13. Parlangka Tibu

Adong ma sahalak ama na karejo di sada kantor. Na padot do amanta on manganunuti angka karejona

jala burju mangula angka siulaonna siganup ari jala tarbarita do ibana “Parlangka Tibu”, ala tibutibu ibana borhat tumopot ulaon di kantorna. Tibu borhat jala leleng mulak. Ima na gabe hasomalan ni amanta on siganup ari, borhat sogot manogot i jala leleng mulak bornginna i sian parkarejoanna.

Di sada tingki, mulak sian kantor jala dung sahat di jabu pajumpa ma ibana dohot anakna na marumur pitu taon. Somalna, nunga modom anakna i didapot amanta i di podomanna molo mulak ibana sian kantorna. Holan di manogot ni ari i do boi nasida pajumpa andorang so borhat amanta i karejo.

“Bapa... Boi do ahu manungkun tu bapa?”, ninna anakna i.

“Boasa ndang boi anakku. Adong na porlu?”, ninna amanta i.

“Sadia do pangomoanmu sadari bapa?”, ninna anakna i manungkun bapana.

“Aha na sinungkunmu di si anaha... Boasa songoni sungkunsungkunmu”, ninna amanta i.

“Holan na manungkun do ahu bapa... asa huboto do”, ninna anakna i.

“Hem.... saratus ribu”, ninna amanta i.

“Boi do lehonon ni bapa tu ahu tolupulu ribu?”, ninna anakna i.

“Lao tudia hepeng bahenonmu bornginborngin, ai nunga bagas borngin. Nunga tutup lapo. Marsogot ma i, modom ma ho. Bapa pe nunga loja modom nama ahu”, ninna amanta i.

“Alai bapa...”, ninna anakna i. “Toe ma... marsogot ma i, lao ma ho modom”, di bagasan soara na muruk ma amanta i mangalusi anakna i.

Tarmali ma dakdanak i jala bencut, lao ma ibana modom tu podomanna di bilut. Diparrohahon amanta i do anakna na minurukanna i. Dungi disolsoli amanta i ma murukna i tu anakna i, gabe didapothon amanta i ma anakna i tu bilut.

“Na... ma... na... hepeng si tolu pulu ribu na pinangidomi”, ninna amanta i sambil mangalehon hepeng tolu pulu ribu tu anakna i.

“Mauliate bapa”. Di bagasan na tariluilu dijalo dakdanak i ma hepeng na tolu pulu ribu sian bapana i jala dipadomu dohot hepeng na adong disakuna. Dungi dikira dakdanak i ma hepengna dohot na sian bapana i godangna saratus ribu.

“Molo adong do hepengmu hape, boasa pola jaloonmu hepeng sian ahu”, ninna bapana i.

“Na hurang do hepengku bapa umbahen na hupangido tu bapa”, ninna dakdanak i mangalusi amanta i.

“Saonari nunga adong be hepengku saratus ribu. Hupasahat ma on tu bapa, ganti ni pangomoanmu sadari. Alai dongani ma hami marsogot sadari manipat? Ahu, adek dohot omak. Ala ndang hea be hita rap mangan jala ndang adong be tingki ni bapa marsaor dohot hami. Holan na karejo nama bapa. Borhat manogot tibu jala mulak leleng bornginna i”, ninna dakdanak i.

Mansai leleng ma tarngongo amanta i, umbege hata ni anakna i. Ndang adong nanggo sangkababa hata na boi haluar sian pamangan ni amanta i laho mangalusi anakna i. Dungi dihaol amanta i ma anakna i, tariluilu ma amanta i, songoni nang anakna i, ala ni na masa i.

Dungi dibagabagahon amanta i ma tu anakna i: “Marsogot cuti pe bapa. Asa rap mangan hita dohot adekmu dohot omakmu jala sadari i rap mardalani pe hita. Jala mulai sadari on, hubagi pe tingkiku asa boi rap marsaor dohot keluarga”, ninna amanta i mangalusi anakna i.

Diabing amanta i ma anakna i sahat tu na tarpodom diabinganna. Dungi ro ma omak ni dakdanak i dipapodom ma anakna i tu podoman jala modom ma nasida. Asa tibu nasida marsogot mardalani (rekreasi).

Ha!!!
Di hamu amanami, inanami dohot saluhut na manjaha turiturian on. Aha do na mangonjar hita asa sai tagogo na mancari. Lao tu keluarga do na taomo i, manang na lao papunguhon arta do hita di portibi on? Hurang taparrohahon angka ianakkonta i, ala hurang tingkinta marsaor dohot nasida.

Hurang tingkinta talehon tu nasida laho mammemehon na denggan marhite na rap marsaor hita dohot nasida lumobi parsaoran dohot hata ni Debata. Hape tangkas do taboto ende ni kondang Nahum Situmorang na mandok: “Anakkonki do hamoraon di Ahu...”. Molo tagogoi pe mancari, arian nang botari bahen na ringkot tu ngolu ni anakkonta i do i.

Jotjot do masa di ngolunta on, lupa hita tu angka na mansai arga na ni lehon ni Tuhan i tu hita. Tahamauliatehon jala taargahon ma silehonlehon ni Debata tu hita, ima keluarga lumobi ma angka ianakkonta i.