (Pilipi 2: 7 – 8). Saluhut huaso, hagogoon dohot hasangaponNa ditadingkon do i di harajaon ni Debata AmaNa i, tuat do Ibana sian surgo jala mebat tu hita jolma on, asa anggiat malua hita sian dosa dohot hamatean jala hangoluan na so ra suda dipartumpalhon tu saluhut halak na porsea.

Dongan sahaporseaon na hinaholongan di bagasan Jessus Kristus Tuhanta i...

Manang ise na mangihuthon Tuhan Jesus, ingkon olo jala rade “Manuhuk Silang”.

Ndada silang secara fisik na ni dokna di son. Lapatan ni Silang, ima angka hamaolon, sitaonon, parungkilon na masa ala ni na mangihuthon Tuhan Jesus. Termasuk do gabe sisogo do halak ala ni na mangulahon na tingkos. On ma gabe resiko ni halak na olo unduk tu parsuruon ni Tuhan Jesus.  Ndang sude sitaonon i, digoari manuhuk silang. Molo ala ni panghataion na so boi dirajai do dohot pangalaho na so ture gabe targsip targasip manang ditorui halak hita, ndang i na gabe silang dihita, uhuman do i ala ni angka parange na so denggan. Alai molo tapasingot donganta asa marhamubaoan sian pambehanan na so ture, gabe dipaholang dohot diparoaroa hita, termasuk do i na manuhuk silang. Isarana molo adong sada parjahat, ditandinghon hajahaton i, diulahon na denggan tanda ni hamubaon ni rohana, ndang sai sude marlas ni roha, tong adong na mangarehei, ala nunga moru donganna, adong na paburukburukhon, bahkan angka naung mangaku Kristen. On ma na  na ginoaranna manuhuk Silang. Molo adong sian tongatonga ni halak parugamo na asing olo ibana gabe mangihuthon Tuhan Jesus jala tardidi ibana, hape holan sahalakna do olo gabe halak Kristen. Gabe sisogo ma ibana, gariada olo diburai alana asing sahalakna di tongatonga ni keluargana, uju dileai jala hona bura ibana, nda sitaonon dohot parungkilon do na ampe tu ibana?. Sitaonon sisongoni ma na ginoaranna manuhuk Silang, dohot angka na asing. Ndang ulaon na mura mangadopi burabura dohot insakhinsak ala mangulahon hatigoran dohot hasintongan. Ala ni boratna torop do halak ndang olo mangulahonsa.  Memang, marasing be do silang na dipaporsahon tu hita ganup, hombar tu panjouon na tu hita be. Laho manuhuk silang na dipaporsanhon, mansai ringkot situtu panandaon na tangkas dohot hasatiaon haporseaon tu Tuhan Jesus dohot hasatiaon mangulahon lomo ni roha ni Debata Jahowa.

Dongan sahaporseaon na hinaholongan di bagasan Jessus Kristus Tuhanta i...

Manang ise na mangihuthon Tuhan Jesus, ingkon olo jala rade “Agoan Hosa”.

Tung so adong do jolma na boi jala tuk paluahon dirina sian hamagoan, i do umbahen na ro do Tuhan Jesus tu portibi on laho paluahon saluhut hajolmaon sian dosa dohot hamatean, asa hangoluan na saleleng ni lelengna jambar ni saluhut na porsea di Ibana. I do umbahen didok Tuhan Jesus di turpuk on, ayat 36: ”Ai aha ma antong gunana di jolma, nang liat portibi on diomo, anggo mago do hosana?”. Aha ma sipatupaon ni jolma i bahen tobus ni tondina?” Ndang adong nanggo aha pe. Tung sadia godang pe arta na niomo ni jolma di portibi on,  ndang tuk i mangalehon dalan haluaon dohot tobus ni tondina. Tondi na nidokna di son ima hatongtongon, jadi ndang dibatasi hamatean sambing. Ala ni  i ndang adong na boi manggantihon haluaon ni ngolu marhite manang aha pe sian na adong di portibi on, holan di bagasan Tuhan Jesus do dapot hita i. Mansai tangkas do taboto jala tahaporseai, Tuhan Debata do silehon hosa hangoluan tu saluhut jolma nang tu nasa na mangolu. Molo didok, manang ise na mangihuthon Tuhan Jesus, ingkon olo jala rade “Agoan Hosa”, ndang na mandok na so diargahon hosa hangoluanna, alai barani menanggung resiko. Aha pe na masa ala ni na mangihuthon Tuhan Jesus ingkon rade do hita mangadopi i. Molo mangihuthon Tuhan Jesus, unang gabe sidalian: “Mabiar mate, astuanna agoan hosa”.  Molo tung pe ingkon mangadopi hamatean ala ni na mangihuthon Tuhan Jesus, ala ni mambaritahon Barita Nauli, ala ni manghatindanghon na tingkos ala ni Tuhan Jesus di bagasan ngoluna i do naung paluahon hosana. Lapatanna, molo agoan hosa pe sasahalak di portibi on,  ala mangihuthon Tuhan Jesus jala ni manghatindanghon na tingkos hombar tu lomo ni roha ni Tuhan Debata, alai nunga malua tondina jala bongot tu hangoluan na so ra suda. Jala i do na niulahon angka halak mangihuthon Tuhan Jesus na parjolo i, jala sahalak “Bapa Gereja mula-mula”, margoar Tertullianus  mandok: “Mudar ni na mate martir do boni ni huria”.

