Poda 1: 29 – 33. Minggu XV Dung Trinitatis, 15 September 2021.

      Dongan sahaporseaon di bagasan Jesus Kristus Tuhanta i...

Poda i ma angka hata sipaingot na gabe bohal laho mangadopi ngolu si ganup ari. Molo adong na mamodai tontu ingkon adong do sipodaon. Tanggung jawab ni angka natoras do laho mamodai angka ianakkonna. Ingkon silehon poda do angka natoras tu angka inakkonna. Ingkon silehon poda do angka guru tu angka siseanna. Ingkon silehon poda angka parhalado tu angka ruas ni huria. Ingkon silehon poda angka sihahaan tu sianggian. Ingkon gabe panguhalan poda do angka natuatua tu saluhut angka sundut na umposo. Denggan do molo dipatolhas angka poda i di bagasan panghataion na lambok, unang di bagasan muruk. Sasintongna, andorang so ro dope hakristenon di tongatonga ni halak Batak nunga dihangoluhon jala diharingkothon angka natuatua laho mamodai angka ianakkonna, ala dirajumi angka natuatua i do, poda na nilehonna, i do gabe bohal di ngoluna laho mandalani parngoluonna siganup ari. Sada sian umpama ni halak batak taringot tu parngoluan didok: “Pantun do hangoluan, jala tois do hamagoan”. Na so mungkin do boi pantun marpangalaho sasahalak i molo so tangkas pamodaion ni natorasna tu ibana. Molo pantun do angka ianakkonna i marpangalaho maradophon saluhut halak parbue ni pamodaion ni natorasna do i, jala tagamon do denggan ngolu ni i. Alai molo tois do marpangalaho hamagoan ma na gabe jambarna.

Hagogoon ni sada poda tergantung tu hadirion ni silehon poda i do. Kekuatan suatu nasehat, tergantung kepada kepribadian si pemberi nasehat. Contoh: Sahalak ama molo mamodai ianakkonna remaja asa unang marisap, alai molo diida angka ianakkonna i do natorasna i marisap jala martimpul timus ni sigaret i, ndang olo so. Hurang marhagogoon do poda na nilehonna i. Garida tagamonta do dohononna tu hita: “Pa so ma hatahatami bapa,ho pe martimus do torus songon kreta api”, ninna. Molo sahalak ama mamodai ianakonna asa unang marjuji, alai molo diida inakkonna i do natorasna i marjuji, hurang marhagogoon do poda na nilehonna i, gariada tagamonta do dohononna tu hita: “Hope parjuji paos do bapa, rap pahabishon ma hita. Di si parhabisna, di si ma hita so”, ninna.  Ala ni i saluhut halak sipamodai ingkon jumolo pajongjong dirina gabe tiruan. “Sandok pajongjong dirim tiruan di angka ulaon na denggan, polin di pangajarion, marhatomanon”, (Titus 2: 7).

Buku Poda on, marisihon angka poda na marharoroan sian angka pengalaman parngoluan ni Raja Salomo. Mansai tarbarita do Raja Salomo ala ni pangulaonna na mansai denggan jala marsahala ala mangido habisuhon sian Debata Jahowa laho manguluhon bangso Israel. Jadi mansai ampit doisi ni buku Poda napinatorangni Raja Salomo di bukuna on, tu parngoluan ni hajolmaon di hatiha i nang di partingkian sinuaeng on. Sada karya sastra namansai denggan do anggo isi ni buku Poda on, ala ndada holan sisi parngoluanna secara pribadi tarida di son, alai dohot do angka interaksingolu bermasyarakat isarani: Sosial, budaya, politik, dohot ekonomi. Hadirion ni Raja Salomo laho patupahon pardalanan “Roda Kepemimpinanna  ndada marharoroan sian pikiranna sandiri, alai na dijalo ibana do pangurupion, lumobi habisuhon sian Debata Jahowa. Bisuk na jinalo ni Raja Salomo sian Debata Jahowaima dipake ibana gabe patrondi bagasan parngoluanna secara pribadi nang songoni di ulaonna songon sahalak raja ibana. Asa relevan do isi ni buku Poda na ginurithon ni Raja Salomo on sian najolo sahat tu nuaeng tu ngolu ni hajolmaon, laho paingothon bahkan laho membentuk kepribadian ni sasahalak. Mansai tangkas do diharingkothon Raja Salomo, ia habisuhon na sian Debata Jahowa i do na gabe bohal ni hajolmaon asa boi mandalani parngoluon dohot denggan. Untuk menjalani kehidupan yang lebih baik dan sejahtera, hidup secara pribadimaupun hidup bermasyarakat bahkan menjadi patron untuk seorang pemimpinpun buku Amsal ini sangat relevan untuk dipergunakan dari dahulu sampai sekarang. Tarida do i uju baru bangkit gabe raja pe si Salomo, ndang arta manang sinamot dijalo ibana sian Debata Jahowa, alai roha na pantas do asa anggiat marbisuk ibana laho manguluhon bangso Israel homar tu lomo ni roha ni Debata ndada hombar tu lomo ni rohana. 1 Rajaraja 3: 5 didok: “Apala di Gibeon ma patar Jahowa tu si Salomo di bagasan nipina bornginna i, didok Debata ma: Pangido ma manang aha silehononku tu ho”.Alus ni Raja Salom tu Debata Jahowa:“Dibahen i, lehon ma tu naposomon roha na pantas laho manguhum bangsomi, asa huboto manirang na denggan sian na roa; ai tung ise ma na tuk manguhum bangsom na marmulia on?” (1 Rajaraja 3: 9).Ala roha na pantas do dijalo Raja Salomo sian Debata Jahowa, gabe lomo ma roha ni Debata Jahowa mida Raja Salomo jala dilehon Debata Jahowa do na pinangidona i, gariada dohot godang angka arta dohot sinamot dilehon Debata Jahowa do muse tu ibana. Biar mida Jahowadibagasanhabisuhon na sian Debata Jahowa, i do dibahen Raja Salomo na gabegaya hidupdohot metode kepemimpinanna. Hinorhon ni i, lam sar ma barita habisuhon ni Raja i. Dungi mansai torop do angka raja ro tumopot Raja Salomo laho marsiajar taringot tu habisuhon ni Raja Salomo huhut mamboan angka sinamot bahen silehonlehon nasida tu raja i.

