11. Ummarga do Dongantubu, Sian Amang Pandita.

Hirahira tolu (3) bulan andorang so marhasohotan si Dodit Anjasmara Mulianto, nunga disangkapi keluarga angka naeng sipatupaon dohot angka ise si gokkonon tu pesta i jala di dia patupaon ulaon i.

Tubu jala magodang di huta do nian si Dodit Anjasmara Mulianto, alai tingki marsikola apalagi dung karejo tinggal di kota madya ma ibana rap bapatuana.

Keadaan ekonomi ni natoras ni si Dodit Anjasmara Mulianto, sae sae allangon do alias paspasan. Bapatuana i do pasikolahon ibana sahat tu na tamat sian perguruan tinggi. Laho sumangkapi pamasumasuonna ndada holan nasida na saripe.

Dohot do bapatuana i, lumobi ma omaktuana i, i do na lumoja mamingkiri hatutulus ni ulaon i. Laos bapatuana i do mananggung saluhut biaya pesta i. Gariada transport ni angka sisolhot na sian huta dohot parhalado ditanggung bapatuana i do.

Angka keluarga sian huta na mandohoti ulaon i, omaktua ni si Dodit Anjasmara Mulianto on do mangatur. Ala ni i, gabe tubu do na hurang denggan di nasida na mardongan tubu. Ai ndang saluhut nasida na mardongan tubu na di huta digokkon tu pesta i. Dipiliiti do.

Nunga gabe hasomalan, molo adong angka urusan ni bapatua/omaktua ni si Dodit Anjasmara Mulianto tu huta sai marhite sahalak dongantubuna na adong di huta i do, ima amanta Sijama.

Pesta ni si Dodit Anjasmara Mulianto on pe nunga dipasahat tu amanta Sijama. Dohot mangatur angka transport ni rombongan ni keluarga dohot rombongan ni parhalado nunga dipasahat tu amanta Sijama on, asa denggan diurus.

Andorang so jumpa mata ni ulaon i, sai dipaingot omaktuana i do tu keluarga di huta dohot tu parhalado taringot tu ulaon i, asa unang lupa.

Denggan do diurus amanta Sijama angka transport sian huta jala pukul piga parborhatna. Dalan ni rombongan keluarga diparade ma sada bus. Jala amang pandita dohot parhalado, termasuk dohot amanta Sijama rap ma di sada motor (Mobil).

Di sada tingki di manogot ni ari, tolu (3) ari andorang so ulaon i dipabotohon amanta Sijama ma na songoni partording ni pardalanan ni keluarga nang parhalado. Rap borhat ma pukul 04.00 WIB manogot.

Dipingkiri amang pandita ma taringot tu parborhat tu ulaon i, ingkon tibu borhat sogot manogot i. Hape amang pandita i do na mamasumasu. So binoto annon manang boha di dalan, jala boha do partulus ni i.

Gabe diuji amang pandita ma komunikasi marhite HP tu omaktua ni si Dodit Anjasmara Mulianto:
“Halo inang”, ninna amang pandita. “Hallo juga amang”, ninna inanta i mangalusi amang pandita.

Pandita: “Molo di hari “H” do hami tibu manogot borhat sian huta on naeng mangulahon pamasumasuon i, hurang denggan do i ala palojahu. Molo boi pangidoanku inang, sadari andorang so pamasumasuon i nunga ingkon sahat hami di si dohot pigapiga halak donganku parhalado”.

Alus ni omaktua ni si Dodit Anjasmara Mulianto: “Denggan amang... Hape nunga sanga hudok asa rap amang pandita, parhalado rap dohot dongantubunami Sijama”.

Alus ni amang pandita: “Parjolo ma hami inang. Sadari andorang so pamasumasuon i nunga ingkon

sahat hami di si asa sanga istirahat. Muse ndang boi hami sadalanan dohot amanta Sijama, nang di tongatonga ni huria pe”, ninna amang pandita i.

Alus ni omaktua ni si Dodit Anjasmara Mulianto: “Denggan amang. Hudok pe tu dongantubunami Sijama i, asa sian bus ni rombangan keluarga nasida. Komunikasi pe hita muse da amang. Mauliate”.

“Mauliate inang”, ninna amang pandita i huhut manutup HP-na.

Hape di na so pamotoan, martelepon ma amanta Sijama dohot omaktua ni si Dodit Anjasmara Mulianto. Jala dung adong panghataion nasida na dua, sahata ma nasida mangalului pandita na adong di kota i laho mamasumasu si Dodit Anjasmara Mulianto i.

Jala tutu ma dilului omaktua ni si Dodit Anjasmara Mulianto i ma pandita laho mangulahon pamasumasuon i. Tarboto songoni ala adong SMS ni omaktua ni Dodit Anjasmara Mulianto i tu amang pandita (na di huta) dua ari andorang so pamasumasuon, songon on:

“Horas amang pandita. Nunga huhatai jala huputushon hami be, ia na manghobasi ulaon pamasumasuon ni si Dodit Anjasmara Mulianto nunga hulului hami be pandita di son. Dohot alasan, malua jala martumpol di son do na naeng parumaennami i. Jala gabe ruas di son nama nasida dung tarpasupasu. Mohon maaf amang”.

Manjadi ma songoni. Tutu Situtu... Ummarga do dongan tubu sian amang pandita, nang pe sai tadok amang pandita i NAPOSO NI DEBATA. Ai alualu ni dongan tubuna i do ditolopi. Naung disangkapi tolu bulan lelengna, jala ditolopi amang pandita i do pangidoan ni suhut paranak i laho manghobasi pamasumasuon i.

Diparade amang pandita i do tingkina jala nunga sanga disurathon i di Almanakna 3 bulan naung salpu. Alai, dua (2) arina i nama andorang so pamasumasuon gabe disundati holan ala ni sahalak.

Ha!!!
Marmanat ma hita amang, inang. Taargahon ma angka naung denggan tahatai jala tatolopi. Taargai ma amang pandita sebagai NAPOSO NI DEBATA. Unang pamurahu mangose. Taingot ma hata na mandok: Dengke ni sabulan, tu tonggina tu tabona. Manang na ise siose padan, tu ripurna tu magona. (Janji harus ditepati, jika dilanggar akan timbul marabahaya) Syalom dan selamat pagi...