ACARA PARNINGOTAN ARI HAHEHEON NI TUHAN JESUS

HKBP SILAEN - RESORT SILAEN, MINGGU 08 APRIL 2012.

 

1.      Pangaradeon.       (U=Uluan,       R=Ruas,          S=Sude).

U: Huria na hinaholongan ni Tuhan Jesus Kristus. Amanami, inanami, hahaanggi pinaribot pe. Las ma rohanta ala nunga monang Tuhan Jesus maralohon huaso ni hamatean i. Hamonangan ni Jesus na gabe hamonangan nang di hita pe. Ima na tapestahon di ari minggu sadari on. Ala ni i, hupasahat hami ma tu hamu: Selamat Paskah Ma Di Hita Saluhutna.

R: Selamat Paskah ma tutu.

U: Martangiang na hohom ma hita dibagasan rohanta be, pahibulhon roha dohot pikiranta laho marparsaoran na badia rap dohot Debata di tongatonga ni huriaNa. (Diiringi soara ni organ na angonangon BE. No. 814 sa-ayat)

U:  Tapangiar ma soaranta mamuji Debata ala nunga ditaluhon AnakNa Tuhan Jesus Kristus banuatoru, marhite na Marende sian BE. No. 93: 1-3 “Pesta Paskah Hatuaon”.

2.      Marende No. 93: 1-3         “Pesta Paskah Hatuaon”                                          BL. 94

      1.  Pesta Paska hatuaon! Pesta Paska haluaon. Sian hamatean i, sian hamatean i.

     Tuhan Jesus do pasuang, hangoluan hasonangan. Tu saluhut jolma i, tu saluhut jolma i.

      2.  Talu ho banua toru, ndang tarbahen tioponmu. Raja Siparngolu i, Raja Siparngolu i.

Hamatean, hamagoan na so pola habiaran, nunga talu i sude.

-  m u s i k -  (ayat 3 jongjong)

3. Tuhan Jesus do na monang, Tuhan Jesus do pasuang.Las ni roha dame pe,las ni roha dame pe

    Dongan golom ma hataNa, na porsea di Ibana. Ndang tabahen mago be

3.      Votum-Introitus-Tangiang

U: Marhitehite Goar ni Debata Ama dohot Goar ni AnakNa, Tuhan Jesus Kristus dohot  Goar ni Tondi Parbadia na tumompa langit dohot tano on. 

R: Amen.

U: Pinuji ma Debata jala Ama ni Tuhan Jesus Kristus, na tumubuhon hita paduahalihon sian godang ni asi ni rohaNa tu panghirimon na mangolu marhitehite haheheon ni Tuhan Jesus Kristus sian na mate. Haleluya.

S: (Mangendehon) Haleluya… Haleluya… Haleluya..

U: Martangiang ma hita: Ale Tuhan Jesus, Tuhannami. Na mandok mauliate do hami tu Ho, ala ditaluhon Ho do dosa dohot hamatean marhitehite hamamateMi, ala disondangi Ho do tanomannami, asa  marpanghirimon na mangolu hami ala ni haheheonMi. Ndang pola mabiar be hami mida hamatean, ai Ho do ulunami, ruasMu do hami. Dipaunsat Ho do hami sian haholomon tu hatiuron, sian hamatean tu hangoluan. Antong pargogoi ma hami mamuji dohot mangoloi Ho ariari, pasangaphon Ho di bagasan haporseaon na mangolu paima sahat hami tu lambungMu. Amen. (hundul).

4.      Koor         : 1. Naposo Bulung     2. Hatopan

5.      Marende Sian BE. No. 95: 1+3    “Ngot Ma Ho Dijou Soara”                           BL. 222

      1.   Haleluya taendehon, nuaeng di ari haheheon, Tuhanta Siparmonang i.

            Ai malua do Ibana, haruar sian tanomanna, na talu hamatean i.

            Sun ulaonNa i, dibaen Tuhanta i haleluya. Naung sahat di Tuhanta i upana na sumurungi

  3. Na so pola habiaran, ni hita on be hamatean, ai hit ape sai hehe do.

Molo burju taihuthon, Tuhanta i di parungkilon, sai ingkon tu lambung na ro.

Diboan Jesus i, do hita on muse tu lambungNa, parmonang i.

Sai saut ma i, binaen ni hagogoonMi.

