Minggu Jubilate, tanggal 03 Mei 2020 (Di
Bagasna Be)
&
Ev.: 1 Kronika 16: 31 - 36 & Ep.: Epesus 5: 15 – 21
Topik: Marolopolop Ma Tu Debata.
I.
Pangaradeaon:
1. Parmingguon on diuluhon Ama
manang Ina.
2. Dipillit ma na mambaen tangiang
jala diparade hian ma: Bibel dohot inganan ni pelean.
II. Parmingguon: (Andorang So Masuk:
Martangiang na hohom ma hita).
1.
Marende BE
No. 565: 1 + 4 “Las Rohangku Lao Mamuji”
v Las
rohangku lao mamuji Debata Parholong i,
Songon bunga na mangerbang di na binsar ari i.
Arsak, dosa, haporsuhon mago dibaen asiMi.
Las ni roha na manongtong lehon di au Tuhanhi.
v
Rap ma
hita mangendehon sangap di GoarNa i.
Tapangiar soaranta lao mamuji Tuhan i.
Sun do holong ni rohaNa na so marnamontok i.
I do pasadahon hita salelenglelengna i.
2. Votum – Introitus – Tangiang: (U =
Uluan, R = Ruas, S = Sude).
U: Marhitehite Goar ni Debata
Ama dohot Goar ni AnakNa Tuhan Jesus Kristus dohot Goar ni Tondi Parbadia, na
tumompa langit dohot tano on. Amen. Marolopolop tu Debata ma ho, ale sandok
tano on! Endehon hamu ma hamuliaon ni GoarNa, marmulia bahen hamu pujipujianNa.
Dok hamu mandok Debata: Tung na songkal do angka pambahenanMu! Binahen ni
hinatimbul ni gogoM ingkon marsomba tu Ho angka musuM. Haleluya...
R: (Mangendehon): Haleluya, Haleluya, Haleluya!
U: Martangiang ma hita: Ale Tuhan Debata, Pargogo na so hatudosan! Na
mandok mauliate do hami tu Ho, ala dipapatar Ho dohot tu angka na so tumanda Ho
AnakMu Tuhan Jesus Kristus. Sai asi rohaM, sai paian ma di hami ro di
pinomparnami Barita na Uli i, jala pararat ma i tu saluhut bangso, asa binsar
sondang ni hasangaponMi dohot di angka na hundul di haholomon dohot na
nilinggoman ni hamatean marhitehite Anak haholongan ni rohaM, Tuhan Jesus
Kristus, Tuhannami. Amen.
3.
Marende BE
No. 125: 4 “Marlasniroha Hita On”
v O Jesus, tatap hami on, sai pargogoi sude.
Marhitehite TondiMi, pasauthon angka patikMi.
Mambaen rarat baritaMi, di nasa jolma pe, di
nasa jolma pe.
4. Patik:
U: Patik ni Debata
sihangoluhonta di minggu Jubilatesadari on dienaet sian 1 Tessalonik 5: 16 – 18.Tongtong ma hamu marlas ni roha! Unang
mansadi hamu martangiang! Mandok mauliate ma hamu siala saluhutna! Ai i do
dipangido Debata sian hamu marhitehite Kristus Jesus. I do sahatna… Antong rap mangido gogo ma hita
sian Tuhan Debata.
S: Ale
Tuhan Debata, sai pargogoi ma hami mangulahon na hombar tu PatikMi. Amen.
5.
Marende BE
No. 683 : 1 “Di Adopanmu Jesus”
v
Di adopanMu Jesus, lea tutu do diringkon,
Dibaen godang ni dosangkon, di adopanMu
Jesus.
6. Manopoti Dosa:
U : Ale
Tuhan Debata, Pargogo na so hatudosan jala Ama Parasiroha! Ndang lomo rohaM
mida hamatean ni pardosa; mulak ma nian parjahat i tumadingkon dalanna, asa
mangolu ibana, i do dipangido rohaM. Ala ni i umbahen hupangido hami; sai
sundati ma torutoruM asa unang mangonai be tu hami. Sai sesa sude dosanami, asa
mangolu hami di bagasan asi ni rohaM. Sai pargogoi ma hami, asa margogo hami,
marhitehite Tuhan Jesus Kristus Tuhannami. Amen.
