15. On Dope Hea... Pandita Naik Haji jala Pak Haji Mandidi Pandita.

Di sada luat adong do dua halak tokoh agama na mansai kompak nang pe beda agama. Sahalak amanta Pandita, tokoh agamaKristen na mansai kompak tu sahalak pak Haji, tokoh agama Silom (Islam). Sai jotjot do nasida sharing manang diskusi taringot tu Tuhan Jesus (Di hita Kristen), Nabi Isa (Di nasida Silom). Sandok, tung i nama kompak ni nasida na dua, ndang hea binege pasoal nang pe marasing do agama nasida.

Sipata, na ringkot di huria i pe olo do pak Haji on dohot mangalului dana molo adong dipamasa pembangunan di huria i. Sebalikna, na ringkot di Mesjid pe, olo do amanta pandita on dohot mangalului dana manang patudu dalan laho mangalului dana. Mansai kompak situtu do nasida, suang songon i do nang angka ruas (jemaat/jamaah) na niuluhon nasida tong do kompak. Boi dohonon nasida do na pas na mangulahon aturan ni negaranta ima taringot: “Kerukunan Beragama”.

Di sada tingki, di na mangalului dana na ringkot tu pembangunan ni sada gareja diarahon amanta pandita on ma pak Haji i dohot pigapiga halak donganna, songon naung somal diulahon nasida. Pardalanan nasida ndada naik kenderaan, alai mardalan do jala ingkon manaripari aek na bidang alai ndang pola bagas. Ala ari parudan di tingki i, umbagas ma aek i sian na somal, pola sahat tu duguldugul ni pat (airnya setinggi lutut).

Dung sahat nasida di topi ni batang aek marpingkir ma nasida laho manaripari aek i, anggiat asa unang tonu salawar nasida. Alai molo pak Haji i, marlopes mandar do jala marsolopsolop hepe amang pandita i marsalawar ganjang jala marsipatu.

Dungi ninna pak Haji i ma tu amang pandita i: “Boti ma i, amang pandita: Ala marlopes do au, huompa ma amang laho manaripari aek on”. Denggan jala mauliate ma ninna amanta pandita on. Sian dos ni roha nasida, dungi diompa pak Haji i ma amang Pandita i laho manaripari aek i.

Di parsitongaan ni aek i, didok amang pandita i ma tu pak Haji i: “Pak Haji... On dope hea... sahalak pandita naik Haji”. Haaa.... haaa.... haaa... rap mengkel do nasida sude. Alai di bagasan roha ni pak Haji nunga mansai muruk situtu holan ala ni hata ni amang pandita na niompana i. Ndang olo pak Haji. Di bagasan murukna i dipingkiri do muse pembalasan. Dungi mintor didabuhon pak Haji i ma amang pandita i sian na niompana ni pak Haji i, jala dipatoltol tanganna tu Pandita i huhut ma didok: “Amang pandita... On dope hea... pak Haji mandidi Pandita”. Haaa... ha... ha... Gabe margak ma nasida sude mengkel, holan ala ni na masa i. Ala ni denggan ni parsaoran gabe boi “Pandita Naik Haji, jala pak Haji Mandidi Pandita”. (Copas).

Hamu dongan panjaha, boi do kompak alai unang ma pakompakhu. Tongtong ma taargahon angka ulaonta nang angka tohonanta be, na tajalo na sian Tuhan Debata. Ulahon ma angka na denggan jala unang ma tabaloshon na hurang denggan na binahen ni angka donganta tu hita. Taingot jala taulahon ma hata ni Tuhanta na tarsurat di Rom 12: 17 “Unang baloshon hamu na jat alo ni na jat; ringkoti hamu ma na denggan di jolo ni halak saluhutna!”.