Minggu Quasimodogeniti, tanggal 19 April
2020 (Di Bagasna Be)
&
Ev.: Psalmen 42: 1 – 6 &
Ep.: 1 Petrus 2: 1 – 5
Topik: Mauas Do Tondingku Tu Debata.
I.
Pangaradeaon:
1. Parmingguon on diuluhon ni
Ama manang Ina.
2. Dipillit ma na manguluhon
tangiang pangondianon.
II.
Parmingguon: (U=
Uluan, R= Ruas, S= Sude).
1.
Marende BE No. 3:
1, 3 “Puji Jahowa Ale Tondingku”
v
Puji Jahowa ale tondingku, puji Ibana Debatami.
Tagan
so suda dope bohalhu, naeng pujionku basaNa i.
Sitompa
daging, tondi pe ingkon dipuji sasude. Haleluya, Haleluya
v
Martua halak na niondingan ni Debatanta Jahowa i.
Angka na hot marhaporseaon, di Jesus
Kristus Tuhanta i.
Molo Debata donganmu, ndang adong hurang
tuamu. Haleluya, Haleluya.
2.
Votum – Introitus – Tangiang:
U : Marhitehite
Goar ni Debata Ama dohot Goar ni AnakNa Tuhan Jesus Kristus dohot Goar ni Tondi
Parbadia, na tumompa langit dohot tano on. Amen. Hisapan ma hamu songon
posoposo na imbaru tubu i, disusu na denggan na so mangansi asa lam ganda hamu
marhite sian i molo tung nunga didai hamu basar ni Tuhan i. Puji hamu ma Debata
hagogoonta i, olophon hamu ma Debata ni si Jakob. Haleluya!
R : (Mangendehon):
Haleluya, Haleluya, Haleluya!
U : Martangiang ma hita: Ale Tuhan Debata!
Suru ma Tondi Parbadia tu rohanami, asa tarapul situtu rohanami marhitehite
haheheon ni anakMu, Tuhan Jesus Kristus, jala asa lam ganda haporseaonnami marhitehite
pangkirimon na mangolu, asa tongtong huingot hami, na hehe do hami muse sian na
mate songon Tuhan Jesus Kristus, Tuhannami, naung hehe sian na mate i. Amen.
3.
Marende BE No. 557: 1
“Dao Dumenggan”
v
Dao dumenggan, asi ni rohaM, dao umarga sian
ngolungkon.
Sai pujionhu ma Ho Tuhanhu, dao umarga
asi ni rohaM.
4.
Patik:
U : Patik
ni Debata sihangoluhonta di minggu Quasimodogeniti sadari on dienaet sian 1
Korint 15: 57 – 58. Alai mauliate ma di Debata, na pamonang hita
marhitehite Tuhanta Jesus Kristus. Onpe, hamu angka donganhu na hinaholongan,
marsihohot jala so mubauba ma hamu, jala lam sumurung ma tongtong di bagasan
ulaon ni Tuhan i, ai diboto hamu do: Ndang magopo halojaonmuna di bagasan Tuhan
i. I do sahatna. Antong rap mangido gogo
ma hita sian Tuhan Debata.
R : Ale Tuhan Debata, sai
pargogoi ma hami mangulahon na hombar tu PatikMi. Amen.
5.
Marende BE No. 179:
1 “Adong Do Sada Mual I”
v Adong do sada mual i, di na mardosa i,
Mansai
denggan do mual i, pasonang rohangki.
6.
Manopoti Dosa Dohot Bagabaga Ni Debata:
U : Ale
Tuhan Debata, Amanami jala Parasiroha! Debata na patubuhon hami paduahalihon tu
panghirimon na mangolu marhitehite haheheon ni Tuhan Jesus Kristus sian na
mate. Songon posoposo na uasan di susu na tama, ro do hami tu adopanMu mangido
asi ni rohaM dohot hasesaan ni dosanami,
R : Tuhanhu
jala Debatangku, asi ma rohaM di hami.