S: (Mangendehon):
BE No. 227: 1 “Jesus Ngolu Ni Tondingku”
v
Jesus
ngolu ni tondingku, Ho do haporusanhi.
Gok di Ho na ma diringku, ro di nasa
langkaki
U : Bagabaga ni Debata taringot tu
hasesaan ni dosanta: Munsat pe angka dolok, jala humuntal pe angka robean,
alai anggo parasi ni rohangKu na so tupa munsat sian ho, jala padan ni
hadameonKu na so tupa humordit, ninna Jahowa Siasi i ho. Hasangapon ma di
Debata na di ginjang!
R : Amen.
7.
Marende BE
No. 806: 1 “Aha Pe Masa Di Ngolumon”
v
Aha pe masa di ngolumon, Tuhan manjaga ho,
HolongNa do mangondihon ho, Tuhan manjaga
ho.
Tuhan manjaga ho, las pe roham marsak pe ho,
Sai diramoti ho, Tuhan manjaga ho.
8.
Epistel:
Epesus 5:
15 – 21 (Dijaha Responsoria sian Bibel).
(Dung simpul
responsoria, didok uluan ma: I do
sahatna. Martua do angka na
tumangihon Hata ni Debata jala na umpeopsa. Amen).
9.
Marende BE
No. 443: 1 “Dung Tuhan Jesus”
v Dung Tuhan Jesus nampuna au, songgop dameNa,
biarhu lao.
Taripar gogo, ngoluNa i, nasa dosangku naung sae do i.
Tabaritahon holongNa i, di dia Tuhan, tudoshon i?
Tuk manumpahi, tarlobi da? Sasada Jesus
pinuji ma.
10. Manghatindanghon Haporseaon:
U : Tahatindangkon
ma haporseaonta i, songon na hinatindangkon ni donganta sahaporseaon di sandok
portibi on. Rap ma hita mandok:
11.
Marende BE
No. 428: 1 “Ho Na Loja Ho Na Sorat”
v Ho
na loja, ho na sorat, pos roham di Debatam.
Di na hansit, di na borat, dipapita do
roham.
Unang ganggu rohamuna di pandok ni Debatam.
PasautonNa bagabaga, pos roham di Debatam.
12.
Tangiang
Pangondianon:
13. Marende BE No. 435:
1 “Marolopolop Tondingki”.
v Marolopolop tondingki ai naung ditobus Jesus i.
Hamu sude, bege ma i, sai las rohangku mandok i. Sonang ni tingki
i,
Dung jumpang Jesus Tuhanki!
Tondi na mangajari au, tarbaen marlas
Ni roha au! Sonang ni tingki i, dung jumpang Jesus Tuhanki.
14. Jamita: 1 Kronika 16: 31 - 36
“Marolopolop Ma Tu Debata”
Huria ni Tuhanta na hinaholongan di
bagasan Jesus Kristus…!
Godang do na
mambahen roha ni jolma asa marolopolop jala marlas ni roha di bagasan dirina. Isara ni dakdanak, marolopolop ibana
molo dapotan silehonlehon sian natorasna, ala juara di kalas, dapot juara ibana
di pertandingan na pinatupa di sikolana. Molo halak na magodang (dewasa),
marolopolop uju tombus masa panen, dapot gelar, jabatan, pangomoan na
godang dohot na asing. Angka na patut do i, molo marolopolop jala marlas ni roha
hita di tingki halehetansa.
Nuaeng, songon
dia do hita asa marolopolop jala marlas ni roha di situasi pandemi virus Corona
Covid-19 on? Hata ni Debata mamanghulingi jala mangarahon hita, asa marolopolop
tu Debata.
Huria ni Tuhanta na hinaholongan di bagasan Jesus Kristus…! Aha do na boi putihonta marhite
turpukta jamita sadari on?