Dongan sahaporseaon di bagasan Jesus Kristus Tuhanta i...

Di bagasan turpuk on boi taida dua rumang ni pangalaho ni ngolu ni hajolmaon. Na parjolo, angka halak namanghagigihon parbinotan jala ndang biar mida Jahowa (ay. 29), pambahenan nasida mangula hombar tu sangkapsangkap ni rohana sandiri (Ay. 31) , ndang mangolu hombar tu lomo ni roha ni Debata Jahowa. Upa nasida madabu tu hamagoan (Ay. 32). Na paduahon, angka halak na olo manjalo jala tumangihon parbinotoan sian Debata Jahowa, pambahenan nasida mangula jala mangolu di bagasan biar mida Jahowa. Hasonangan ma na gabe tumpal nasida jala dijagai sian hagodoron dohot jea. Terlindung dari pada ketakutan dan malapetaka (Ay. 33). Parbinotoan na nidokna turpuk on, ima parbinotoan na marharoroan sian Debata Jahowa, ima mual ni nasa parbinotoan dohot habisuhon i. Ndadasongon parbinotoan na na ginuruhon ni angka parsikola, ilmu pendidikan(knowledge science). Alai parbinotoan na lobi tumombo sian i, ima habisuhon. Ai tumimbo do habisuhon sian hamaloon. Ai tumagon do na bisuk sian na malo. Halak na malo belum tentu na bisuk, alai halak na bisuk nunga pasti malo. Boi do sahalak jolma godang parbinotoanna, alai ndang bisuk. Mansai denggan do molo godangangka parbinotoan, alai ingkon ihut ma tu si (dibarengi) bisuk na sian Debata Jahowa. Bisuk dihata Indonesia, ima Hikmat. Hata Heber: khokhma. Di hata Junani: sofia, lapatanna kebijaksanaan manang kearifan. Hombar tu si, saluhut halak na porsea ingkon mangalului parbinotoan na adong di portibi on, ima ilmu pendidikan/secara akademis, dungi tapaumbuk ma i tu parbinotoan manang habisuhon na sian Debata Jahowa asa dapotan hasonangan hita laho mandalani hangoluan on jala asa unang mabiar hita maradophon hagodoron dohot jea.

            Talu do haotoon binahen ni habisuhon. Sabalikna, ndang tarida habisuhon i di halak na so olo manjalahi parbinotan. Memang, bangko ni pardagingon do manghagigihon parbinotoan na sian Debata Jahowa, gabe madabu tu bagasan ngolu na hombar tu lomo ni rohana sandiri manang keinginan daging. Tapasiding ma bangko ni pardagingon, tajalo ma parbinotoan dohot habisuhon sian Tuhan Debata Jahowa. Apalagi di partingkian nuang on, ndang apala na maol be laho mangalului angka ragam ni angka parbinotoan. Tapake ma angka hamajuon ni Teknologi, marhite angka media sosial laho manjalahi angka parbinotoan na marlapatan di ngolunta. Alai tutu di bagasan na mangalului angka ragam ni parbinotoan marhite hamajuon IT manang ilmu teknologi, media sosial (Medsos), unang sala hita nang angka teknologi canggih i pe marharoroan sian Debata Jahowa do parbinotoan halak laho patupahon i. Ngolu na marhabiaran mida Jahowa, i do ngoluna hinalomohon ni Jahowajala i do na sintong laho manghangoluhon habisuhon na sian Debata Jahowa. Saluhut angka parbinotoan na dapot hitadi portibion, ilmu akademis, ndang gabe i pataru halak manghangoluhon pantasni roha. Alai parbinotoan di bagasan habisuhon na sian Debata Jahowa, i do na mambahen hita gabe pantas marroha dohot serep marroha gariada patarugon hita tu ngolu haporseaon na lam togu tu Tuhan Debata di saluhut panggulmiton ni ngolunta di tingkimasa parungkilan manang tingki las ni roha pe, ala naung pinalua ni Debata Johowa hita marhite AnakNa Tuhan Jesus Kristus. Amen.

                                                                                             Pdt. Ahab Tambun, S. Th.