Heber 11: 32 – 40

1.  Di bagasan pardalanan ni ngolu ni hajolmaon jotjot do tubu angka biar ni roha jala olo soluk songgop hagangguon dohot angka na suman tu si. Boi masa do i, ala ni angka panosak ni parngoluan di bidang perekonomian, parianakkonon dohot angka na asing. Hombar tu hangangguon dohot biar ni roha i di pardalanan ni ngolu ni jolma i, mansai ringkot situtu ingkon adong hubungan tu Tuhan ima ngolu partondion. Di bagasan ngolu partondion i ingkon adong do haporseaon. Di jolo ni turpuk on, ima di bindu 11: 1 didok: “Alai anggo haporseaon i, pos ni roha do i di angka sihirimon, jala pamotoan na tontu taringot tu na so niida”.

2.   Marhite lapatan ni Hata Haporseaon Ponggol Parjolo dipatorang tu hita umbagas taringot tu haporseaon i, didok di si: “Diparhatutu rohangku do adong Debata na tumompa nasa na manggulmit. Ditompa do dagingku marparnidaan, marparbinegean, marparnianggoan, marpanghilalaan, marpandaian, dilehon do roha tu tondingku jala dipatureture do i saluhutna rasirasa nuaeng; angkup ni i dilehon do tu au parabiton dohot sipanganon siganup ari, ro di nasa na hasea di ahu di hangoluan on; diramoti do ahu asa unang mago jala diondingi do ahu diparmaraan; luhutna i ndang sian denggan ni parangengku manang sian jinou ni tua; tung asi ni rohaNa sambing do i dohot denggan ni basaNa umbahen na dilehon; dibahen i tama hupapujipuji Ibana jala tama huoloi na nidokNa ala saluhutna i, paboa las ni rohangku di Ibana. I ma na tutu situtu!”.

3.   Molo tagombarhon do pardalanan ni ngolu ni halak na porsea, tudos ma i songon sahalak na mardalan manang marlange di binanga laho mangalo arus ni aek i. Arus na mansai balga situtu ima dosa marhite angka pangela ni sibolis dohot angka antekantekna. Halak na porsea mangolu jala mardalan di tongatonga ni arus na mansai balga i. Ala ni i, molo mangasahon parbinotoan dohot gogona sandiri, ndang na tolap i, alai boi do  arus na mansai balga i adopan jala boluson ni halak na porsea molo mangasahon gogo dohot haporseaon tu Tuhan i. Di ayat pamuhai ni turpuk on (ay. 32), i ma angka halak manang naposo ni Debata na hot haporseaonna mangadopi angka na masa jala gabe tiruan do i tu saluhut halak Kristen di sandok portibi on. Nasida mangolu dibagasan arus na mansai doras situtu, alai ndang olo mabaor mangihuthon arus na doras i. Nang pe tutu, pasti adong do angka hahurangan (kelemahan), alai marhite haporseaon na mansai togu nunga dipatuduhon nasida tu hita ngolu haporseaon na marsihohot tu Tuhan i, jala marasing ngolu nasida sian ngolu ni angka na di humaliang nasida (Berani hidup berbeda dengan dunia sekitar yang terbiasa dengan dosa). Tarjou jala dipabangkit do halak na porsea ndada gabe siihuthon arus ni portibi on, alai gabe ingkon marasing sian arus na adong di portibi on.  Orang Kristen dipanggil bukan untuk memisahkan diri atau keluar dari arus besar itu, tetapi berenang di sungai dunia yang sama dengan membuat sebuah arus sendiri, yaitu arus kehidupan yang kudus dan beriman kepada Kristus.

4.  Hinorhon ni Haporseaon, ndang mabiar be hita mangadopi Hamaolon.

Dirupi Tuhan Debata do saluhut angka na porsea marhite angka persoalan na ni adopan ni angka halak na porsea i, asa marhite i gabe patar pangurupion ni Debata Jahowa di angka na manghabiari jala manghaporseai Ibana. Saluhut angka na masa di ngolu ni halak na porsea sian parbinotoan ni Debata jala di bagasan pangaramotionna. Di bagasan turpuk Heber 11 on (ay. 23 - 24), dipatuduhon tu hita parsorion ni sahalak na naeng manggomgomi bangsoNa, ima si Musa. Mulai sian hemetmeton ni si Musa hamaolon diloas Debata do songgop tu ibana.Alai marhite i, ndada na marlapatan na di pasombu Debata manang na si asi roha ni Debata di si Musa.  Ndang adong nanggo sahalak natuatua (orangtua) posoposoNa  dibunu halak. Autsugari ndang adong parenta sian Raja Firaun laho mambunu sude dakdanak baoa ni halak Heber hatiha i, ndang mungkin si Musa gabe halak na marsangap. Alai sangkap ni Debata mansai marasing situtu tu na piningkiran ni hajolmaon. Autsugari ndang ditabunihon si Musa  (Bayi Musa) tu aek Nil, na so mungkin do pajumpa ibana dohot boru ni Raja Firaun. Molo ndang diloas Tuhan i masa angka hamaolon/parsorion tu si Musa, na so mungkin do ibana boi manguluhon jala mamboan mulak bangso Israel haruar sian parhatobanan Misir. Dipaloas Tuhan i pe masa angka parungkilon di saluhut angka halak na porsea, i do dalan na binahen ni Tuhan i, asa gabe perpanjangan tangan jala gabe ulaula na metmet di Tuhan i. Amen.