1. Mandok mauliate ma hita tu Debata ala HolongNa na balga i.
Godang ma tongon
na binahen ni Debata di ngolunta sahat tu tingki on. Ima tanda ni holongNa na
balga i tu hita. Boi dope tahilala holongNa tu hita? Manang gabe ndang boi hita
marningot Tuhan Debata ala ni Corona Covid-19 on, na gabe parungkilon na balga
di ngolunta? Aha pe na masa, ingkon taingot tongtong Holong ni Roha ni Debata
na mansai balga marhite AnakNa Jesus Kristus, na olo tu hamatean, asa dapotan
haluaon na manongtong hita marhite i.
Di ay. 34 didok:
“Mandok mauliate ma hamu di Jahowa, ai na
basa do ibana, ai ro di saleleng ni lelengna do asi ni rohana”. Molo mandok
mauliate hita, ndada holan uju marlas roha, alai mandok mauliate tu Debata, dohot
do uju mangadopi parungkilon. I do umbahen na didok di 1 Tesalonik 5: 18
“Mandok mauliate ma hamu siala saluhutna” (Indonesia: Mengucap syukurlah dalam segala hal). Boasa? Ala marhite parungkilon pe, boi jumping hita angka na arga (hal positif) di ngolunta. Isarana, ditogihon hita asa mangolu di bagasan
hahipason, ias pamatangta gabe hipas ma hita, mangula jala marsaor di tonga ni
bagasta be laho jumalo haluaon (supaya selamat dari virus Corona Covid-19).
2. Marolopolop ala Pambahenan ni Debata na Paluahon hita.
Goar ni
Minggunta sadarion: Jubilate, na marlapatan: Marolopolop tu Debata ma sandok tano on. Songon
Bangso Israel marende, marolopolop mamuji Jahowa ala panarihonon ni Jahowa tu
bangso i. Songoni ma nang hita, marolopolop tu Jahowa. Sahalak Parjamita di
Inggris, na margoar Charles H. Spuergon mandok: “Ketika kita hendak memulai suatu hari, jadikanlah pikiranmu sebagai
mazmur, doamu sebagai dupa, dan nafasmu sebagai pujian”. Hit ape ingkon
manghangoluhon i. Olo mamangke pingkiranta songon bahen pujian, tangiangta i gabe
pelean na hushus di adopan Debata, jala hosanta tongtong mamuji pasangaphon
Ibana. Molo taulahon na songoni, porsea ma hita: Pasti do hita margogo
mangadopi jala manalpuhon pandemi Covid-19 on sahat tu ujungna.
Huria ni Tuhanta na hinaholongan
di bagasan Jesus Kristus…!
3. Marpanindangion.
Saluhut na tinompa
ni Debata ingkon manghatindanghon huaso ni Debata. Langit dohot tano na marlas
ni roha; laut ro di isina marhasakhasak, ladang dohot sude angka hau na di
tombak marolopolop manghatindanghon Balga ni Holong ni Debata. Suang songon i
nang hita, ruas ni huria, naung tinobus
ni Kristus, ingkon manghatindanghon Balga ni Holong ni Debata marhite
pambahenanNa tu hita, saleleng mangolu hita. Jala sude na tinompa ni Tuhan
Debata ingkon manghatindanghon Huaso dohot Holong ni Debata na manompa
saluhutna. Amen.
15.
Marende BE
No. 213: 1 “Dung Sonang Rohangku”
(P. Pelean)
v
Dung sonang rohangku, dibaen Jesus i, porsuk pe hutaon di son.
Na pos do rohangku di Tuhanta i, dipasonang
tongtong rohangkon.
16. Tangiang Ale Amanami + (Mangendehon) Amen,
Amen, Amen.
Pelean Parmingguon di Keluarga (03 Mei 2020) :…………………………………………
Godangna : Rp..……………………………………………………………….
“Selamat Hari Minggu, Tuhan Memberkati”.
.jpg)
Komentar
Posting Komentar