19. Panjual Tobero* & ParRestoran.

Rap dohot angka donganna lao do Nai Sisi mardalani tu luar kota. Torop nasida na borhat mardalani i opat (4) halak. Nunga mansai leleng dibuhul nasida di sada tingki naeng mardalani dibagasan manipat sadari i.

Sangaja do disangkapi nasida mardalani mamungka sian manogot sahat tu bot ni ari asa boi nasida lumeleng “refresing” dalan laho padao holso. Inganan tujuan pardalanan nasida adong manang pigapiga inganan rekreasi/wisata naung ditotophon na gabe si topotonnasida.

Memang di bidang ekonomi antar lumayan do keluarga ni Nai Sisi on, tarida do i sian paheanna dohot sian rumangna (stylena). Molo soal haburjuon marsilehonlehon tu angka dongonna, boi dohonon buas, jala boi dohonon ndang buas. Ai tergantung tu situasi do inanta i marsilehonlehon. Jompok hata dohonon tu sifat ni inanta i “marpanombo”. Olo do tompu burju, jala olo do tompu holit hian. Sadari on burju, tu marsogotna i, olo do tompu muse berubah gabe siholit mangging.

Sandok tung saguru lomo ni rohana do na marsilehonlehon dohot manggalangi angka donganna suang songoni nang tu angka sisolhotna. Panghataion nasida, na gabe titik kumpul tu sangkap ni pardalanan nasida i, di bagas ni inanta nai Sisi.

Dung parmisi be sian angka amantana be, pukul 6 manogot borhat ma nasida di bagasan sada motor (Mobil).

Di pardalanan topet mangisi miak di pom bensin pajumpa ma nasida dohot sahalak ina naung matua partigatiga tolor bebek robus. Tung mansai lomo do roha ni inanta nai Sisi on mangallang tolor bebek robus alias tobero. Asa gumodang bohalnami di dalan tahe tinuhor ma tolor bebek robus on, ninna roha ni inanta i. Nang pe nunga adong sasintongna diboan nasida angka snack manang “makanan ringan”.

Dituhor inanta i ma tolor bebek i. “Sadia sada inang tolor bebek on”, ninna inanta nai Sisi on. “Dua ribu lima ratus inang”, ninna panjual tolor bebek i. Dibuat inanta i ma 10 tolor bebek i, jala dilehon hepengna tu inanta partigatiga tolor i arga Rp. 50.000 jala dilehon inanta partigatiga tolor i ma ulakna Rp. 25.000 nai. Dungi bormat ma nasida muse manorushon pardalanannasida.

Molo halak na refresing, ndang oloanna gabe “pusing”, alai ingkon tombus do na mangaranto i (mangaranto sadari). Molo lao halak “refresing” hape gabe pusing, ndang na refresing goar ni i, alai na mangalap arsak do i. Nunga mansai ganjang dalan didalani nasida jala adong manang pigapiga inganan naung disinggai nasida hombar tu angka inganan naung disangkapi nasida hian.

Mamungka tibu manogot ni ari sahat tu botari nasida na mardalani, aha na so tombus. Dung mareak bot ni ari ditogihon inanta i nai Sisi on ma angka donganna i mangan tu sada restoran na adong di sada kota. Mangan ma nasida di restoran i.

Goarna pe restoran, ndada songon na mangan na di lapo na di hita on. Molo lapo na di hita on, molo dipesan mangan tu lima halak, holan tu lima halak do diparade, muse na lelengan asa ro. Molo songon na tabo lompan i martambu ma indahan. I pe jolo digorahon do tu parlapo i asa ro tambu ni indahan i. Molo di restoran na so dipesan pe diparade do. Boha ma partigatiga, ai laku ni tigatigana do dipingkiri jala diulahon.

Dung diparade parhobas ni restoran i sipanganon nasida di meja i, mangan ma nasida dung jumolo martangiang. Nang pe didok ulaon refresing pardalanan nasida na sadari i, tong do dihilala nasida loja jala diingot nasida do hape male. Tarida do sian angka sipanganon na pinarade ni parrestoran i, ai ndang adong na tading di meja i ia so holan angka piring, galas, sendok dohot holiholi dohot suga ni angka na pinangan nasida i. Apala habis sude.... suda sude sipanganon na diadopan nasida i. I ma ala ni lojana dohot ala ni malena.

Dung sun nasida mangan... dibahen sahalak sian nasida ma tangiang panutup mangan. Ndang pola marende nasida songon na di pesta i.

Di na naeng mulak nasida sian restoran i, hehe ma nai Sisi mardalan dompak kasir jala dijalo inanta i ma bon sipanganon nasida sian kasir i. Dibereng inanta nai Sisi i ma bon pembayaran i godangna Rp. 955.000. (Sia Ratus Lima Pulu Lima Ribu Rupia).

Ndang pola marpingkir inanta i laho mambayar i. Gariada mintor hatop do dibuka ibana dompetna jala dipakaluar hepengna sajuta jala dilehon tu kasir i. Dungi dilehon kasir i ma ulakna tu inanta i 45.000 nai. Alai aha ma didok inanta nai Sisi i: “Ga usah... samamulah kembaliannya”, ninna inanta i.

Ha!!!
Patut do didok na mandok: “Na pogos i lam marpogos, jala na mora i lam mamora”. Sian pardalanan ni rombongan ni angka inanta on, adong parsiajaran na mansai arga tu angka halak na porsea.

Tingki na manuhor tolor inanta i tu sahalak inanta natuatua panjual tolor i. Secara status masyarakat na pogos jong do panjual tolor i, dilehon panjual tolor i ulakna 25.000 nai, tong dijalo inanta Nai Sisi.

Hape, nampuna restoran i na mora jong do i. Mangan nasida di restoran i, aturan adong dope ulakna Rp. 45.000 (Opat Pulu Lima Ribu) alai ndang dijalo be. Jotjot do masa songoni di pardalanan ni ngolunta on. Na pogos manang na susa ndang taurupi, alai na mora tatumpahi.

Dia do na martua? Halak na manumpahi na patut siurupan do manang halak na manumpahi paradongan (na mora)?. Taurupi ma na patut siurupan.

* Tobero = Tolor Bebek Robus.