10. Nunga Dipabalik be... Oma...

Somalna angka ina na tinggal di Topi Tao mansai malo do mambahen ikan jahir na tinombur, na mansai

tabo panganon. Adong ma sada ina na mabalu, anakna holan sada do tadingtadingan ni amanta naung jumolo marujung ngolu i.

Laho pamurahon hita panjaha, binahen ma goar ni dakdanak i, si Dasif. Ba... inanta i Nai Dasif (Selanjutnya: N. Dasif). Si Dasif on nunga marumur 9 taon jala nunga marsikola di kalas opat SD. Nang pe kalas opat SD dope alai nunga diboto ibana mambuat dengke, mardoton tu tao.

Di sada tingki sahat ma barita manang tona na naeng ro tulang ni si Dasif manopot halak si Dasif on. Tulang ni si Dasif naeng ro, i ma isi ni tona on.

“Di tingki na jonok pasti ro nama ibotoki. Jala nunga masihol iba muse tu ibana ai nunga leleng na so hea be pajumpang hami. Ala ni i, husuru ma anakku si Dasif lao mangalului dengke. Molo pas do nasib ni ibotoki pasti do adong annon dapot ni anakku si Dasif on”, ima disangkapi inanta i.

Hormat do inanta N. Dasif i tu hulahulana. Holan barita dope dibege ibana mandok naeng ro ibotona i mintor mansai las situtu do rohana. Gariada tahe dihalaputi dope naeng mambahen na denggan martamue manjangkon manang manamue ibotona i, intap ni na tarbahennasida.

Dijou inanta i ma si Dasif: “Dasif... molo adong dapotmu dengke na balga. Papulik ma jolo da. Unang jual, baen ma jolo tu kerengan. Ai mandok naeng ro nama tulangmu tu bagasta on. Molo adong na balga, parsakiloan sada unang pola jual. Angka na gellenggelleng i ma jual”.

Burju do si Dasif on martulang, ala angka na denggan do diajarhon omakna tu si Dasif taringot tu angka tulangna, lumobi ma tu tulangna na naeng mandok ro on. “Olo... oma... Molo adong dapothu na balga hupapulik pe”, ninna si Dasif mangalusi omakna i.

Songon naung somal diulahon si Dasif siganup ari, mulak marsikola lao ma ibana tu tao mardengke manang mardoton.

Ari parjolo, adong do dapot ni si Dasif dengke alai gellenggelleng sude, nanggo 8 ekor sakilo pe ndang adong parbalgana. Di ari paduahon, lam marsitutu do nian si Dasif mangalului dengke hombar tu pangidoan ni omakna i. Alai, nasib ndang berpihak dope tu si Dasif, tong do songon na parjolo i hasilna.

Di ari patoluhon, dipatibu si Dasif ma sian partingkianna na somal borhat tu tao lao manaon dotonna. Jala dung botari, songon na somal dienet si Dasif ma dotonna. Lumayan do godang ni dengke na dapotna i, alai holan sada ma parsatongakiloan. Dibahen si Dasif ma i tu kerengan dohot pigapiga angka jahir na gelleng donganna.

Tutu ma... dung paopat arihon, ro ma tulang ni si Dasif i, antar hira pukul 2 (dua) siang. Denggan do dijangkon nasida haroro ni tulang ni si Dasif jala manghatahatai nasida na tolu di jabu. Dung adong nasida sajom na manghata i. Di suru inanta i ma si Dasif mangalap dengke na sinimpanna di kerengan i. Tulangna i pe, laos istirahat modom. Uju modom tulang ni si Dasif i, dilompa N. Dasif ma dengke jahir i, masak na tinombur.

Adong do lobi hurang sampulu ekor jahir na tinombur ni inanta N. Dasif i, alai holan sada do na balga parsatongakiloan. Di dongani si Dasif do omakna patupahon (mangalompa) dengke jahir i. Didok si Dasif ma tu omakna:

“Ala ni maolna dapot dengke na di bagasan 3 ari on, ingkon di ahu do samponggol manang sambola na balga i da oma...”, ninna si Dasif.

“Olo... anakku. Molo na balga on, paling do annon sambola habis ni tulangmu i. Alai jumolo ma annon tulangmu mangan da, ai mulak do annon tulangmi. Molo hita pukul onom (6) tu pukul pitu (7) pe hita mangan ”, ninna omakna i mangalusi si Dasif.

“Olo oma...”, ninna si Dasif mangalusi omakna i di bagasan halambohon.

Boho di pukul lima (5) dungo ma tulang ni si Dasif jala martapian. Uju martapian tulang ni si Dasif i dipatupa (dihidangkan) N. Dasif ma sipanganon tu ibotona i. Dipatupa do dengke jahir na tinombur na umbalga i di sada piring, dohot angka dengke na gumelleng di sada piring na asing. Dungi mangan ma tulang ni si Dasif i. “Rap mangan ma hita ito dohot bere i”, ninna tulang ni si Dasif mangarahon N. Dasif dohot si Dasif asa rap mangan.

“Parjolo ma ito mangan, molo hami annon pe mangan dung jolo golap otik”, ninna omak ni si Dasif. Mangan ma tulang ni Dasif i. Dipaholang N. Dasif ma otik hundul tartungkan inganan ni TV, naeng manonton TV.

Alai molo si Dasif marmeam do di alaman dohot donganna. Sasahali dibereng si Dasif do tu tulangna na topet mangan i. Ndang hea songoni si Dasif i nian, alai songon na nidokna i: Ala ni maol ni dengke dapotna di bagasan tolu ari i, ingkon diibana do ninna sambola na umbalgana i.

Tabo do lompalompa ni N. Dasif on, tulang ni si Dasif i pe pola martambu idahanna ala ni tabona dihilala. Hape sasahali sai dibereng si Dasif do sian alaman ni jabuna i, atik na toho do na nidok ni omakna i, “Holan sambola do habis ni tulangmu i”.

Lam diparrohahon si Dasif ma tulangna i mangan. Ala ni tabo ni jahir na tinombur i, ndang pola sadia leleng habis sambola dibahen tulangna i. Hape pas naeng mambalikkon tulangna i, asa juhut na sambolana i tu ginjang dibereng si Dasif jala gabe didok si Dasif ma songon on:

“Oma.... nunga dipabalik tulang be. Tulang... uluna i ma allang da”, ninna si dasif marsoara na gogo.

Ha!!!
Di hamu amanami, inanami saluhut tahe na manjaha cerita on. Aha ma na hal positif na boi putihanta sian cerita on?. Tapaandar ma......
Horas manogot ma di hita saluhutna.