U : Diloas
Ho do nuaeng hasusaan masa tu hami ala ni sorimago Covid-19 jala na holsoan do
hami ala hurang denggan jala hurang godang parbue ni na huula hami nasailaon. Songon
posoposo na uasan di susu na tama, marpungu hami nuaeng tu joloM: Pasupasu ma
sipanganon dohot siinumonnami, asa gabe gogo dohot hahipason tu pamatangnami.
R : Tuhanhu
jala Debatangku, asi ma rohaM di hami.
U : Diloas
Ho do nuaeng hasusaan masa tu hami ala ni sorimago Covid-19 jala na holsoan do
hami marningot angka dongannami na hurangan, na pogos, na so dapot mangan,
panangkarnangkar, na sopot so marama so marina, na mabalu, ro di sude angka na
hurang sipanganonna. Songon posoposo na uasan di susu na tama, marpungu hami nuaeng
tu joloM: Pasupasu ma nasida nang hami asa masiurupan di angka na hurangan,
R : Tuhanhu
jala Debatangku, asi ma rohaM di hami.
U : Diloas
Ho do nuaeng hasusaan masa tu hami ala ni sorimago Covid-19 jala na holsoan do
hami marningot angka dongannami na marsahit dohot angka na agoan hosa,
partinaonan ni angka paramedis, panggomgominami, nang huriaM na so boi
marminggu dope di gareja, ro di angka naposoM di dia pe mangula. Songon posoposo na uasan di susu na tama,
marpungu hami nuaeng tu joloM: Urupi ma panggomgominami, masyarakat, huriaM di
Indonesia nang di portibi on, asa marsada ni roha, masiurupan dohot masitoguan
laho mangotapi sorimago Covid-19 on,
R : Ale
Tuhannami jala Debatanami, sai pasada ma hami jala sesa ma dosanami.
U : Ale
Tuhan Debata, Amanami, Parasiroha na sumurung! Na pungu do hami di joloM
martangiang tu Ho; ndada mangasahon hatigorannami, na mangasahon asi ni rohaM
na godang i do. Sai asi ma rohaM mida sandok bangsonami, sesa ma dosanami
saluhutna. Sai sungguli ma rohanami, asa muba roha dohot pangalahonami, ala ni
Tuhan Jesus Kristus Tuhannami, Sipangolu hami. Amen.
R : (Mangendehon):
BE No. 733: 1 “Dulo Ma Au On O
Tuhan”
v Dulo
ma au on o Tuhan, bege anggukhon. Ro do Ho tu angka dongan, topot nang au on. Jesus
Tuhan bege anggukhon, Ro do Ho tu angka dongan, topot nang au on.
U : Bagabaga
ni Debata : Satongkin do Hutadingkon ho, alai papungupunguonHu ma ho muse
marhitehite angka asi ni roha godang! Tagan di parpiar ni murukHu Hutabunihon
bohingKu satongkin maradophon ho, alai marhitehite dengganbasa salelenglelengna
asianHu ho, ninna Jahowa Sipalua ho. Hasangapon ma di Debata na di ginjang.
R : Amen.
7.
Marende BE No. 434:
2 “Tuhan Jesus Bereng Au”
v Mago au dibaen portibi on, daging, tondi
dohot rohangkon.
Holan Jesus
paluaohon saluhut na tinaluhon.
Gok do au
nuaeng di Tuhanhi, sirang ahu sian dosangki.
Lam jonok tu
Ho ale Tuhan, sai taiti au.
Sae dosangku
dibaen Tuhanhi, monang au dibaen MudarNa i.
Gogo do dilehon Tuhanhi di au, di au.
8.
Epistel:
U : Hata
ni Debata turpuk di minggu Quasimodogeniti sadari on, ima na tarsurat di1 Petrus 2 :
1 – 5. Antong, bolonghon hamu ma nasa
hajahaton dohot nasa angkal dohot pangiburuon nang panihaion.