6.      Patik

U: Patik ni Debata di Pesta Parningotan Haheheon ni Tuhan Jesus, tarsurat di Rom 7: 4, songon on ma didok di si: Songoni ma antong hamu, ale angka dongan: Nunga mate hamu di patik i marhitehite daging ni Kristus; asa na asing manggogomi hamu, i ma Ibana naung hehe sian na mate, asa di Debata hita marparbue. Antong rap mangido gogo ma hita sian Tuhan Debata.

S: Ale Tuhan Debata, sai pargogoi ma hami mangulahon na hombar tu patikMi.

7.      Koor         : Ina Senen

8.      Marende Sian BE. No. 90: 2+3    “Sai Marlas Ni Roha Hita”                BL. 175

2. Anggo utang ni dosangku Digarari Jesus i

          I do haporseaonku Di na tinaonNa i

          Nunga tulus patik i Nunga mintop rimas i

          Di na hehe i Ibana Ro di au hangoluanNa

      3. Ia ho banuatoru Nunga harhar talimi

          Ai dung hehe na gumogo Loha do hurunganmi

          Surgo i tarungkap do Dung ditaban Jesus ho

          Gabe tu hangoluanna  Diarahon do donganna.

9.      Manopoti Dosa

U: Tatopoti ma dosanta tu adopan ni Debata martangiang ma hita: Ale Tuhan Debata, Amanami parasi roha na sumurung, Ama ni Tuhan Jesus Kritus Tuhannami. Ho do Debata pargogo na so hatudosan, sitompa nasa nasa na adong, paruhum na tigor, na manguhumi jolma manisia. Na ro do hami nuaeng tu joloM manopoti dosanami, angka na hula hami di bagasan panggulmiton ni ngolunami. Ndang huhaholongi hami Ho sian nasa rohanami dohot nasa ateatenami dohot nasa pikirannami dohot nasa gogonami; nang dongannami jolma ndang huhaholongi hami doshon dirinami sandiri. Ale Tuhan, ndang talup hami jongjong di adopanMu ala ni angka dosanami i, alai mangasahon asi ni rohaM do hami  jongjong mangido tu Ho,  asi ma rohaM di hami, sai marpamuati ma rohaM di dosanami i.

R:  (Mangendehon) BE. No. 683: 1                     “Di AdopanMu Jesus”           

            1. Di adopanMu Jesus, lea tutu do diringkon.

                Dibaen godang ni dosangkon, di adopanMu Jesus.

      U: Hata bagabaga ni Debata taringot tu hasesaan ni angka dosanta:

    Songon on do hata ni Tuhan Jahowa: Nunga diarsahi Ho Ahu marhite sian angka dosaM, jala nunga dilojai Ho Ahu marhite sian angka dosam. Ahu tutu, Ahu sandiri manalesei angka pangalaosim ala ni hadirionKu, jala ndang be hupaingotingot angka dosam. Hasangapon ma di Debata di ginjang.

S: Amen.

10.  Koor         : Ina Pasar

11.  Marende Sian BE. No. 94: 2+3    “Ale Tondingku Naung Hehe”                                   BL. 44

2. Talu sibolis dibahen Tuhanta, nang hamatean nang dosa sudena.

          Sai dihalashon rohanta ma i, :,:pangoluonna do hita sude:,:

      3. Tahaburjuhon mangalo dosanta, jala tabaen Tuhan Jesus donganta

           Pos ma rohanta di Tuhantai, :,:pamonangoNa do hita sude:,:

12.  Epistel 

U:  Turpuk Epistel di Pesta Parningotan Haheheon ni Tuhan Jesus, tarsurat di Ulaon ni Apostel 10: 34-43 tajaha ma marsingkat sorin: Dungi manghuling ma si Petrus, ninna ma: Nunga tangkas dapot rohangku, na so siida bohi Debata!

R: Sian ganup bangso do tahe jangkononna angka na manghabiari Ibana jala mangulahon hatigoran.

U: Ditongos Ibana do hataNa tu angka anak Israel, laho mamaritahon dame marhite sian Jesus Kristus; Ibana do Tuhan ni saluhut.

R: Diboto hamu do hata na masa di liat tano Judea na mamungka sian luat Galilea, dung salpu pandidion na binaritahon ni si Johannes i.

