ACARA PARMINGGUON HKBP RESSORT BONGBONGAN

Minggu Misericordias Domini, tanggal 26 April 2020 (Di Bagasna Be)

& Ev.:  Rom 3: 1 - 8                                                                         & Ep.: 4 Musa 14: 17 – 19

Topik:   Hasatiaon Ni Debata.

I.      Pangaradeaon:

1.       Parmingguon on diuluhon ni Ama manang Ina.

2.       Dipillit ma na manguluhon tangiang pangondianon.

3.       Diparade hian ma: 1. Bibel.                2. Inganan ni pelean.

II.    Parmingguon:

1.      Marende BE No. 10: 1 - 2    Hupuji, Hupasangap Ho              BL. 128

1.  Hupuji, hupasangap Ho, Amang pardenggan basa.

     Ai jadijadianMu do sude, angka na masa.

     Ditompa Ho do sasude, dagingku ro di tondi pe, pinuji ma goarMu.

    2.  Saluhut na tinompaMi naeng sonang di rohaMu;

         Arian dohot borngin pe disarihon rohaMu.

         Nang uhum di gomgomanMi, na tigor, na sintong do i, pinuji ma goarMu.

2.      Votum – Introitus – Tangiang:

U  :  Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia, na tumompa langit dohot tano on. Amen. Gok asi ni roha ni Jahowa do tano on. Marhitehite Hata ni Jahowa do manjadi angka langit. Marolopolop ma hamu ale angka partigor, mangasahon Jahowa, talup do marende angka na unjur marroha.  Haleluya!

R  :           (Mangendehon): Haleluya, Haleluya, Haleluya!

U  :  Martangiang ma hita: Ale Tuhan Debata, Ama ni saluhut parasirohaon! Nunga ditatap Ho hami bangsoM on, ai ndang manjua Ho mangalehon AnakMu na sasada i, Tuhan Jesus Kristus tu tangan ni pardosa, asa taononNa haleaon dohot siak ni bagi sahat ro di hau na pinarsilang. Sai tumpahi hami marhitehite asi ni rohaM, asa margogo hami jala marbenget ni roha songon anak haholongan ni rohaM i di angka sitaonon, asa marsangap GoarMu dohot AnakMu, Tuhan Jesus Kristus, dohot Tondi Parbadia marhitehite hami. Amen.

3.      Marende BE No. 716:  1 “Di Na Mamolus Sandok Ngolu On”

       1.  Di na mamolus sandok ngolu on, gok do na marsak gale.

Boan sinondang tu na holom i, asa margogo muse.

Bahen ma ahu parhiteanMu pasupasuM mabaor ma i

Ale Tuhanku, patupa ma au baen pasupasu tu dongan sude.

4.      Patik Ni Debata:

U  :  Patik ni Debata di minggu Misericordias Domini sadari on dienet sian Epesus 4: 32. Alai gabe na basar ma hamu sama hamu, angka parasiroha, masisesaan dosa ma hamu, songon panesa ni Debata di dosamuna di bagasan Kristus. Antong rap mangido gogo ma hita sian Tuhan Debata.

R  : Ale Tuhan Debata, sai pargogoi ma hami mangulahon na hombar tu PatikMi. Amen.

5.      Marende BE No. 180 : 1             “Ro Tu Jesus Ho Na Loja”  

1.   Ro tu Jesus ho na loja, na maheu i

Lam lumbang do di lambungNa rohami.

6.      Manopoti Dosa:

U : Tatopoti ma dosanta tu adopan ni Dabata, martangiang ma hita: Ale Tuhan Debata, Amanami, Parasiroha na sumurung ! Na pungu do hami di joloM martangiang tu Ho; ndada mangasahon hatigorannami, na mangasahon asi ni rohaM na godang i do. Sai asi ma rohaM mida sandok bangsonami, sesa ma dosanami saluhutna. Sai sungguli ma rohanami, asa muba roha dohot pangalahonami, ala ni Tuhan Jesus Kristus, Sipangolu hami. Amen.

