Jamita Paskah (I), Minggu tanggal 12 April 2020

“HUASO NI HAHEHEON NI TUHAN JESUS” 

(Mateus 28: 1 – 10).

Huria na hinaholongan ni Tuhan Jesus Kristus…! Selamat Paskah ma di hita! Paskah marharoroan sian hata Heber, ima “pesakh” na marlapatan manalpuhon (melewati). Na paingothon bangso Israel, di haluaon na pinatupa ni Debata uju di Misir nasida, marhite na mandaishon mudar ni birubiru tu tohang ni jabuna be, asa salpuhonon ni Debata hamatean tu anak buhabaju nasida. Nuaeng di halak Kristen: Pesta Paskah ima haluaon, pesta Paskah ima hatuaon ni angka na porsea tu Jesus Kristus. Mudar ni Jesus ima tanda na ni lehon ni Debata bahen tobus ni angka jolma sian dosa dohot hamatean. Tutu situtu nunga hehe Kristus i. Nang pe naung leleng na masa on, lobi hurang 2000 taon naung salpu peristiwa haheheon ni Tuhan Jesus, alai sai adong dope adong halak na so porsea di haheheonNa i. Haheheon ni Jesus Kristus, i do unok ni panindangionta, ai tarjou do hita gabe sitindangi ni haheheonNa i. Sitindangi na parjolo di haheheon ni Tuhan Jesus ima angka parompuan na naeng mamiahi bangke ni Tuhan Jesus di na ro sogot manogot i tu udean ni Tuhan Jesus. Dungi siseanNa, ima si Simon Petrus dohot si Johannes, dohot angka na asing.

 

Huria na hinaholongan ni Tuhan Jesus Kristus…! Nunga hehe Kristus i sian na mate. Barita na sintong do na pinabotohon ni turpuk on tu hita. Di buhabuha ijuk, ro ma si Maria Magdalena dohot si Maria na sadanari maningkir tanoman i. Masa ma di si lalo na gogo. Tuat ma surusuruan ni Tuhan sian banua ginjang, digulang ma batu i, laos hundul diatasna, rupana songon hilap, saksak do ulosna songon hapur. Gabe angka dotdot ma angka parjaga i dibahen biar ni rohanasida, hira na mate do panghilalaan nasida. Alai ninna surusuruan i ma tu parompuan i: “Unang hamu mabiar, ai huboto, dilului hamu do Jesus, naung diparsilangkon. Ndang dison Ibana. Ai nunga hehe Ibana, songon na nidokna hian. Pajonok hamu ma; ida hamu ma inganan hapeahanna i!”. Parompuan dohot angka parjaga gabe sitindangi di haheheon ni Tuhan Jesus i. Ndang tarida di si angka malim, sibotosurat, parise, termasuk angka sisean i. Didok surusuruan i do tu angka parompuan i: “Hatop ma hamu laho tu angka siseanna i paboahon, naung hehe Ibana sian na mate, jadi joloananna do hamu tu Galilea, disi ma idaonmuna Ibana; nunga hupaboa i tu hamu”.

Tahalaputi ma mamaritahon haheheonNa i.

Dungi hatop ma angka parompuan i laho sian tanoman i, mabiar do nasida alai huhut las situtu rohanasida. Marlojong do nasida laho mamaritahon na masa i tu angka sisean ni Tuhan Jesus. Laos ro ma Jesus mandapothon nasida, ninna ma: “Dame ma di hamu!”. Dungi dipajonok nasida ma, dihaol ma patna, huhut manungkap tu jolona. Jadi didok Jesus ma tu nasida: Unang hamu mabiar, laho ma hamu mandokkon angka anggingku tu Galilea, disi ma idaonnasida Ahu! Huaso ni haheheon ni Tuhan Jesus i adong pardamean ni Debata dohot jolma, jolma dohot portibion, hadameon na ro sian Debata tu tongatonga ni angka hajolmaon. Huaso ni haheheon ni Tuhan Jesus  gabe patubu “las ni roha dohot gogo” di saluhut angka na porsea laho pararathon Barita Nauli i tu sandok portibi on. Halak na parjolo manjalo “las ni roha dohot gogo” i si Maria Magdalena dohot si Maria na sadanari, dungi angka sisean naung mulak sian udean laho marnida na masa i dohot angka sisean na asing…

Huria na hinaholongan ni Tuhan Jesus Kristus…!

Marhite haheheon ni Tuhan Jesus Kristus sian hamatean gabe  tangkas ma taboto:

1.      Nunga monang Tuhan Jesus jala ditaluhon Ibana hamatean. Talu sorop ni hamatean, talu banuatoru na mangihoti ngolu ni jolma i, hinorhon ni i gabe mangolu ma hita di bagasan haimbaruon dohot las ni roha. Ndang hamatean ujung ni ngolu ni halak na porsea, alai adong dope hangoluan dung hamatean sihirimon ni halak angka na porsea. Ndang mian di tanoman i halak na porsea. Na sian Debata ingkon mulak do i tu Debata.  Hata ni Tuhanta mandok: “Aut na sian portibi on hamu, haholongan ni portibi on do donganna. Alai ndang sian portibi on hamu. Ahu do tahe mamillit hamu sian portibi on; ala ni i do, umbahen na dihosomi portibi on hamu (Joh. 15: 9).

2.      Nunga diungkap dalan tu banua ginjang. Haheheon ni Tuhan Jesus do na gabe ojahan ni haporseaonta, ai hita pe ingkon hehe do sogot sian na mate. Didok Apostel Paulus: ”Alai anggo so adong haheheon ni angka na mate, ndang na hehe nang Kristus.” Alai ndada holan hehe sian na mate, alai saluhut angka na porsea i togihononNa do sogot tu hangoluan na saleleng ni lelengna.  

3.      Marhite huaso ni haheheon ni Tuhan Jesus, asa somba tu Goar ni Jesus nasa ulu ni tot, na di banua ginjang i dohot na di tano, nang na ditoru ni tano, jala asa nasa na marsoara marhatopothon: Jesus Kristus do Tuhan, naung hehe sian na mate bahen hasangapon ni Debata Ama! Amen.