ACARA PARMINGGUON HKBP RESSORT BONGBONGAN

Minggu Judika, tanggal 29 Maret 2020  

Ev.: 2 Petrus 1: 1 – 9                                                                                        Ep.:  Sepania 2: 1 – 3.

Topik:

HASINTONGAN NI DEBATA NA PALUAHON

Keadilan Tuhan Yang Menyelamatkan

= (Andorang so masuk, martangiang na hohom) =

I. ACARA PARMINGGUON

01.   Joujou Marsomba Tu Debata: (U = Uluan; R = Ruas; S: Sude)

U: Selamat ari Minggu ma di hita saluhutna!

R: Selamat ari Minggu.

U: Di   bagasan   Tema   Bulanan   di   Bulan   Maret   2020   ima:   DEBATA MANARIHON  NGOLUNTA,  tapataridahon  do  i  di  minggunta  sadari  on marhite na rap hita marsomba tu Debata di tonga ni bagasta be sadarion  hita na sahuria/sarumatangga.

R: On ma hami Tuhan sahuria/rumatangga napinasadaM, ro nuaeng laho mamuji Ho.

U: Endehon hamu ma di Jahowa sada ende na imbaru, pujipujianna di bagasan luhutan ni angka na niasian!

R: Pujionku ma Jahowa sian nasa roha di luhutan ni angka partigor dohot dihuria i

U: Tapuji jala tapasangap ma Tuhanta, marende ma hita.

02.    Marende B.E No. 654: 1 – 3      Marpungu Sude

1.           Marpungu sude mangido tu Tuhanta, asi ni rohaNa nang lomoNa i,

                     Naeng pasohotanNa doparungkilonta, sai ramotanNa do HuriaNa i.

2.           Diparmudumudu Tuhanta do hita, sai di iringiring HuriaNa i,

         PanumpahionNa do pamonang hita, Jahowa Debata na sun gogo i.

03.    Votum – Introitus.

U:   Marhitehite Goar ni Debata Ama dohot goar ni AnakNa Tuhan Jesus Kristus dohot goar ni Tondi Parbadia na tumompa langit dohot tano on. Amen. Luluhon ma ahu ale Debata, jala parbadahon badangku dompak bangso na so daulat roha, sai palua ma ahu sian baoa siulahon sipaotooto dohot hajengkelon. Ai Ho do Debata haroroan ni hagogoonku. Tongos ma hatiuronmu, angka na manogu ahu, pataru ahu tu dolok ni habadiaonMu dohot tu ingananMu. Haleluya.

S:   Mangendehon: Haleluya, Haleluya, Haleluya.

U:  Martangiang ma hita: Ale Tuhan Debata, Amanami na di banuaginjang, parasi roha na sumurung, na mandok mauliate ma hami tu Ho sian nasa rohanami, ala dilehon Ho AnakMu na sasada i tu hamatean humophop hami, asa unang mago na porsea di Ibana, alai asa hangoluan na saleleng ni lelengna di nasida. Tatap ma hami, ale Amanami di bagasan AnakMu Jesus Kristus, na gabe habadiaon dohot hatigoran di hami. Sai sesa ma dosanami saluhut ala ni pelean na sun denggan na pinilehonNa i humophop hami. Sai paeleng ma pinggolMu tu tangiangnami jala asi ma rohaM di hami marhitehite AnakMu, Tuhan Jesus Kristus, Tuhannami. Amen.

04.     Marende B.E No. 485: 3            Dongani Au Tuhan

          3. Ho siapuli au, sai pargogoi ma au, tarunjun au tongtong dibaen partibi on.

              Ajari au maniru Tuhanku Sipangolu, ringkot naeng botoonku.

              Pasauthon pingkiranMu, Ho do na mangapuli au,sai pargogoi ma au.

05.    Patik :

U: Patik di hita di minggunta sadarion i ma sian Patik Paduahon dohot lapatanna. Patik Paduahon: “Ndang jadi ganaonmu, jala ndang jadi sumanonmu, manang aha na di banua ginjang, dohot na di banua tonga on, ro di na dibagasan aek,na di toru ni tano, ianggo tung gabe sisombaon, manang sioloan”.

R: Lapatanna: Ingkon dihabiari rohanta Debata, jala ingkon holong rohanta di Ibana; Asa unang hita olo marsomba tu sombaon manang tu ganaganaan mangido hangoluan sian i.

U: Jala ndang jadi oloan begu, manang ulpuhan ni hadatuon, jala ndang jadi pos roha di ugasan homitan. I do sahatna. Antong, rap mangido gogo ma hita sian Tuhanta.

S: Ale Tuhan Debata! Sai pargogoi ma hami mangulahon na hombar tu PatikMi. Amen.

06.     Marende B.E No. 289: 1           Pos Ma Ho Rohangku              BL.220

1.  Pos ma ho rohangku di Debata, bonom ma arsakmu Tu rohaNa da

     Unang lomos tiop ma gomos, haporseaonmu unang ho bobos

     PaluaonNa ho ma antong, sian nasa jea di tano on.

07.    Manopoti Dosa/Hasesaan Ni Dosa.

U:  Tahamauliatehon do tu Tuhan i molo nuaeng boi dope hita rap marsomba tu Debata di ari Minggu sadari on, di tonga ni huria/bagasta on, nang pe nian na taadopi nuaeng di tongantonga ni bangsonta, i ma pandemi virus corona.

R: Mauliate ma di Ho Tuhan Raja ni Huria i, na mangalehon bisuk tu Uluan ni HuriaM HKBP, sian pusat, Distrik, Resort, sahat tu huria, nang tu Pamarentanami pe, dalanMu laho mangotapi harararat ni virus na mangago ngolu ni angka nahinophopMi.

