7. Mulak Tu Bona Pasogit.

Di sada tingki, adong ma sahalak na mora mamboan ianakkonna na marumur 10 taon laho mardalani tu sada huta jala tinggal di huta i saleleng 5 (lima) ari. Anak na binoan ni amanta i anak siangkanganna jala margoar si Molen. Di habatakon gabe Ama Ni Molen ma manta i. Huta i, ima huta hatubuan ni Am. Molen manang bonapasogitnasida.

Di huta i do Am. Molen sorang jala magodang jala boi dohonon di huta hatubuanna i do Am. Molen gumodang marmeam sian na metmet jala marsiajar taringot tu parngoluan on sahat tu na marujung ngolu natorasna duansa.

Dung marujung ngolu natorasna, uju bajar dope ibana diihuthon ibana ma ibotona tu kota na balga inganan pangarantoan ni ibotona i. Di kota i, di mulai ibana ma marsiajar karejo di bidang bisnis. Lam leleng, lam tarida ma parbue ni parsitutuonna i. Jala sian i do ibana mamora, gabe sahalak pengusaha. Tingki mangoli pe ibana biaya sandiri do sian hasil ni na niomona.

Huta hatubuan ni Am. Molen i, mansai tandi parasinganna sian ingananna si nuaeng on (domisilina). Halak angka na tading di huta i mansai pogos dope (di bawah garis kemiskinan). Am. Molen on sian sihaeteketekonna sopan do manghatai. Uju bajar dope ibana sahat tu na marruma tangga pe ndang apala haru hea tarbege manghatahon hata barangsi, gariada angka hata poda do na haruar sian ibana nang pe tingki bajar manang poso dope.

Tujuan ni amanta Am. Molen on sasintongna mamboan anakna siangkangan na marumur 10 taon on dope naeng mangajarhon tu anakna i taringot parngoluan “Hapogoson dohot Hamoraon”. Diharingkothon Am. Molen on do mamodahon dohot manuan pangantusion na mansai arga situtu di ngolu ni hajolmaon, lumobi tu anakna siangkangan i.

“Molo pogos jolma, hancit do ngolua. Molo pogos ndang diparsangapi halak bahkan mansai lea ditatap jolma. Ima na ni dokna: Lea Binaen ni hapogoson. Molo mamora di arta lumobi mamora di roha gabe sangap jala diparsangapi halak. Hamoraon dohot hasangapon ndada na ro boti songoni, alai na ingkon siparsiajaron do i di bagasan parsitutuon jala ingkon marsiadu (berjuang) do laho mandapot i”. I do sasintongna naeng sisuanon dohot siuhirhonon ni Am. Molen tu anakna i.

Saleleng 5 (Lima) ari tading ma nasida di bagas ni anggina Am. Molin rap dohot keluargana. Pajumpa ma si Molen dohot si Molin jala rap marmeam ala ndang pola dao jarak ni umurnasida. Jabu ni amanta Am. Molin on ndang apala balga jala, maratap seng (non asbes) jala mardorpihon papan, ndang marpagar alamanna.

Di pudi jabu i, hirahira 20 meter adong ma sunge manang binanga, ias dope mualna. Sian sunge on do nasida mangalap mual jala di sunge on do nasida na jolo marmeam dohot marlange rap haha anggina dohot dongan magodangna 25 taon naung salpu. Di jolo jabu i, adong lapangan inganan ni angka dakdanak marmahan dohot marmeam. Molo ro alogo jotjot do di si angka dakdanak marleangleang (main layangan).

Dung lima ari nasida tading di huta i jala dibagas ni anggina i, mulak ma nasida tu luatnasida tu tano parserahan lao mandapothon ulaonna siganup ari. Di pardalanan, di bagasan motor i (=mobil) disungkun Am. Molen ma tu anakna si Molen i:

“Boha do poang... Aha do na binerengmu jala songon dia do panghilalaanmu saleleng di san?. Aha do na dapot roham saleleng rap hita di bagas ni amangudam Am. Molin?”. Na hinirim ni Am. Molen, nunga diantusi si Molen on be parasingan ni na pogos dohot na mamora.

Dungi dialusi si Molen ma bapakna i: “Wowww... Luar Biasa bapa... Alaman ni jabu ni uda i mansai bidang jala boi marmeami di si godang angka dakdanak, apalagi molo poltak bulan, ala ndang marpagar. Alaman ni jabunta mansai sompit, nanggo marhua pe ndang boi di si ala marpagar jala sungkot. Kolam Renang nasida mansai ganjang di pudi ni jabuna, ala tu sunge nasida maridi. Hape kolam renangta sompit do jala godang hepeng habis paturehon i. Molo tu super market ingkon antri do hita lao mambayar situhoronta, hape nasida tinggal mambuat do angka sayur na di porlak na di samping jabuna i, jala ndang sibayaron i.

“Na parpudi bapa, lampu taman na di pekarangan ni jabunta i mansai otik do, jala mansai loja do tukang manungkangi i. Hape lampu pekarangan nasida ndang habilangan, ai angka bintang na di langit i do. Dungi muse, molo bapa sian manogot sahat tu bodari karejo torus... Uda i molo nunga botari mansohot sian na mangula ulaonna jala boi rap dohot angka ianakkonna. Hape tingki ni bapa ndang adong ganup sore rap dohot ahu songon nasida. Jala molo naeng mangida binatang hita ingkon lao do hita tu Kebun Binatang, hape nasida ganup ari do boi mangida binatang na pinarmahan ni halak na adong di huta i”.

Dung umbege hata ni anakna si Molen i, ndang adong na boi manang aha dipatupa Am. Molen laho mangalusi anakna i. Nda holan na sip sajo jala tarngongo sahat tu na das nasida di jabuna.

Ha!!!
Angka amanami dohot inanami, nang saluhutna dongan panjaha. Aha ma na boi dohononta tu carita on???