U: I ma taringot tu Jesus na sian Nasaret, na miniahan ni Debata marhite Tondi Parbadia dohot hagogoon; na mardalani do Ibana mambahen na denggan jala pahisarhon sude angka na pinatunduk ni sibolis, ai didongani Debata do Ibana.

R: Hami do manghatindanghon saluhut na binahenNa i di tano Jahudi dohot di Jerusalem; dipusa nasida Ibana, digantunghon do tu hau.

U: Dipahehe Debata do Ibana di ari patoluhon, dilehon do Ibana tu hapataron

R: Ndang apala tu saluhut halak, tu angka sitindangi do na pinillit ni Debata sian nahinan; i ma hami, angka na mangan jala minum rap dohot Ibana, dung hehe Ibana sian na mate.

U: Jala didokkon do hami manjamitahon dohot manghatindanghon tu na torop, paboa Ibana do i, na tinodo ni Debata hian gabe panguhum di angka na mangolu ro di angka na mate.

R: Saluhut panurirang i, manghatindanghon taringot tu Ibana: Jaloon ni ganup na porsea di Ibana hasesaan ni dosa marhite sian GoarNa.

U: I do sahatna. Martua ma na tumangihon hata ni Debata, jala na umpeopsa.

S: Amen.

13.  Koor         : Ina Immanuel

14.  Marende Sian BE. No. 92: 1-2     “Puji Ma Na Manaluhon”                  BL. 178

1.  Puji ma na  manaluhon Dosa hamatean i

            Puji ma na pangoluhon Saluhut pardosa i

            Jesus na dung mate i Las roham o huriaNa 

            Ala na mamillit ho, Jesus i mangolu do

       2. Tole hita mangendehon Halalas ni roha i

           Dohot marolopolophon Sangap ni na monang i

           Na tongtong mangolu i Tole hita mangendehon

           Halalas ni roha i  Di parngolu Jesus i.

15.  Manghatindanghon Haporseaon

U: Tahatindanghon ma Hata Haporseaonta i, songon na hinatindanghon donganta sahaporseaon di sandok portibi on, rap ma hita mandok:

16.  Koor         : Ina Gabungan

17.  Tingting    :

18.  Koor         : Ama

19.  Tangiang Pangondianon

20.  Marende Sian BE. No. 91: 1…     “Hatuaon Do”                        (Papungu Pelean)        BL. 55

1.               Hatuaon do las ni roha do, hangongot ni Tuhanta i.

            Mago do hita ngot ma Tuhanta, las be, las be ma rohanta i.

            Mago do hita ngot ma Tuhanta, las be, las be ma rohanta i.

       2.   Hatuaon do las ni roha do Hangongot ni Tuhanta i.

            Monang  do Jesus talu sibolis las be, las be ma rohanta i.

            Monang  do Jesus talu sibolis las be, las be ma rohanta i.

- m u s i k -

      3.    Hatuaon do Las ni roha do Hangongot ni Tuhanta i.

            Mungkap do dalan tu hangoluan, las be, las be ma rohanta i.

            Mungkap do dalan tu hangoluan, las be, las be ma rohanta i.

      4.    Hatuaon do Las ni roha do Hangongot ni Tuhanta i

            I ma gogonta  dompak dosanta, las be, las be ma rohanta i.

            I ma gogonta  dompak dosanta, las be, las be ma rohanta i.

21.  Jamita: Markus 16: 1-8

22.  Marende No. 96: 1..         “Nunga Talu Hamatean” (Papung Pelean)             BL. 101

1.      Nunga talu hamatean, dibaen Tuhan Jesus i.

Ai na hehe do Ibana songon na nidokNa i.

Reff.:    Haleluya, haleluya nunga hehe Jesus i.

            Haleluya, haleluya nunga hehe Jesus i.

2.      Ia angka boruboru, lao do tu tanoman i.

Ndang di si be Tuhan Jesus, nunga hehe sian i.

Reff.: Haleluya…

                  - m u s i k –

3.   Marlas roha be ma hita, ala hehe Jesus i

      Ai malua sude hita, sian hamagoan i.

      Reff.: Haleluya…

4.   Sai tapuji ma Tuhanta, na marholong roha i.

Tapasangap ma Ibana, na marasi roha i.

23.  Tangiang Pelean + Tangiang Ale Amanami + Pasupasu

Selamat Hari Paskah.

Syalom, Tuhan Memberkati.

Pdt. A. Tambun, STh.