R : Songon posoposo na imbaru
tubu, uasan ma hamu di susu na tama, na so marlaok, asa lam magodang hamu,
horhonon ni i, bahen haluaon,
U : molo tung naung didai hamu habasaron ni Tuhan
i.
R : Ai nunga didapothon hamu
Ibana na songon batu na mangolu na binolonghon ni jolma; alai na pinillit jala
na arga ia di Debata.
U : Sai olo ma nang hamu
paulion songon angka batu na mangolu, gabe bagas partondion jala hamalimon na
badia, laho mamboan angka pelean partondion halomoan ni roha ni Debata
marhitehite Jesus Kristus. Ima sahatna.
Martua ma angka na tumangihon Hata ni Debata jala na umpeopsa. Amen.
9. Marende BE
No. 707: 1 “Hagogoon Dohot Apulapul”
v Hagogoon
dohot apulapul, do dilehon Tuhan i tu au,
Ganup
ari au ditogutogu, ganup tingki diondingi au.
Ai
hombar tu lomo ni rohaNa do dilehon Tuhan i tu au
Ro
marsorin arsak las ni roha, haporseaon hu di patau.
10.
Manghatindanghon Haporseaon:
U : Tahatindangkon
ma haporseaonta i, songon na hinatindangkon ni donganta sahaporseaon di sandok
portibion. Rap ma hita mandok:
R : Ahu Porsea…..
11. Marende BE
No. 715: 1 “Balga Do HolongMi”
v Balga do
holongMi sitobus au, ai nunga mate Ho humophop au
Hulehon ma tu Ho saluhut ngolungki, sai ima padanki tu
Tuhanki.
12.
Tangiang Pangondianon:
13.
Marende BE No. 826:
2 “Gohi Au Tuhan”
v Gohi au Tuhan marhite HataMi, gohi
au Tuhan marhite HataMi.
Na mauas do tondinghu, o
Tuhan di HataMi, gohi au Tuhan marhite HataMi.
14.
Jamita: Psalmen 42: 1 – 6 (Jumolo ma dijaha turpuk on).
Di dia do Debatam? I do sungkunsungkun na jotjot ro
molo masa parungkilon na so boi paujungon di ngolu ni jolma. Halak na porsea
diunjuni do laho patuduhon huaso ni Debata laho paujunghon parungkilon i, hape
parungkilon i mansai maol jala ndang boi dipaujung jolma i sandiri.
Sungkunsungkun i boi ro sian angka na so porsea, alai laos boi do ro sian angka
na porsea i sandiri. Hita angka na porsea na marsitutu marsigantung tu Tuhan i,
ndang mangalehon ngolunta hibul tu parungkilon i sandiri, songon na masa nuaeng
na taadopi, Covid-19 ro tu sandok portibi on. Taboto do, ia Covid-19 on nunga
di duru ni huasonta laho mangadopi i. Laos marhite i do lam taantusi, ndang
sude boi dibagasan huasonta.
Di tingki na mangadopi na masa on, hita angka na porsea hibul ma marsigantung tu
Debata songon na jinouhon ni minggunta on, Quasimodogeniti,
songon posoposo na imbaru tubu, na marsigantung tu inana na patarushon ibana.
Parpsalmen on manggombarhon: “Songon panghalungunhonon ni ursa di angka guluan,
songon i do panghalungunhonon ni tondingku tu Ho, ale Debata. Mauas do
tondingku di Debata, di Debata na mangolu i, andigan pe tolhas ahu, asa huida
bohi ni Debata?” Panghalungunhonon ni na porsea i lam bagas naeng marnida bohi
ni Debata. Hibul ma rohanta marsigantung tu Debata, songon posoposo na
marsigantung tu inana, na so tuk dope mambahen manang aha sian dirina. Maus
jala masihol di pangurupion ni Debata parholong roha i.
