18. Isi Ni Dompet Sipaombun Rimas.

Adong ma sahalak ama na targoar pengusaha muda na berhasil di sada kota na balga. Memang sian na metmet pe, uju bajar sahat tu na marrumatangga tarida do haburjuonna dohot haringgasonna mangula angka siulaon.

Tingki metmet ibana uju di jolo ni natroasna padot do mulaulaon di jabu. Ndang marpili di ibana angka ulaon i. Isarani ulaon manuci piring pe olo do ibana. Ndang hea dipingkiri ibana, molo ulaon manuci piring bagian ni borua manang ulaon ni angka parompuan.

Na somal pe diulahon angka parompuan, isara ni manjomur abit manogotna i jala mambuat abit sian jomuran dung koring botari na i, jotjot do diulahon ibana. Uju sikola pe ibana, gabe anak haholongan ni guruna do siala ni ringgasna dohot ala ni malona.

Nunga marrumatangga amanta i jala nunga dipalumehon Tuhan Debata di tongatonga ni ruma tangga nasida tolu ianakkon jala anakna siangkangan nunga kuliah di sada perguruan tinggi na adong di kota i, semester tolu. Ruma tangga ni amanta i, boi dohonon ngolu sipartangiang do.

Nang pe mansai ronsot angka ulaon ni amanta i dohot ulaon ni inanta i, alai molo ulaon partangiangan di tongatonga ni keluarga nang di huria ndang hea hatinggalan nasida. Ala diharingkothon amanta dohot inanta i do ngolu partangiangon, gabe suan jala uhir do i nang tu ngolu ni ianakkonnasida.

Uju martangiang marsasahalak pe, marsiatangiangan do nasida. Amanta i manangiangkon inanta i dohot ianakonna. Inanta i manangiangkon amanta i dohot ianakkonna. Ianakkonna tumangiangkon natuatuana. Tung mansai diharingkothon nasida na saripe do tahe ulaon partangiangon i manang di dia pe nasida.

Di sada tingki dijumpai sahalak anakboru na mansai uli ma amanta i di sada inganan. Didok itoan i ma tu amanta i: “Nunga mansai leleng hamu ito huparrohahon, nunga lobi sataon gariada naeng dua taon nama. Nang pe naung marruma tangga ito, olo do ahu tu ho, bahen ma ahu gabe isteri na paduahon manang na patoluhon pe taho”. Memang, nang pe anakboru dope itoan i jala uli do rupana, alai molo rap mardalan nasida na dua hira na sabaya dope idaon ala ni jogi ni amanta i.

Umbege hata ni itoan i, tarsonggot situtu ma amanta i. Dimulana i, hira na naeng olo do amanta i. Alai, dibuka amanta i dompetna, dibuat isina i, dipanotnoti dungi dijaha… dungi mengkel suping amanta i.

Dungi dialusi amanta i ma itoan i: “Ndang ito. Lului ma si doli na asing na gabe sirongkap ni tondim. Molo diida ho pe ahu nuaeng gabe sahalak ama pengusaha muda na berhasil. Ndada holan ala ni hagogoonku i, alai na sai burju do inantaku dohot angka ianakkonku laho manangianghon ahu, ala ni i unang gugai ahu dohot rumatanggaku”, ninna amanta i huhut maninggalhon itoan i. Dungi borhat ma nasida na dua marsitopot ulaonna be.

Ulaon ni amanta on sasintongna, pimpinan ni sada perusahaan naung balga jala maju. Songon pimpinan (uluan) ibana somal do manguluhon rapot. Jala molo manguluhon rapot pe mansai jotjot do amanta on mambuka dompetna jala mangida isi ni dompetna i, jala mengkel suping jala mulak lambok muse ibana manghata i.

Di sada tingki marrapot ma nasida di kantor ni perusahaan i, na niuluhon ni amanta i. Alani ganjang ni rapot, jala ala maol dapot haputusan sanga do naeng gaor ala asingasing be pandapotnasida taringot tu sada topik sihataon (beda pendapat). Jala amanta i pe, sebagai pimpinan rapot nunga sanga naeng muruk situtu.

Alai nunga gabe hasomalan di amanta i, asal adong na maol diadopi ibana lumobi di bagasan na manguluhon rapot mintor... dibuka amanta i dompetna, dibuat isina i, dipanotnoti dungi dijaha… dungi mengkel suping… boi muse mulak lambok manghatai.

Ujungna mardalan ma denggan rapot i, jala marujung dibagasan dame dohot las ni roha. Sai songoni ma dibahen amanta i dibagasan ulaonna nang ngoluna, gabe malua ibana sian na pangarimason dohot sian pangunjunan.
Tarhatotong do angka ruas ni parrapot di pambahenan ni amanta na manguluhon rapot i. Jala haputusan sian rapot i pe ndang pola patubu hansit ni roha tu angka ruas ni parrapot.

Dung simpul nasida marrapot, bubar ma angka na torop i, alai molo amanta i dohot ajudanna hot dope di si. Na so panagaman ro ma muse sahalak amanta mulak mandapothon amanta pimpinan rapot i. Marsijalangan ma nasida, jala rap hundul nasida. Dung didok ma tu pimpinan rapot i: “Mantap amang jala luar biasa… Ndang tinagam boi songoni rapot i, denggan mardalan naeng pe nunga sanga naeng gaor. Alai sungkunsungkun do rohangku, songoni nang roha ni angka dongan na torop i. Aha do na binuat ni amang sian dompet ni amang i?”.

Dialusi amanta pimpinan i ma: “On ma amang… na sian Tuhanta i”, ninna amanta pimpinan ma huhut pakaluarhon isi ni dompetna i nasa balga ni KTP, laos dijahahon ma: Sai tong ma lambok hatamuna songon na siniraan, asa botoonmuna alus na patut tu ganup jolma (Kolosse 4: 6).