6. Ala Ruma Makan Islam, Ndang Martangiang.

Adong sada ruma makan di samping ni bengkel mobil di sada kota madya. Parjongjong ni ruma makan on ala adong di si bengkel jala sai rame do halak ganup ari marbengkel mobilna ro tu si.

Boi dohonon angka na mangan na ro tu ruma makan i angka parkarejo ni bengkel i do dohot angka halak na ro marbengkel tu si. Metmet do ruma makan i, ai mejana pe holan dua do.

Di sada tingki, topet jam mangan sekitar 12.30 masuk ma sahalak ama tu ruma makan i jala hundul ma amanta i tu bangku parujung (Amanta on sahalak parhalado). Disiamunna adong dibereng sagalas kopi itam. Mintor tubu tu pikiran ni amanta parhalado i, berarti ndang mulak dope nampunasa kopi on ai so adong dope nanggo satonga diinum nampunasa i, kopi i. Ra na lao do ibana mangida mobilna na sedang dipature parbengkel i.

Dijalo parhalado on ma indahanna. Dung ditaruhon parkode i indahan i, dungi martangiang ma amanta parhalado i jala mangan ma ibana. Ndang sadia leleng ro ma dua halak ama. Sahalak antar poso dope jala sahalak nunga antar tua. Amanta na umposo i ro tu meja ni parhalado i jala hundul di lambung ni parhalado i, dungi diinum kopina i.

“Mangan amang” ninna parhalado i laho manise na ro tulambungna i.

“Olo amang” ninna ninna amanta i. Amanta na tumua i hundul di bangku ni meja na sadanari.
Dungi dijalo amanta na umposo i, ma indahan nasida na dua.

“Baen hamu jolo indahan nami inang”, ninna tu parkode i.

“Olo, amang”, ninna parkode i.

Ndang sadia leleng, ditaruhon inanta parkode i ma indahan nasida na dua. Mangan ma nasida. Amanta na umposo i mangan alai ndang martangiang. Na tumua i, mangan dung jumolo martangiang. Rap mangan ma nasida na tolu di kode i, alai jumolo do mangan amanta parhalado i.

Nunga sae mangan amanta parhalado i, alai angka amanta na dua halaknai mangan dope.
Dibayar amanta parhalado i ma, huhut didok:
“Sadia indahannami on inang parkode”, ninna amanta parhalado i.

“Piga halak amang?” ninna parkode i.

“Dua halak inang”, ninna parhalado i.

Andorang so dialusi inanta parkode i, didok amanta na umposo i ma:

“Ndang pola amang, ahu pe mambayar na di hami, ai dua halak hami dohot bapa”, ninna.

Antong tolunsa ma hami inang ninna parhalado i ma tu inanta parkode i jala saut ma dibayar amanta parhalado i indahan nasida na tolu.

Disungkun amanta na tumua i ma tu amanta na umposo i (Anakna): “Ai ise huroa nasida?” ninna bapa ma tu anakna i. Sip anakna i, ndang diboto mangalusi. Ai so marsitandaan.

Langsung didok amanta parhalado i ma: “Ndang marsitandaan hami amang. Na hubereng do amanta on nangkin naeng mangan ndang martangiang, i do asa hubayar indahanmuna”.

Didok amanta na tumua i ma: “Ima da amang, molo ahu martangiang do nangkin. Alai ibana ndang martangiang ala diboto ibana parkode on Islam”, ninna amanta na tumua laho membela anakna i.

Didok amanta parhalado i ma tu amanta na so martangiang laho mangan i: “Ndang martangiang hamu laho mangan alai adong do na marholong ni roha tu hamu. Apalagi ma molo martangiang hamu lam godang ma na marholong ni roha tu hamu lumobi ma Tuhanta i, ala ni i mulai on gabe si partangiang ma hamu da amang”.

Dialusi amanta i ma: “Olo amang, mauliate godang ma di pambahenanmuna on”. Dungi lao ma amanta i ditinggalhon ma kode i.

Ha!!!!
Patuduhon ma haporseaonmu manang di dia pe. Martangiang ndada holan di tingki na une, alai dohot do di tingki na so une. Atik tung be tapingkiri: Molo adong di si na so saagama dohot hita: “Sotung tadok di bagasan rohanta: Ndang tingki na une on laho martangiang”, ninna rohanta.

Ala maraga Islam nampunasa ruma makan i ndang martangiang be hita lao mangan? Taingot ma amang: Hata Ni Tuhanta na mandok: “Na margogo situtu do tangiang ni partigor i molo dihaburjuhon” (Jakobus 5: 16b). Syalomm dan selamat Pagi. Tuhan Memberkati.

Cerita Non Fiksi ini, terjadi pada hari Kamis tanggal 31 Oktober 2019.
Percakapan dengan pihak Rumah Makan dalam Bahasa Indonesia karena Jawa dan Islam.
Percakapan lainnya dalam Bahasa Batak (Karena marga Situmorang).
Parhalado tidak mau menyebut inisialnya.