R : (Mangendehon): BE No. 182: 2  Haholongan Na Badia 

             2. Husolsoli do rohangku Na gok dosa i tongtong

           Ai godang ariaringku  Na hubahen ambolong

U :              Bagabaga ni Debata taringot tu hasesaan ni dosanta: Songon on do Hata ni Tuhan Jahowa: Nunga pola hupasisi angka pangalaosim songon ombun, jala songon ombun manorop angka dosam. Sai mulak ma ho tu Ahu, ai Ahu do Sipalua ho. Hasangapon ma di Debata na di ginjang!

R : Amen.

7.      Marende BE No. 118 : 1 + 6  “Paian Ma Di Hami”

1.  Paian ma di hami  O Jesus asiMi, asa tung unang hami diansi musu i.

6.  Paian ale Tuhan Di hami burjuMi, sai lehon hatongtongon padao ma jea i.

8.      Epistel:

U  : Hata ni Debata turpuk di minggu Misericordias Domini on, ima na tarsurat di 4 Musa 14: 17 – 19. (Dijaha Responsoria sian Bibel. Udut tu si didok na manguluhon ma): Martua do angka na tumangihon Hata ni Debata jala na umpeopsa. Amen.

9.      Marende BE No. 403 : 1             “Pos Rohangku Di Tuhanhu”

       1.  Pos rohangku di Tuhanhu, ndang tarbaen tarhirim au.

On do tongtong tangianghu, tu lambungMu au patau.

Lobi pos do rohangki, sai patulusonna i, boanonNa au tu si.

10.   Manghatindanghon Haporseaon:

U  :  Tahatindangkon ma haporseaonta i, songon na hinatindangkon ni donganta sahaporseaon di sandok portibion. Rap ma hita mandok:

R  : Ahu Porsea…

11.    Marende BE No. 467 : 1     “Asi Ni Roham Hupuji”

1.        Asi ni rohaM hupuji ala Ho manobus au. Dipaias Ho rohangku

gabe soranganMu au. IngananMu rohanami, TondiMi manggohi i.

Pangke dohot ngolunami gabe ulaulaMi.

      

12.    Tangiang Pangondianon:

13.     Marende BE No. 206: 3             “Na Dison Do Au Tuhanhu”

         3.  Ndang adong pangidoanhu dungkon asi ni rohaM.

Na dilehon Ho Tuhanhu, tu na unduk di hataM.

RohaMi ma tu rohangku, sai pasauthon ma hataM.

14.     Jamita: Rom 3: 1 – 8.

Saluhut Jolma Do Mardosa.

Huria na hinaholongan ni Tuhan Jesus Kristus…

Turpuk jamita on, ima panorangion ni Apostel Paulus taringot tu hasurungan ni halak Jahudi sian bangso na asing dohot hasatiaon ni Debata tu halak Jahudi. Tarida do sian rumang ni panuratna di turpuk on, panghataion ni Apostel Paulus do on dohot halak na mangalo panorangionna taringot tu: Haluaon, ndang ala na mangulahon patik, alai marhite haporseaon tu Jesus Kristus do.

Aha do na masa umbahen na di taringoti Apostel Paulus halak Jahudi?

Na marbarita Nauli do Apostel Paulus tu halak Rom marhite na manongos surat tu nasida, ima buku Rom on. Unok ni Barita Nauli na pinasahatna, ima: Haluaon ni hajolmaon jumpang holan marhite asi ni roha ni Debata di bagasan Jesus Kristus, ndada binahen ni patik, ndada binahen ni parulaon. Haporseaon  do na mamintori jolma ndada na mangulahon patik (Manusia Dibenarkan Karena Iman Kepercayaan kepada Yesus Kristus). Jala taringot ulaon marbarita nauli mansai tangkas do i dihatahon Apostel Paulus: “Ndang na huhailahon Barita Nauli i, ai hagogoon ni Debata do i paluahon nasa na porsea, halak Jahudi jumolo, dungi dohot do halak Junani. Ai dipapatar do di si hatigoran ni Debata, na sian haporseaon tu haporseaon, hombar tu na tarsurat hian: Na mangolu do partigor i hinorhon ni haporseaon”.