Sihol ni roha ni angka na porsea i, dipapatar marhite
iluiluna arian dohot borngin, marungkil dibagasan tangiang dohot ende. Joujou
dohot anggukangguk lungun ni roha, anggiat dihalomohon Debata jala lomo rohaNa
papatarhon huasoNa dibagasan ngolunta angka na porsea di Ibana. Parsitutuon ni
angka na porsea boi taendehon dibagasan serep ni roha nang iluilunta tu Debata,
holan tu Debata sambing. Dihalomohon Debata do halak partigor na bojok marroha.
Halak na porsea, na use dihilala rohana dibagasan
marningot hinauli ni uduran ni na torop manopot Debata, huhut marsoara olopolop
dohot pujipujian. Masihol bongot tu bagas ni Debata mambahen rohanta tarihot tu
Debata sandiri. Sihol ni roha i pahehehon roha na marsaor rap dohot angka na
porsea i. Dibagasan sihol dohot roha na ingot tu bagas ni Debata, hita
papatuhon dirinta tu huaso ni Debata na bongot tu bagasan ngolunta. Debata
bongot tu bagasan dirinta, songon i nang di bagasan diri ni angka donganta
sahaporseaon. Debata naung gabe daging dibagasan diri ni Jesus Kristus, nunga
mate ala ni dosanta, nunga tartanom jala nunga mulak mangolu di ari patoluhon,
laho pahehehon hita sian hamatean, mamboan hita tu parsaoran di ngolu na so ra
suda raphon Debata Ama. On ma sihol ni rohanta asa taida bohi ni Debata na
mangolu i. Ngolunta na masihol marnida Debata, jala Debata bongot tu dirinta, i
ma gabe hagogoonta mangadopi nasa parungkilon dohot sitaonon na masa nuaeng di
portibi on.
Hita angka na porsea hibul pasahathon dirinta tu
Debata, manghasiholi jala manghalungunhon lomo ni rohaNa sambing manjadi
dibagasan ngolunta tingki sonang manang susa pe, tingki hipas manang marsahit,
tingki demak manang margalunsang. Di na songgop nuaeng mara Covid-19 tu portibi
on, naeng hita pasahat dirinta tu Debata na mangalehon gogo di hita laho
mangadopisa. Raphon parpsalmen i naeng ma hita manjouhon tu dirinta: “Boasa
sai tungki ho, ale tondingku, jala boasa rusak ho dibagasan ahu? Haposi ma
Debata, ai sai na pujionku dope Ibana, hatuaon ni bohingku jala Debatangku”.
Tondi na tungki jala rusak pagalehon saluhut pamatangta. Roha na bojok jala manghaposi
Debata, mambahen tondi marhagogoon jala togu mangadopi parsorion ni ngolu. Roha
mauliate mamuji Debata patubuhon las ni roha dohot pir ni tondi. Jesus Kristus
naung hehe i, mangalehon gogo tu hita mangadopi sitaonon ni ngolu sahat ro di
na bongot hita tu parsaoran na manontong i, i ma hangoluan na so ra suda. Tuhan Jesus manghaholongi hita. Amen. (Pdt. Dr. Martongo Sitinjak
- Kepala Departemen Koinonia HKBP).
15. Marende BE
No. 736 : 1 “Jesus Haposanhu” (Pasahat
Pelean)
v Jesus haposanhu unang ma pasombu, au di hapunjungan, di na so
mardongan.
Ho tongtong donganhu di
pardalananku, Jesus haposanhu unang au pasombu.
Ho tongtong donganhu di
pardalananhu, Jesus haposanhu unang au pasombu.
16.
Rap Mandok : Tangiang Ale Amanami + Mangendehon: Amen, Amen, Amen.
Pelean Parmingguon di bagas ni Keluarga :………………………………………………..
Godangna : Rp..……………………………………………………………….
“Selamat Hari Minggu, Tuhan Memberkati”.
.jpg)
Komentar
Posting Komentar