12. Tangiang Mangido Sipatu

Sahalak dakdanak na metmet, di sada tingki manisio di emper ni sada Toko Sipatu ala haroro ni rimbus

(gerimis). Ngali do di hilala dakdanak i ala sanga hona rimbus ibana saotik (satongkin). Alai molo ditorushon ibana mulak tu jabuna olo ma lam tu ngalina dihilala ibana jala lam matonu. Ai mangholom do ari, hira na naeng ro udan na doras.

Huhut paimahon maradian rimbus i, sai dipanotnoti dakdanak i ma tu arah toko sipatu i. Dibereng ibana ma angka sipatu dohot kaus kaki mansai uli, na dipajang di toko i. Ndada holan ibana na songoni, na manghalomohon angka sipatu na di toko i, alai saluhut angka na ro mangida sipatu tu toko i, sir do rohana mamereng.

Sian kalangan ni keluarga na hurang mampu do dakdanak on. Jala diboto ibana do na so tolap ni natuatuana laho manuhor sipatu i, ai tarbarita do toko i, toko sigodang arga, ala memang angka sipatu na bagak jala na jago do dijual di toko i. Kwalitasna na pe mansai denggan, boi dohonon tahan sampe sega (sude do nian... barang tahan sampe sega, ha... ha...).

Sai lam dipanotnoti dakdanak i ma sipatu i, jala lam tu lelengna lam lomo rohana mangida sipatu i. Laos tubu ma tu roha ni dakdanak i naeng marnampunahon sipatu i. Alai songon dia ma carana?

Di bagasan na so sadar dakdanak i, gabe haruar ma sian pamanganna mandok songon on: “Ale Tuhan Parasiroha... tangkas do diboto Ho, na pogos do hami. Ndang adong arta ni natuatuangku. Jala ndang tolap ni damang dohot dainang laho manuhor sipatu na arga songon na di toko an, silehononna tu ahu. Ale Tuhan... huboto na mora do Ho. Molo lomo rohaM tarlehon Ho do sipatu an di ahu. Amen”, ninna dakdanak i.

Ndang sadia leleng dungkon na martangiang dakdanak i, adong ma ro sahalak anakboru mandapothon dakdanak i jala didok ma tu dakdanak i: “Marhua ho di son adek? Adong na ringkot?”

Dungi unduk ma dakdanak i mangida tu toru dompak simanjojakna.

Didok dakdanak i ma: “Lomo hian rohangku mangido sipatu an”, ninna dakdanak i huhut ditudu tu bagas toko i.

“Hape hami na pogos do, ingkan nami pe ingkan tutung do”, ninna dakdanak i muse.

“I ma da, nangkin hira na hubege do soaram mangido sipatu. Beta ma hita, tatuhor ma sipatu i di ho, asa adong pangkeonmu”, ninna anakboru i tu dakdanak i.

Dungi diboan itoan i ma dakdanak i tu bagasan toko i jala disuru ma dakdanak i mamillit jala mambuat sipatu na sai pinanotnotanna i sian emper ni toko i dohot kaos kakina.

Dung dibayar itoan i tu kasir, dipakehon itoan i ma kaos kaki dohot sipatu na tinuhorna i tu simanjojak ni dakdanak i. Mansai las do roha ni dakdanak i manjalo jala mamake sipatu na imbaru i jala anak boru i pe di bagasan las ni roha do marsilehonlehon tu dakdanak i.

Di na naeng borhat itoan i maninggalhon dakdanak i, didok itoani ma tu dakdanak i: “Molo adong na ringkot muse di ho unang mabiar ho da, pangido ma muse tu ahu...”, ninna itoan i.

“Mauliate kakak. Alai adong na mansai ringkot na naeng husungkun: Boru Ni Tuhan i do ho, boasa ho mangalehon sipatu on tu ahu? Hape tu Tuhan i do hujalo”, ninna dakdanak i.

Mangupir ma itoan i. “I do. Boru ni Tuhan i do ahu”, ninna itoan i ma mangalusi dakdanak i.

Dungi lao ma itoan i manguduti pardalananna jala mulak ma dakdanak i tumopot bagasna di bagasan roha na marolopolop.

Ha!!!
Di hamu amanami, inanami, saluhutna tahe dongan panjaha. Memang ndada songon mura ni cerita on, realita hangoluan ni jolma. Alai sai dapotan do halak na mangido jala na porsea tu Tuhan i.

Sahalak dakdanak na metmet na mangharingkothon na porlu di ibana. Jala diboto ibana do manghatahon sipangidoanna. Lam hita ma, naung tardok nunga matoras di pamatang laos so taboto mangido tu Tuhan i.

Hape nunga jotjot tabege hata ni Tuhanta na mandok: “Pangido hamu ma, sai na lehononna do tu hamu; lului hamu ma, sai na jumpangan do hamu; tuktuhi hamu ma, sai na ungkaponna do di hamu!”, Mateus 7: 7.

Taingot jala tahaporseai ma, marragam do cara bahenon ni Tuhan i lao mangurupi halak angka na porsea. Boi masa do ro pangurupion na sian Tuhanta i marhite na so tinagam jala marhite halak na so tinanda. Saluhut do boi dipake Tuhan i lao mangurupi angka halak na ro jala na joujou tu Ibana.