8. Seat Ma... Buat Mudarna Da...

Nunga tung mansai leleng diparsinta si Ultop naeng mangallang jagal manuk, sian ma

nuk na piniarona i (peliharannya). Alai ndang barani si Ultop mandok tu omakna.

Di borngin ni ari topet andorang so modom dope, dibaranihon si Ultop ma manghatahon sangkap ni rohana i tu omakna. Di bagasan roha na taroktohon dibaranihon si Ultop ma mandok tu omakna:

“Oma... nunga mansai sihol rohangku mangallang jagal manuk, taseat ma sada manukta i ate omak”.

Di dok omakna i ma mangalusi: “Hubege naeng ro do tulangmu tu son, pas tingki ro ma tulangmu taseat manuk i da Ultop”.

“I do oma. Mauliate da oma ala dioloi ho pangidoanki”, ninna si Ultop magalusi omakna i di bagasan las ni roha.

Dungi diuduti si Ultop ma muse manghatai: “Naeng ro tulang omak.. Tulang na bandal i do omak, na leleng tamat sian kuliahna i?”.

“I do.., ai ho... sai sude do dohononmu. Mungkin naeng tammat nama ra tulangmi sian sikolana umbahen mandok ro tu son”, ninna omakna i mangalusi si Ultop.

Hira tolu ari dung manghatai si Ultop dohot omakna, ro ma tulang ni si Ultop i. Dituktuhi tulangna i ma jabu.

“Ito... ito... di jabu do hamu?”, ninna tulangna i. Di buka si Ultop ma pintu, dungi dibereng ibana ma naung tutu do ro tulangna i, jala didok ibana ma tu tulangna i: “Horas tulang...” huhut marsijalangan nasida na dua.

Dungi didok si Ultop ma asa masuk tu jabu tulangna i. “Satongkin da tulang asa hujou jolo omak”, ninna Si Ultop mamangkulingi tulangna i.

“Olo bere... ninna tulangna i”. Laos hundul ma tulangna i di kursi tamu na adong di bagas ni ibotona i. Alai na tubu tu roha dohot pingkiran ni si Ultop, on do: Nunga ro be tulang... maneat manuk nama hami.

Sian pintu ni dapur dijou si Ultop ma tu omakna: “Oma... oma... nunga ro be tulang, taseat ma?”

Ala antar dao do omak ni si Ultop on di pudi ni jabu i mangula, manggisgis kopi, hurang tangkas dibege soara ni si Ultop na manjou i.

Mansai manat do dipingkiri tulang ni si Ultop, i ma hata ni berena i na mandok: “Oma... oma... nunga ro be tulang, taseat ma da?”.

Mulai ma tubu roha biar ni roha di tulangna i umbege hata ni berena i, ala sala mangantusi ibana, jala sala do pandohan ni si Ultop i. Memang sadar do tulangna i, ai jolma na bandal hian do ibana.

Dipaduahali si Ultop ma manjou omakna i: “Oma... oma... nunga ro be tulang, taseat ma da?” I pe tong do alangalang dibege inanta i.

Nang pe alangalang dibege inantai, alai gabe dihalaputi omak ni si Ultop i do nian mulak tu jabu, ai tubu do dipingkiranna: “Naung ro do ra ibotoki, asa joujou anakki”, ninna rohana di bagasan.

Alai di tonga dalan dope omakna i, dipagogo si Ultop ma muse manjou jala manungkun omakna patoluhalihon: “Nunga ro be tulang oma... taseat ma da”.

Nunga tangkas be ditangihon inantai soara ni anakna i. Huhut mardalan dialusi omakna i ma: “Olo... seat ma... buat mudarna da!”.

Lam mabiar ma tulang ni si Ultop i, umbege hata ni berena i dohot umbege alus ni ibotona, ima omak ni si Ultop i. Ala ni biar ni rohana, na so pamotoan ni si Ultop dohot omakna, lari ma tulang i marimbusi ditinggalhon ma bagas i.

Ndang jadi be hita mangallang jagal manuk, ai holan cerita do i... Muse nunga lari be datulang marimbusi.

Ha!!!
Di hamu amanami, inanami suang songoni nang tu hita saluhutna. Ingkon tangkas do aha maksud dohot tujuan ni aha na tahatahon dohot na tasangkapi asa unang tubu angka na “salah pengertian”. Molo sala mangantusi olo do tubu hamaolon dohot parsualan. Molo ndang marsiantuasan olo do gabe marsiantukan. Selamat Pagi. Horas....