U: Molo tung Marsomba hami nuaeng di huria/bagas on Tuhan, dihaporseai rohanami do, Bagas ni na porsea i do apala JoroM na ummetmet i. JoroM do nang pamatang ni angka na porsea i. Mangasahon i ma Tuhan, hami ro tu adopanMu na Badia i, laho marsomba tu Ho. Jala martangiang tu Ho! Asi ma rohaM di hami, tatap ma hami na hinophopMon. Marungkil do hami nuaeng Tuhan na masa nuaeng di sandok portibi on, lumobi ma di tongatonga ni bangsonami on.

R: Palua hami Tuhan. Asi rohaM di hami. Pangolu hami Tuhan! Asi roham di hami.

U: Ho do Tuhan, Parbinoto na sun! Alani i, pasupasuhon ma Tuhan parbinotoanMi, tu angka pande bisuk ni sandok portibi on, asa dapot nasida ubat na boi mangotapi virus corona i.

R: Pasupasu pamatangnami Tuhan, marhite angka sipanganon na hupangan hami Tuhan, asa margogo mangotapi virus i, unang mangerbang di pamatangnami, Jala gogo ni haporseaonnami i ma Tuhan na boi manulak sian pamatangnami, marhite na unduk hami tu angka peraturan na dipatupa nuaeng, dalan mangotapi pandemi i.

U: Asi roham Tuhan, tangihon tangiangnami, sesa sude dosanami. Jala unang tulak hami sian joloM. Mangasahon Kristus Jesus Tuhannami, martangiang hami tu Ho. Mangasahon Kristus Jesus Tuhannami, martangiang hami tu Ho. Amen. Bagabaga ni Debata taringot tu hasesaani dosa ta : Songon on do Hata ni Jahowa : Unang ho mabiar, ai Ahu do siluluhon ho; nunga pola hujou goarmu, Ahu nampuna ho. Hasangapon ma di Debata na di ginjang.

S: Amen.

08.   Marende B.E No. 428: 1            Ho Na Loja Ho Na Sorat

1.  Ho na loja, ho na sorat, pos roham, di Debatam.

Di na hansit, di na borat, dipapita do roham.

Unang ganggu rohamuna, dipandok ni Debatam.

PasautonNa bagabaga, pos roham, di Debatam.

09.     Epistel:

U: Hata  ni  Debata  na  gabe  turpuk  di  minggunta  sadari  on    tarsurat  di Sepania  2: 1–3,  tajaha  ma  marsingkat  soring:  Tungki  ma  hamu  jala mardangoldangol; ho ale bangso na so umboto na maila!

R: Tagan so songgop dope uhumi, songon hurangkam do laho salpu ari, tagan so songgop dope tu hamu parpiar ni rimas ni Jahowa, tagan so songgop dope tu hamu ari pangarimasan ni Jahowa.

U: Lulu i ma Jahowa, sude hamu, ale angka na unduk roha di tano on, hamu angka na mangaradoti uhumna; lulu i hamu ma hatigoran, lulu i haserepon, anggiat tung diondingi hamu di ari pangarimasan ni Jahowa. Ima sahatna: Martua do angka na tumangihon hata ni Debata jala na umpeopsa. Amen.

10.   Marende B.E No.  227: 1 – 2 Jesus Ngolu Ni Tondingku    BL.26

1. Jesus ngolu ni tondingku, Ho do haporusanki

    Gok di Ho na ma diringku, ro di nasa langkaki

2. Lam tangkas ma patuduhon, tu au on panghophopMi

    Asa i huhalungunhon, hot ma au di lambungMi

11.     Manghatindanghon Haporseaon:

U: Tahatindanghon ma haporseaonta i, songon na hinatadinghon ni donganta sahaporseaon di sandok portibi on. Rap ma hita mandok:

 

S: Ahu porsea ….. du. Amen !

 

12.     Marende B.E No. 417 : 1...  Rade Situtu Haluaon

1.    Rade situtu haluaon,  na naeng tangkuponmu antong.

Rade nang di ho hatuaon, si halashononmu tongtong.

Bernit do di taon Tuhanmu pasehon dosam sasude.

Tung unang paujat Ibana, sai jangkon pangkophopNa i.

2.    Patedek sude hahurangan, topoti sandok dosami,

Pangido: Sai sesa o Tuhan, sude pangalaosionki.

Datdati, sai saut botoonmu naung sesa dosam  sasude,

Mardame dagingmu nang tondi, maniop tongtong Tuhan i.   

13.     Jamita : 2 Petrus 1 : 1 - 9.

(Molo so adong parhaldo partohonan, dijaha ma turpuk i dungi martangiang).

14.    Marende sian BE.No.763 : 1. Molo Jesus donganmi (P. Pelean)

1.    Molo Jesus donganmi las roham, Jesus i pangurupi, las roham,

Hot haporseaonmi dohot pos ni rohami, mardonganhon Jesus i las roham.

Las roham, las roham mardonganhon Jesus i, las roham.

Marsinondang ma di ho, bintang pangkirimon i mardonganhon Jesus i las roham.

2.    Molo Jesus donganmi las roham, jagaonNa tondimi las roham,

Tiruonmu ma tongtong, dame nang holongNa i, saleleng dingolumi las roham

Las roham …

15.     Tangiang Pelean + Tangiang Ale Amanami + Pasupasu.

(Molo di bagas: Rap Mandok : Tangiang Ale Amanami):

Mangendehon : Amen, Amen, Amen!

Pelean Parmingguon Keluarga, tu Huria :

Sian Keluarga             : ..........................................................................

  Godang na     : ..........................................................................

Selamat Hari Minggu.

Tuhan Memberkati.