Jamita Partangiangan  Lukas 2: 41 – 52

Dongan sahaporseaon na hinaholongan di bagasan Jesus Kristus Tuhanta i...

      Didok angka na bisuk, tingki metmet do hau i boi sihorsihoran. Lapatanna, tingki metmet do hau boi dipature manang ditata. Na bengkok hian boi dipatigor, na tigor boi dipabengkok hombar tu selera ni nampunasa hau i. Molo dung balga hau i nunga maol pabengkokon, bahkan mungkin ndang tarpabengkok be, gabe olo na ma masuak hau i. Tudos tu songoni do nang panogunoguon ni angka natoras tu ianakkonna, panogunoguon ni angka natuatua tu angka sundut na umposo, ingkon sian sieteketekonna do pasomalsomalon angka dakdanak i jonok tu Tuhan Debata marhite Huria i. I do na pinatupa ni si Josep dohot si Maria sebagai natoras manogihon Jesus marpesta Paska tu Jerusalem. Marumur 12 taon ma Jesus uju i di na tinogihon ni natorasNa Ibana mamestahon pesta Paska na bolon i. Mansai las do roha ni Jesus mandohoti pesta Paska i, jala dilehon do rohaNa manangihon angka guru na mangajari di bagas joro huhut manungkunnungkun hatiha i (ay. 46 - 47). Sian panghataion na jumpang di bagas joro i tangkas do  dipatuduhon Jesus na so holan hasomalan sambing pesta Paska i, alai dalan ni Debata do i pasauthon haluaon ni bangsoNa.  Pola tarhalomong be do angka guru pangajari di bagas joro i manangihon alus ni Jesus i, lumobi marningot umurNa na mansai poso situtu dope. Hombar tu si, mansai denggan ma angka natoras, songoni nang Huria ingkon tangkas manogunogu angka sundut na umposo sian sietehetehonna. Asa molo naeng magodang di bagasan panogunoguon hombar tu lomo ni roha ni Debata angka ianakhonta i tasosoi ma asa ringgas ianakkonta i mandohoti ulaon di huria, marsikola Minggu, marguru manghatindanghon haporseaon dohot mangihuthon partangiangan kategorial (PHD) Naposobulung na pinatupa ni Huria i.

         

Marhite turpuk jamita on dipasunggulhon do nang tanggungjawab ni natoras manjamothon asa unang marmara angka dakdanak di angka parmeaman nang pardalanannasida. Pola sadari manipat si Josep dohot si Maria mandiori Jesus tu bagas ni angka tondong dohot donganna, atik beha gabe diihuthon nasida, ndang diboto dalan mulak tu jabu. Hape ndang dapotnasida Ibana di angka bagas ni sisolhot na jinampangan nasida i. Gabe diulakhon nasida ma mulak tu Jerusalem mardalan laho mandiori Jesus, hape tongon ma tutu di bagasan joro ni Debata do Jesus i manangihon angka guru na mangajari di joro i. Alani loja ni si Josep dohot si Maria mardalan pola tolu ari, didok ma tu Jesus: "Boasa dibahen Ho songon i tu hami, anaha? Bernit do huahap hami dohot amangmu mangalului Ho" (ayat 48). Loja do tutu inongna dohot amongna mandiori Jesus pola tolu ari mardalan, tontu gabe lola ma nang angka ulaon. Alai di si ma tangkas diondolhon hinaringkot ni parhorasan (keselamatan) ni angka dakdanak, asa unang marmara nasida. Tanggungjawab ni natoras do mamastihon hahipason dohot hangoluan ni angka dakdanak, ndang jadi tuganon pangurupi manang halak na asing marorot angka ianakhonta i. Manang ndang jadi pasombuon holan pangurupi laho mangarorot angka ianakkonta i. Ummarga do hosa ni angka dakdanak i sian sude arta dohot ulaon ni natoras. Mansai ampit ma i tu sintasinta ni halak Batak na mandok: "Anakhonhi do hamoran di au...".

 

Dongan sahaporseaon na hinaholongan di bagasan Jesus Kristus Tuhanta i...

Dipasunggulhon turpuk jamita on do tu hita saluhutna marhite Huria i, tarlumobi angka natoras, paboa ingkon tangkas do togutoguon angka dakdanak na pinalumehon ni Debata tu ganup keluarga asa magodang di bagasaon hahipason, gabe pangoloi di natorasna, jala gabe halomoan ni Debata dohot jolma nasida (ayat 51 - 52). Asa molo dipalumehon Debata angka dakdanak di tonga ni keluarga nang di Huria, naeng ma tangkas panogunoguonta tu nasida  asa terlatih angka dakdanak i mananda parngoluon na hinalomohon ni Debata di tongatonga ni masyarakat nang portibi on. Sian sietehetehon ni dakdanak i ingkon diboto na ringkot do Ibana mangulahon lomo ni roha ni Debata dohot dongan jolma. Ingkon loja do natoras jala marhui asa tung jumpang kesadaran ni dakdanak i, na adong do tanggungjawab sosial dohot partondion na ingkon suan dibagasan hadirion ni dakdanak i. Songon alus ni Jesus tu inana, mandok: "Biasa pola luluanmuna Ahu? Ndang diboto hamu, na patut Ahu di bagasan bagas ni Damang?" (Ayat 49).  Pandohan i ma na patuduhon nang pe 12 taon dope umur ni Jesus, alai nunga tangkas ditanda jala diantusi taringot tu hak dohot tanggungjawabna di tonga ni keluarga dohot di harajaon ni Debata. Aha ma tagamon sipatupaon ni ama dohot ina di partingkian on asa jumpang  ianakkon na mandiri jala bertanggungjawab? Boha do molo sai palobihu biar ni natoras maradophon ianakkonna pola ndang adong tingki ni dakdanak i marsosialisasi/marsaor dohot lingkungan na humaliangna nang di Huria? Manang sabalikna, ma bebashu do marsaor angka ianakkonta i tu ragam ni parsaoran, lumobi marhite media sosial dohot internet? Ingkon marroha ma natoras manjamothon panghorhon na humurang ala ni hamajuon ni zaman dohot parsaoran na so terbatas be partingkian on. Asa tongtong tapaihutihut jala tapaholang parsaoran nasida sian nasa ragam ni parmaraan na mungkin ni adopan nasida. Tuhanta ma na mamasumasu sude pangajarion dohot panogunoguon ni angka natoras, Huria, angka guru dohot angka natuatua di angka sundut na umposo, asa gabe halomoan ni Debata dohot jolma angka ianakkonta i. Amen.