Jamita Di Ari Parningotan Hamamate ni Tuhan Jesus, Jumat 10 April 2020.

“PANGHOPHOPON NI JESUS NA PALUAHON”

(Mateus 27: 45 - 56)

Huria na hinaholongan ni Tuhan Jesus Kristus….!

Parpunguanta sadarion, ima Ari Parningotan Hamamate ni Tuhan Jesus Kristus. Marhite peristiwa i dipabotohon do tu sandok portibi on: Nunga dihophop jala dipalua Tuhan Jesus saluhutna jolma sian pardosaonna nang sian hamateanna ala ni dosa i. Dohot do hita nang keluarganta on hinongkopNa di si. Marhite hamamate ni Tuhan Jesus, ndada holan haluaon di ari sogot na pinatupa ni Tuhan Jesus alai dohot do nang haluaon ni ngolunta uju di portibi on. Tahilala do i di partingkian on, di masa nuaeng hamaolon di portibi on, songoni nang di bangsonta, ala masa sahit Virus Corona Covid 19, dipargogoi jala didongani Tuhan i do hita, huhut dilehon parbinotoan dohot habisukon laho mangadopi i, asa unang di bagasan biar ni roha hita, tarlumobi asa malua hita sian parungkilon i. Marhite na masa on, ingkon hatindanghononta do: “Mansai arga do hape ngolunta on (tondi nang pamatang), pola mate tarsilang Tuhan Jesus ala ni hita/jolma”. Ala ni i, lam taargahon ma ngolunta on marhite na mangaradoti hahipason ni pamatang nang tondi pe. Jala marhite na masa on, ingkon lam marsitutu do hita manghaporseai holan Tuhan i do hape Pargogo Naso Hatudosan (Yang Maha Kuasa) na paluahon hita sian ragam ni parungkilonta.

Huria na hinaholongan ni Tuhan Jesus….! On ma na gabe impola ni turpuk jamita on:

1. Hamamate Ni Tuhan Jesus gabe hangoluan di angka na porsea. Marhite hamamate ni Tuhan Jesus di hau pinarsilang, gabe patar ma taboto jala tapanghilalahon panghophopon ni Tuhan Jesus, na pataruhon hita tu Haluaon. Hata ni Tuhanta di Rom 6: 23, didok: “Ai upa tinuhor ni dosa do hamatean; alai basabasa ni Debata do hangoluan na saleleng ni lelengna di bagasan Kristus Jesus Tuhanta i”. Ala nunga madabu jolma tu bagasan dosa, hamatean nama na gabe jambar ni jolma. Alai, tuani do Parasiroha jala Pardenggan Basa Tuhan Debata, ai ndang dihalomohon Ibana hamatean ni jolma i di bagasan hajahatonna. Hinorhon ni asi ni rohaNa i, dipatupa Ibana do pardengganan ni hajolmaon tu Tuhan Debata, marhite na mangalehon AnakNa Tuhan Jesus Kristus gabe tobus ni dosa ni jolma i.

2. Ndang ditadingkon Debata angka na porsea di Ibana. Sian hau pinarsilang i dipangiar Tuhan Jesus do soaraNa jala dianggukhon: “Ale Debatangku, Debatangku, boasa tung tadingkononMu Ahu” (Eli, Eli, lama sabachtani)? Asa tangkas do taboto bagas ni pangkaholongi ni Debata di panghophopNa i di hita, ai songon i ma bernit ni sitaonon i ala ni dosanta. Ndang ditadingkon Debata Ama, AnakNa Tuhan Jesus Kristus na tongon mangadopi sitaonon. Ala ni dosa ni hajolmaon ingkon marsitaonon ma Tuhan Jesus pola mate tarsilang, jala ala ni holongNa do asa olo Ibana mangulahoni di bagasan haunduhon tu Debata (pat. Joh. 3: 16). Songoni do Tuhan Jesus tu angka halak na porsea, tongtong do didongani Ibana hita. Homabr tu si ma… molo masa pe ragam ni angka hamaolon tu angka na porsea, ingkon pos do rohanta tu Tuhanta, ndang ditangkon hita, ai Ibana do nampuna hita, jala Ibana do Rajanta. Tahaporseai ma, uju marsitaonon hita, rap do Ibana dohot hita mangadopi sitaonon i, jala ingkon tongtong marsigantung hita tu Ibana tingki mangadopi sitaonon i, asa sahat hita tu haluaon i.

3. Marujung do saluhutna na adong di portibi on. Marsoara na gogo do Tuhan Jesus, mandok: “Nunga marujung…”, dungi tos ma hosanna. Nunga marujung ngolu Tuhan Jesus. Nunga marujung ulaon panghophoponNa tu hajolmaon. Saluhut angka ulaon dohot tanggung jawab na pinasahat ni Ama i tu Tuhan Jesus Kristus nunga diulahon Jesus Kristus dohot denggan di bagasan haunduhonNa tu Ama i. Suang songoni do nang ngolunta be; Ingkon marujung do, ai so adong na hot di portibi on. Alai saleleng mangolu hita, ndang tarbahen so masa tu hita angka hamaolon manang parungkilon. Ai las ni roha dohot arsak ni roha, ido na marsingkat sorin songgop tu ngolu ni jolma i. Di parpunguanta sadari on, lungun do roha, ala somalna parmingguon Parningotan Hamamate ni Tuhanta Jesus sai dipamasa do i di gareja, alai ala ni pandemi Corona on ingkon marminggu ma hita di bagasta be. Taingot ma, nunga mate be sorop ni hamatean i dibahen Tuhan Jesus i marhite hamamateNa. Hita pe saluhutna, ingkon di bagasan haporseaon do mangido tu Tuhan i, asa humatop marujung nang sorop ni Virus Corona Covid 19 on. Ala ni i, pos ma rohanta jala porsea ma hita tu Tuhan i, marujung do i di tingkina bahenon ni Tuhan i.

Huria hinaholongan ni Tuhan Jesus Kristus….!

Dung tos hosa ni Tuhan Jesus, dungi maribak ma hirehire na di bagas joro sian ginjang tu toru. Lapatanna, nunga adong muse pardomuan ni jolma tu Debata. Dung madabu jolma i tu bagasan dosa ndang boi be ro jolma i marsomba tu Tuhan Debata, ala ni hadirionNa na Badia. Hinorhon ni dosa i, ndang adong be hubungan ni Debata tu jolma. Nang di bagas joro i pe, ingkon marhite malim do boi ro jolma i mandapothon Debata. Alai marhite hamamate ni Tuhan Jesus gabe maribak ma hirehire na di bagas joro i, gabe dijangkon Debata haroro ni jolma di adopanNa ala saluhut na porsea nunga diparbadiai marhite pelean na Badia i, ima AnakNa na Tuhan Jesus Kristus naung mate humongkop hita jolma pardosa. Amen.