Huria na hinaholongan ni Tuhan Jesus Kristus…

Dirajumi halak Jahudi do sumurung nasida di adopan ni Debata sian angka bangso na asing i. Hape di bindu 2: 11 didok Apostel Paulus: “Ai ndang siida rupa anggo Debata”. Ala ni i gabe tubu ma sungkunsungkun di turpuk on, ayat 1: “Asa dia ma hasurungan ni halak Jahudi? Tu aha ma hasea parsunaton i?”. Hombar tu si ma gabe dipatupa Apostel Paulus hatorangan marhite turpuk jamita on. Diparhatopot Apostel Paulus do na adong hasurungan ni Jahudi di adopan ni Debata. Halak Jahudi do parjolo na gabe hasahatan ni patik dohot hata ni Debata. Di bindu 9: 4 – 5 boi do taida na adong do hasurungan ni halak Jahudi. Alai hasurungan i pe, ingkon mardongan tanggungung jawab do i di adopan ni Debata. Ndada hasurungan sihaginjanghonon i, manang hasurungan gabe boi marlomolomo nasida di adopan ni Debata. Ingkon gabe badia do ngolu nasida di tongatonga ni saluhut bangso na adong di portibi on. Jala marhite halak Jahudi ingkon gabe tandaon ni saluhut bangso na di portibi on Debata na sintong i, ima Debata Jahowa. Sian mulana pe dihatahon do tu nasida: “Ai bangso na badia do anggo ho di Jahowa, Debatam, nunga ho pinillit ni Jahowa Debatam sian nasa bangso na di tano on, gabe bangso hapunjunganna” (5 Musa 7: 6).  

Huria na hinaholongan ni Tuhan Jesus Kristus…

Aha ma na gabe hasurungan ni angka na porsea? Ala ni Tuhan Jesus Kristus, nunga gabe anak ni Debata saluhut na porsea. Didok hata ni Tuhanta: “Hamu angka haholongan! Anak ni Debata do hita nuaeng,…” (1 Joh. 3: 2). Saluhut do halak naung tardidi tu bagasan goar ni Debata Ama dohot goar ni AnakNa Tuhan Jesus Kristus dohot goar ni Tondi Parbadia, nunga gabe anak ni Debata.   Hasurungan na pinasahat ni Debata tu angka halak na porsea holan ala ni asi ni ni Debata do i di bagasan AnakNa Tuhan Jesus Kristus. Ala ni i, hasurungan na pinasahatNa i, ndada naeng sihaginjanghonon i. Manang gabe senjata di hita, asa gabe boi hita marlomolomo mangulahon dosa di adopan ni Debata. Hasurungan naung dipartumpalhon Tuhan Debata tu saluhut halak na porsea ingkon mardongan tanggung jawab tu Tuhan Debata. Ala nunga diain Debata hita gabe anakNa marhite Jesus Kristus, marparange ma hita songon anak ni Debata. Marhite ulaonta nang ngolunta taulahon ma tanggung jawab sebagai anak ni Debata, marhite ulaon Barita Nauli. Unang mansohot di hita Barita Nauli i, ingkon sipararaton do i marhite: “Hangoluhon jamita i, jala gabe jamita ngolumi”. Amen.  

     

15.    Marende BE No. 216: 1             “Gargar Dolok Tapor Batu” (P. Pelean)

         1.  Gargar dolok tapor batu, ndang na gargar asi ni

Roha sian Debatangku, sai na hot padanNa i.

Asi ni rohangku do ndang na munsat sian ho.

16.    Tangiang Ale Amanami + (Mangendehon) Amen, Amen, Amen.

 Pelean Parmingguon di Keluarga (26 April 20)  :…………………………………………

 Godangna                   : Rp..……………………………………………………………….

“Selamat Hari Minggu, Tuhan Memberkati”.