            Dongan sahaporseaon na hinaholongan di bagasan Jessus Kristus Tuhanta i...

Topik ni minggunta sadari on mandok: Marhabisuhon Di Bagasan Jesus. Dia do lapatan ni i? Di na hinatahon ni Tuhan Jesus taringot tu sitaononna di ayat 31 i: “Ia anak ni jolma i ingkon godang do sitaononna, ingkon bolongkonon ni angka sintua dohot malim dohot sibotosurat do ibana, laos pusaonna do; dung i mulak mangolu do di ari patoluhon”. Di ayat 32, didok: Alai diarahon si Petrus ma Ibana, disolsoli ma Ibana. Tumangkas boi taantusi ayat 32 on di Bahasa Indonesia: “Tetapi Petrus menarik Yesus ke samping dan menegor Dia”. Si Petrus menegor manang paingothon Tuhan Jesus. Di ayat 33 dipinsang Tuhan Jesus ma si Petrus/Ia memarahi Petrus: “Laho ma ne ho, bolis, sian lambungkon; ai ndang na diparrohahon ho na di Debata, angka na di jolma do”. Ndada si Petrus na nidokna sibolis i, alai parrohaon ni si Petrus nunga disonggopi sibolis, ala na pingkiran dohot na sinangkapan ni si Pertus hombar tu lomo ni roha ni jolma do, ndang hombar tu lomo ni roha ni Debata. Jolma i gabe sibolison, hape sibolis ndang hea gabe jolmaon. Tahutan mida bohi dohot mida rupa do si Petrus. Nang pe torop di si angka sintua dohot malim dohot sibotosurat, alai ndang mambuat roha ni na torop i Tuhan Jesus, alai mamparrohahon dohot mangulahon lomo ni roha ni Tuhan Debata. I do habisuhon i. Laos i do na niigil ni Tuhan Debata sian ngolu ni ganup halak na mangihuthon Tuhan Jesus, ingkon MARHABISUHON DI BAGASAN JESUS. Taparrohahon jala taulahon ma lomo ni roha ni Debata di bagasan ngolunta mangihuthon pambahenan ni Tuhan Jesus naung patuduhon tiruan di hita. Unang mabiar hita manghatindanghon na hasintongan,  nang di jolo ni torop halak, nang pe di adopan ni angka na so sa sahaporseaon dohot hita. Adong do hata Batak mandok: Sai nirimpu parhunikan hape pargadongan, sai nirimpu parsaulian hape hamagoan. Pandohan on pataridahon sikap na  tarhirim ala sala prediksi di angka parbue na naeng sijaloonna manang sitapuonna sian angka na niulana. Hombar tu pandohan i ma dipaingot turpuk on hita asa marhabisuhon di bagasan Jesus laho mambahen ojahan ni ngolunta. Torop do halak naung mambahen ngoluna marojahan tu angka hamoraon na di portibi on, isara ni arta, pangkat, sinamot, parbinotoan dohot na asing. Marhite turpuk jamita on, dipaingot ma hita asa tabahen holan Tuhan Jesus na gabe ojahan ni ngolunta. Olo jala rade ma hita mangihuthon Tuhan Jesus saleleng mangolu hita. Molo Tuhan Jesus do tabahen na gabe ojahan ni ngolunta, lomo ma roha ni Tuhan Debata mida hita. Lehonon ni Tuhan Debata angka na taharingkothon di bagasan ngolunta on jala ihut tu si lehonon ni Tuhan Debata ma tu hita tumpal hangoluan na so ra suda marhite AnakNa Tuhan Jesus Kristus, Sipalua i. Amen.  

 

                                                                                                                           Pdt. Ahab Tambun, S. Th.