3. Mangompa Anak Ni Pinahan

Adong ma sada huta, antar dao sian ibukota kecamatan. Somalna di hutahuta di sekitar ibukota
kecamatan i do gabe inganan maronan. Di Sada tingki adong ma sahalak ina mangambat motor (Baca: Mobil angkutan pedesaan) naeng lao maronan, hape hepeng ni inanta i holan 10 ribunai nama solot di puropurona, jala 10 ribu do ongkos sian hutana i tu onan situjuonna. Memang, dipingkiri inanta i do. Nang pe holan si 10 ribu on nama hepeng hupeop, sae dope on baenon ongkos lao maronan. Jala molo hepeng sipakeon annon di onan jolo ginadis ma jolo angka hasil na sian ladang on dohot angka na asing na huboan on, ninna rohana. Hape mamboan anak ni pinahan do inanta i laho gadisonna di onan.

Tubu ma sungkunsungkun di roha ni inanta i: “Dohot do pinahan marongkos molo binoan tu onan?”, ninna roha ni inanta i di bagas rohana. Sai i ma dipingkiri inanta i di bagasan rohana. Sanga ma gabe galau inanta i, huhut ma sai marpingkiri andorang so naik dope tu motor. Dung leleng dipingkiri inanta i, dapot ibana ma sada cara laho mangatasi mamboan anak ni pinahan i. “Huoppa ma pinahankon, asa unang pola diboto supir i na mamboan anak ni pinahan au di bagas motor on. Ai molo diboto supir i adong huboan anak ni pinahan, ra gabe jaloonna do annon ongkosna”, ninna roha ni inanta i. Dihalaputi inanta i ma laho mabuat parompa sian jabu, huhut laos diompa ma anak ni pinahan i tu tanggurungna. Manjonok ma ibana tu pinggir dalan huhut laos di ambat ma motor dipinggir dalan i.

Diambat inanta i ma mototor i, jala didok: “Stop... stop... supir”.

Supir: “Laho tudia hamuna inang?”

Inanta i: “Lao tu onan do au amang”.

Supir : “Dijolo ma hamu hundul inang, ala marpesepese hamu!”.

Inanta i: “Olo... amang. Mauliate ma, amang supir”.

Laos nangkok jala hundul ma inanta i di lambung ni supir i. Alai sai humusorhusor jala marungutungut do pinahan i diompa jolo ni inanta i. Sai dihaol jala sai diapusapus inanta i do ulu ni pinahan i.

Supir: “Nunga piga bulan umurna inang?”

Inanta i: “Lima bulan dope amang”.

Supir: “Si Ucok do manang si Butet?”.

Inanta i: “Si Ucok do on amang, sai mangolu ma”.

Supir: “Ise dibahen hamuna goarna inang?”

Inanta i: “Si Joget do hubahen goarna amang”.

Supir: “Pas do goar na binahenmuna i inang. Ai holan na margoyanggoyang do huida ihurna sian nangkaning.
Tanda do tingki mangidam hamu... lomo rohamuna marjoget ate inang?”.

Inanta i: “Wkkkkk.... wkkkk...(Mengkel)”.

Supir: “Lehon hamu jolo minum bere i inang. Nunga holan na busisaon mulai sian nangkin ibana. Na ma uas do ra ibana”.

Inanta i: “Olo, amang supir, annon ma i dung sahat di onan, muse maila au”.

Supir: “Hah... ndang pola hubereng inang”.

Inanta i: “Muse, ndang olo ibana hulean manarus molo tingki di pardalanan”.

Hape tompu ma haluar muncung ni pinahan i sian parompa ni inanta i.

Supir: “Abagoh... abagoh... abagoh... Ganteng na i hape si Joget i. Mancung hian poang igungna”. (Gabe tarboto ma na pinahan do na niompa ni inanta i).

Hahaha... hahaha… hahaha... Yang Tertawa Panjang Umur dan yang Koment diberkati Tuhan…